Juan 20
20
Ega nay si Jesus duꞌut lebeng ya
[Mateo 28:1-8; Marcos 16:1-8; Lucas 24:1-12]
1Madelem-delem paꞌ it aldaw it Linggo, naꞌaduꞌun na si Maria Magdalena it limbengan ngaytit ki Jesus. Pagꞌabut ya, letganan ya, pagꞌaꞌawaꞌen nay ilimpen ngayti nga batu duꞌun it balaꞌbaꞌan it lebeng. 2Ta sabap it itiꞌen, magpapalagyu kanya nga naꞌaduꞌun it ki Simon Pedro baw duꞌun it alagad ngayti nga pagmaꞌalen ni Jesus. Pagꞌabut ya, maat ya, “Pinsiꞌ na bay Ampuꞌan duꞌun it lebeng ya. Ega magkaꞌrutan namen in ipiyaꞌunu-unu na.”#20:2 Siguru, mga babay nga kaꞌibaan ni Maria ngaytit naꞌaduꞌun it lebeng, nagpatuduꞌ sira duꞌun. Pagkagaring ni Maria ngayti, yapay kalteg nirat anghil nga miyaat nga nagꞌegen siꞌ si Jesus.
3Pagkagneg ni Pedro duwa sirat esa ngayting alagad, napanaw sira nga lagi, namagpaꞌaduꞌun it lebeng. 4Magpapalagyu na sirang duwa, temed magkauꞌnay esa ngayting alagad. Nakauꞌna kanya duꞌun it lebeng ngayti. 5Pagꞌabut ya, miyurkuꞌ kanya ka siniꞌlig yay duꞌut seled. Naltegan ya nga duꞌun nagay mga rambay nga ibiyuꞌtung it ki Jesus, temed ega siminled kanya. 6Nakaꞌbut na gasiꞌ si Simon Pedro ngayti. Pagꞌabut ya dayun-dayun kanyat siminled. Naltegan yang duꞌun nagay mga abel ngayti. 7Baw iyan lages ngayti nga ibiyuꞌtung gasit ulu ya, magbebela-belag it dadaꞌtun, pagluulunun it magayen. 8Siminled na gasiꞌ i alagad ngayting nakauꞌnat kaꞌbut. Naltegan ya nat pagayen-gayen baw namayaꞌ kanya. 9(Ega paꞌ magkasepsepan niray duꞌun it kasuratan, nga magbebtang duꞌun nga magꞌaat, kaꞌilangan magꞌegen nagat paꞌuliꞌ si Jesus.)
Nagpakikita si Jesus it ki Maria Magdalena
10Miyuliꞌ nay duwa ngayting mga alagad. 11Temed si Maria, nga nagpaꞌuliꞌ naga duꞌun it lebeng ngayti, duꞌun naga magtitindeg it liꞌwan it limbengan ngayti, magtegel it sugaw. Miyurkuꞌ kanya it magsusgaw paꞌ baw liminteg duꞌun it seled it lebeng ngayti. 12May naltegan ya nga duwa nga mga anghil nga magꞌaꞌdung duꞌun it piyadayagan ngaytit ki Jesus. Esay duꞌun it uluwan manggid, esa duꞌun it aꞌayan. Mapuputiꞌ i pakayan nira.
13Miyampang sira nga ingkut nirat ki Maria, maat nira, “Edeꞌ, unuy magkasgawan mu?”
Katubag si Maria, maat ya, “Pinsiꞌ nira bay Ampuꞌan ku. Taꞌway in ari nay tiyabanan nira.” 14Pagkaꞌampang ya kayti, limningaw kanya. Naltegan ya nga may magtitindeg duꞌun it talikudan ya nga taw, temed ega nakilalaan ya nga si Jesus na palan i itiꞌen.
15Iningkut kanya ni Jesus, “Unuy magkasgawan mu? Siyuy pagtulusun mu?”
Tanud ni Maria, iti, manigꞌarigra it kalulwakan ngayti. Aypaꞌ maat ya, “Amay, tabiꞌ it imu, in beteꞌ ikaw i minsiꞌ it kanya, itulduꞌ mut aken in ari tiyabanan mu, ka pisiꞌen ku naga.”
16“Maria,” maat ni Jesus ngayti.
Egay beken, nanarunga kanya baw nakagaꞌuy. Yanay naꞌampang ya, “Raboni!” (Ireg sugiden it Hinebreo ngayting ampang, Manigtulduꞌ.)
17“Ega na daꞌan sumari kat sekel it aken, ka daꞌku paꞌ nakaꞌuliꞌ duꞌun it Amaꞌ. Iyan i buwaten mu kayti, paꞌaduꞌun kat mga alagad ku nga ipagpabetang ku na nga mga sulsug ku baw isugid mut kanira nga muliꞌ aku na duꞌun it Amaꞌ ku, nga Amaꞌ mi gasiꞌ, duꞌun it Ampuꞌang Diyus ku nga Ampuꞌang Diyus mi gasiꞌ.”
18Napanaw na si Maria Magdalena ngayti, nga naꞌaduꞌun nga matuud it mga alagad ka tuturanan sira. Pagꞌabut ya maat ya, “Naltegan ku siꞌ bay Ampuꞌan!” Baw isiyugid ya nay ipiyagꞌaat ngayti ni Jesus it kanya.
Nagpakikita si Jesus duꞌun it mga alagad ya
19Iyan delem na it aldaw ngaytit Linggo, duꞌun nay mga alagad ngayti it seled it esang balay. Mamagsisiradu it magayen i mga talaꞌep ka magꞌiꞌlam sirat mga pagbayaꞌen nirang mga Judio. Sakaling naltegan nirang magtitindeg si Jesus duꞌut piyagtenga-tengaꞌan nira! Maat yat kanira, “Ayaw kamut iꞌlam. Pasagyaen mi nay nakem mi.” 20Pagkaꞌampang ya kayti, ipiyalteg yay mga alima ya baw kilid ya ngayti. Masagyang-masagya i mga alagad ngayti ka naltegan nira siꞌ i Ampuꞌan.
21Maat siꞌ ni Jesus it kanira, “Maꞌimyu nay kaꞌimbengan it nakem mi. In magꞌuꞌunu tiyaꞌeg akut Amaꞌ, atkayan naga pagtaꞌgen ku gasiꞌ kamu.” 22Pagkaꞌampang ya kayti, inyepan ya sira baw maat ya, “Mapakay na nga matanggap mi nay pasarum kat bilug mi nga Espiritu Santo. 23Kat pagpanakem yat imyu, in siyung mga taw nga sugidan mi nga piyasinsiya i mga kasalaꞌan nira, siguradung pagpasinsiyaen yang matuud sira. Temed iyan nga sugidan mi nga ega piyasinsiya, siguradung ega naga yan piyasinsiya sira.”
Pagpakikita siꞌ ni Jesus, duꞌun na si Tomas
24Si Tomas, nga panaꞌwag it kanya, Gambar, kaꞌuyutan naga it sang puluꞌ baw duwa ngayting alagad ni Jesus. Temed egay duꞌun nga kanya, pagpakikita ngayti ni Jesus. 25Aypaꞌ itiyuturan na lamang it kanya it beken ngayting alagad. Maat nira, “Naltegan namen siꞌ bay Ampuꞌan!”
Pagkagneg ni Tomas, maat ya, “Bilaꞌ, daꞌku bayan paratya basta ega maltegan kuy piyanawan it ransang ngayan asat alima ya, baw maruꞌukan kut tutulduꞌ ku, baw alima ku ilaꞌut ku gasiꞌ asat kilid ya.”
26Nagtaꞌlib i sang lingguꞌ, natiꞌmes it sumaꞌup i mga alagad duꞌut seled it balay. Puꞌsa na sira, pati si Tomas duꞌun na. Mamagsisiradu nagat magayen i mga talaꞌep. Temed batiꞌan nira duꞌun nat seled si Jesus, magtitindeg siꞌ duꞌut piyagtenga-tengaꞌan nira. Inaat ya sira, “Pasagyaen mi nay nakem mi.” 27Bawnga inaat ya si Tomas, “Letganan muy mga alima ku, baw iruꞌuk mu nay tutulduꞌ mu sinit bungad nga piyanawan it ransang. Ilaꞌut mu na gasiꞌ i alima mu sinit kilid ku. Ayaw ka nat pakiꞌambut. Pamayaꞌnen mu na.”
28Yanay seked it naꞌampang ni Tomas, maat ya, “Ampuꞌan ku, Ampuꞌang Diyus ku!”
29Inaat siꞌ kanya ni Jesus, “Ta, magpamayaꞌ ka na ka naltegan mu na aku. Temed makasagya talaga sira nga magpamayaꞌ maski daꞌsira nakalteg it aken.”
30Dakel paꞌ i mga tandaꞌanan nga kalililuꞌang bagay nga binwat ni Jesus, nga nagpasar kat matat mga alagad ya ngayti, temed ega na nakabtang situt itu ngaytung kasuratan. 31Temed iyan mga magsusurat situ, isiyurat tu ka isaꞌun mamayaꞌ kamu nga si Jesus na ngaytu i isiyanggup nga Manriribri baw kanyay Anak it Ampuꞌang Diyus. Baw kat pamayaꞌ baw pakilagpit mit kanya, siguradu nga maꞌimyu i kaꞌgenan nga egay kaskedan.
Zvasarudzwa nguva ino
Juan 20: TBWONT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1992, Wycliffe Bible Translators, Inc. All rights reserved.