Juan 18
18
Piyataꞌnan lamang ni Jesus i mga nagdakep it kanya
[Mateo 26:47-56; Marcos 14:43-52; Lucas 22:47-53]
1Pagkatupus ni Jesus it iti nga panalangin ya, namagpanaw na sirat mga alagad ya ngayti. Naꞌaduꞌun sirat sang dipag it sapaꞌ it Cedron, siminled sira duꞌun it esa nga kalulwakan it kayu nga olibo.
2Iti nga rugar, urut ni Judas ngayti nga dimnagang it kanya, sabap pirmi si Jesus duꞌun, sang siraan naga. 3Aypaꞌ naꞌaduꞌun nagat kalulwakan ngayti si Judas ka yay pakiꞌupakat ya duꞌun it mga pagbayaꞌen it mga sasirduti baw mga Pariseo. Magpanguꞌna kanyat mga tiyaꞌeg nirang guwardiya it Templo baw sang iskuwadra gasiꞌ i mga sundaluꞌ. Mamagtitidaw sira baw rangkap sirat basiꞌ.
4Magkaꞌrutan nang lagi ni Jesus i muꞌsa nga madnaꞌan ya, aypaꞌ siyusmu ya na sira baw iningkut ya, nga magꞌaat, “Siyuy pagtulusun mi?”
5“Magtulus kami bat ki Jesus nga taga Nazaret,” maat i tubag nira.
Maat siꞌ ni Jesus ngayti, “Aku na ngaytu baytu.” Si Judas ngayti nga dimnagang it kanya, duꞌun na gasiꞌ magtitindeg. 6Pagꞌaat ngayti ni Jesus nga kanya na ngayti, nakaꞌisnud i kadakel ngayti dayun it nakakleb duꞌun it lugtaꞌ.
7Miningkut siꞌ si Jesus it sumaꞌup, “Siyu bang matuud i pagtulusun mi?”
“Si Jesus baꞌ ngayang taga Nazaret,” maat nagay tubag nira.
8“Daꞌga baꞌ inaat ku na kamu nga aku na ngaytu si Jesus? In akuy pagtulusun mi, pataꞌnan mi lamang nga limꞌid i mga kaꞌibaan ku ngaytu.” 9Inampang yay atkayti ka isaꞌun magmatuud i inampang ya ngayti nga magꞌaat, “Egay naꞌilang ku nga maski esa nga mga ibinggay mu ngaytut aken, Amaꞌ.”
10Daꞌna nasagkaꞌan ni Simon Pedro ngayti i nakem ya. Biyarut yay yuꞌgut ya ka tinigbasan yay uripen it Piyakamataꞌas nga Sasirduti, napalung i talinga nga naꞌiguꞌ. Ngaran it uripen ngayti, si Malco.
11Siyabatan ni Jesus si Pedro ngayti, maat ya, “Iꞌangkap muy yuꞌgut ngayan, ka ega daꞌgaen kuy kakuriꞌan ngaytu nga ipagpalabay it aken it Amaꞌ ku.”
12Ta egay beken, mga sundaluꞌ ngayti nga uyut nagay kapitan nira baw mga guwardiya ngayting mga Judio, diyakep na nira si Jesus bawnga biyayuk. 13Duꞌun daꞌan it ki Anas i uꞌnang tiyabanan nira, sabap punyangan kanya ni Caifas nga Piyakamataꞌas nga Sasirduti it iting taꞌun. 14Si Caifas i nagꞌaat ngaytit mga Judio nga magayen in sang kataawan lamang i kaꞌilangan nga matay, bilang ganti it kadakel.#18:14 Kapitulu 11:49-50.
Uꞌnang paylu ni Pedro sabap it ki Jesus
[Mateo 26:69-70; Marcos 14:66-68; Lucas 22:55-57]
15Si Simon Pedro baw esa gasing alagad, piyarurumbayaꞌan nira naga si Jesus ngayti. Kilala it Piyakamataꞌas nga Sasirduti i iti nga alagad, aypaꞌ ka nakasled kanya nga iba ni Jesus duꞌun it pagkakaliputputan nga kamaꞌyagan it balay it Piyakamataꞌas ngayti nga Sasirduti. 16Ki Pedro ngayti, natuduꞌ lamang duꞌun it liꞌwan it puwirtaꞌan. Aypaꞌ binwat it alagad ngayti nga kilala it Piyakamataꞌas ngayti nga Sasirduti, nagpaꞌuliꞌ kanya duꞌun it puwirtaꞌan, siyugi-sugid yay babay nga guwardiya, yapay kasled ni Pedro it kanya.
17Iningkut si Pedro it babay ngayti, maat ya, “Daꞌga baꞌ esa ka gasing alagad it iyang taw?”
“Bilaꞌ, ega!” maat i tubag ni Pedro.
18Maramig na it iting uras, aypaꞌ nagꞌapuy i mga uripen baw mga guwardiya ngayti. Mamagdagpiꞌ na sira duꞌun. Nagpakidagpiꞌ na gasiꞌ si Pedro.
Siyumarya na si Jesus it Piyakamataꞌas nga Sasirduti
[Mateo 26:57-66; Marcos 14:53-65; Lucas 22:66-71]
19Siyumarya si Jesus it dati ngayting Piyakamataꞌas nga Sasirduti, nga si Anas, sabap it mga alagad ya baw mga ipagpanulduꞌ ya.
20Katubag si Jesus, maat ya, “Muꞌsang ipagpanulduꞌ ku, purus kat muyagan. Pirmi akung magpanulduꞌ duꞌun it mga papagtingpedan it mga Judio, nga duꞌun it mga papagsambaan, pati duꞌun it Templo. Egay inampang ku kat malingeb. 21Unuka aku pay ingkutun mu? Iyan mga nakagneg it panulduꞌ ku, iyan nay ingkutun mu. Urut nayan nira i mga inaat ku.”
22Pagkaꞌampang ya kayti, tiyampaling kanyat esa nga guwardiya nga duꞌun nga magꞌaat, “Unuka atkayan i tubag mut Piyakamataꞌas nga Sasirduti?”
23Maat i tubag ni Jesus, “In ega magayen i inampang ku, ipamatuud mu in unuy kasalaꞌan ku. Temed in matuud i inaat ku, unuka tiyampaling mu aku?” 24Ta it magtulus paꞌ sirat ikadimanda nira kuntraꞌ it ki Jesus, ipiyatindak na ni Anas si Jesus ngayti, nga pagbabayukun naga, duꞌun it ki Caifas ngayti nga Piyakamataꞌas nga Sasirduti.#18:24 Pagꞌiꞌistarat Piyakamataꞌas nga Sasirduti, mabakas nga balay. Kat pasepsep it beken nga mga nakapagꞌadal it itung mga bagay, si Caifas baw punyangan yang si Anas, sang kabala-balayan sira. Malayaw talagay iting balay. May kana Caifas nga mga seled. May kana Anas gasing mga seled. It egay pagbaraꞌan it pagsumarya ni Anas it ki Jesus, ipiyatindak ya duꞌut ki Caifas nga bagiꞌ it balay ka kanya nay mukuman.
Pasigi nga paylu ni Pedro sabap it ki Jesus
[Mateo 26:71-75; Marcos 14:69-72; Lucas 22:58-62]
25Si Simon Pedro ngayti, duꞌun paꞌ magpakidagpiꞌ. Iningkut nira siꞌ kanya nga magꞌaat, “Daꞌga baꞌ esa ka gasing alagad ya?”
“Bilaꞌ, daꞌkuy aken alagad ya!” maat i tubag ni Pedro.
26Iningkut siꞌ kanyat esa nga uripen it Piyakamataꞌas ngayting Sasirduti, nga kaduguꞌan naga it piyalungan ya ngaytit talinga. “Daꞌga baꞌ,” maat ya, “ikaw ngayan i naltegan ku nga iba ni Jesus duꞌut kalulwakan ngayti?”
27Magpandaꞌga-daꞌga na si Pedro, dengan it timnaraꞌuk nay manuk.
Siyumarya si Jesus it Romano nga gubirnadur nga si Pilato
[Mateo 27:1-2; 27:11-14; Marcos 15:1-5; Lucas 23:1-5]
28Garing duꞌun it balay ni Caifas, tiyaban sit mga Judio si Jesus duꞌun it balay it gubirnadur nga Romano. Magpangyag na it iting uras. Ega siminled i mga Judio duꞌut balay it gubirnadur, isaꞌun daꞌsira ipabetang nga ega mapakay nga kumaꞌen it pangiyapun nga Tiyaꞌliban.#18:28 May mga urdin pasar it panlimpiyuꞌ nga kaꞌilangang pagsunudun it mga Judio parabir sira magsamba u pakipistaꞌ, isaꞌun masepsepan nira nga talagang ega basta-basta i Ampuꞌang Diyus ka alaid kat muꞌsang kasalaꞌan. Esat mga urdin ngaytu, bawal i semled duꞌut balay it ega Judio in aldaw nat pagsamba, ka paribasay pagsasakpan pat uꞌnang pakiꞌupakat i mga Judio, pagrignaꞌan paꞌ niray ega Judio ngayti. Basaen i paꞌyag duꞌun it kapitulu 13:1. 29Aypaꞌ liniꞌwan ga sira it gubirnadur ngayting si Pilato, ka iningkut ya sira nga magꞌaat, “Unuy ipagdimanda mi it itu nga taw?”
30Katubag i mga Judio ngayti, maat nira, “Simpri in ega maraꞌe-raꞌet i pagbuwaten it itung taw, ega ipaꞌalima namen kanya it imu.”
31Maat siꞌ ni Pilato, “Pabayaꞌen mi naga kanya. Baalaꞌ kamu mukuman uyun duꞌun it kasuratan mi.”
“In maat daꞌga,” maat it mga Judio ngayti, “egay pudir namen it mukuman it ukuman nga kamataynen kat maski siyu.” 32Atkayti ka isaꞌun matuman i ipiyagꞌaat ni Jesus pasar it pabetang-betang it kamataynen ya.
33Ta it atkayti, siminled si Pilato bawnga tiyaꞌwagan ya si Jesus. Iningkut ya nga magꞌaat, “Unu, Adiꞌ ka it mga Judio?”
34“Unu bayan?” maat ni Jesus. “Inaat mu ngayan, pikir mung sadili u may nagꞌaat it imu?”
35“Adimaat Judio akuy aken!” maat ni Pilato. “Mga kabanwa mu naga baw mga pagbayaꞌen it mga sasirduti mi, sira bay nagꞌintergaꞌ it imu situt aken. Unu talagay binwat mu?”
36Tumubag si Jesus, maat ya, “Iyan pagkaꞌadiꞌ ku, ega subuk mga pagkaꞌadiꞌ nga situt sinirungat langit. In beteꞌ atkayay pagkaꞌadiꞌ ku, simpri panindegan akut mga taawan ku. Simpri ega basta-basta maꞌalima akut mga Judio ngaytu. Temed ta it belag talagay garing it aken nga pagkaꞌadiꞌ.”
37“Aypaꞌ adiꞌ ka, daꞌga?” maat ni Pilato.
Maat i tubag ni Jesus, “Eeꞌ, matuud yan i inaat mu ngayan nga adiꞌ aku. Temed ipiyanganak aku baw piyalampud situt banwa ngaytu isaꞌun nga ipaꞌyag kuy in unu talagay kamatuudan. Magpagneg it mga ampang ku i kumpur kumaꞌrut it kamatuudan.”
38“Ay unu talaga bay kamatuudan?” ingkut ni Pilato ngayti. “Egay magkaꞌrut it in unuy kamatuudan nga paꞌaaten.”
Biyetanganan it ukuman nga kamataynen si Jesus
[Mateo 27:15-31; Marcos 15:6-20; Lucas 23:13-25]
Pagkaꞌampang ni Pilato ngayti, nanliꞌwan siꞌ kanya bawnga inaat ya siꞌ i mga Judio, “Egay magkaꞌanuꞌan ku nga kasalaꞌan it taw ngayti. 39Temed it nagbaraꞌ na nga kaꞌugaliꞌan nga may paliꞌwanen ku situt imyu nga sang kataawan kat pagkapirisu in aldaw it Tiyaꞌliban ngaytu, ta unu, ireg mi nga paliꞌwanen kuy Adiꞌ mi nga mga Judio?”
40Nanggaꞌmaran nay mga Judio ngayti, maat nira, “Ega! Ega iyang taw i ipaliꞌwan. Si Barrabas na lamang i paliꞌwanen.” Si Barrabas ngayti, esa nga manigpanrangpas.
Zvasarudzwa nguva ino
Juan 18: TBWONT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1992, Wycliffe Bible Translators, Inc. All rights reserved.