Lukase 18
18
Adsiujomik erᴋartuijomik idluangitomik, Farisêeremiglo pimaklertemiglo. Sorusertut issumaᴋarnermik. Akluinerub agviarninganik assetârtauninganiglo. Nalautainermik Jêsusib ânianginik. Tautungitub âᴋiktauninganik Jerikome.
1Adsiujomigle oᴋautivait, soraijuitomik tuksiariaᴋarnivut pitjutigilugo, inertuinata.
2Oᴋarlunelo: Erᴋartuijoᴋalaukpok iglugasaksoarne; tâpsoma Gûde erᴋsigingilâ, sivôrananelo inungnik.
3Iglugasaksoarnelo tagvane uigarneᴋarpok; tâpsoma oᴋautijartorpâ: Piulinga akkerartortimnit.
4Akunille tussâjomangilâ. Kingornganele ilumigut issumalerpok: Gûde erᴋsigingiᴋalloarapko inuillo sivôraginagit,
5Uigarneruble tâpsoma pagvisâlermanga, piulijomavara, sugaluksaromanginama kêta.
6Tagva Nâlegak oᴋarpok: Ahâk idluangitub erᴋartuijub oᴋausinga tussarsiuk.
7Gûdible anerijane piulinajangilagît, uvlut unanuallo nâvlugit nipliavigingmatsuk, unêt akunêralloarunê?
8Oᴋaupapse: Piulisâromârpait. Inûble Erninga tikitsomârpat, nuname okpernermik nagvâromârasugiviûk?
9Ilangille ajungitônasugijut, assimingniglo nachojut mattominga adsiujomik oᴋautivait:
10Angutîk maggûk takpaunga katimaviksoarmut tuksiariatorpuk, aipâ Farisêereojok, aipanglo pimaklerteojok.
11Farisêere nangerdlunelo ilumigut tuksiarpok imâk: Gûde ᴋujagivagit, assiptut inuktut-inginama, arᴋtaijotut, idluitulijotullo, arnarniartotullo, pimaklertotullônêt ôtunak.
12Vogeme maggoertorlunga nerritailivakpunga, perᴋutimalo ilûnatik tallimaujoanik tunijivunga.
13Pimaklertele ᴋaninane nangerpok, ᴋilangmullônêt ârloromangitok; sagvingminulle patiksimajok oᴋarlune: Gûde, nâpkigilaunga idluitoksôjunga.
14Oᴋaupapse: tâmna aipaminit ajornerminit issumagijaujungnainersauvlune atersârpok iglominut. Ingminik angijorortitok miklilertitaujomârpok, ingminiglo miklilertitok angijorortitaujomârpok.
15Nutakᴋaniktauk âtsivut tâpsomunga, patingmijauᴋovlugit. Ilinniartingitale âtsijut takogamigit suadlalerpait.
16Jêsusible ᴋaiᴋovait, oᴋautivlugit: Nutakᴋat uvamnut pilit inerterasigiglo; tâpkoa Gûdib nâlegauvia pigingmatsuk.
17Âhamarik oᴋaupapse: Nutakᴋatut Gûdib nâlegauvinganik pingitok, iterniangilak.
18Angajoᴋâllo ilangata aperivâ: Ajungitotit ajoᴋertuijok, sumik piniartuksauvêk, inôtsemik nâksaungitomik kingormgujijomavlungâ?
19Jêsusible oᴋautivâ: Sôk ajunginerarpingâ? Ajungitoᴋangilak Gûdetôjub assianik.
20Perᴋojat ᴋaujimagalloarpatit: Nuliarêngnermik asseroijuksaungilatit. Inuartuksaungilatit. Tigliktuksaungilatit. Inuᴋatitit saglotigivlugit oᴋartuksaungilatit. Atâtangnik anânangniglo nâlektuksauvotit.
21Tâmnale oᴋarpok: Tamakkoa tamaita malilaukpakka sorusionimnit.
22Jêsusible tamanna tussaramiuk, oᴋautivâ: Atausek sulle pingilat. Perᴋutitit tamaita niorvgutiginiakit, aklujunullo piliutigilugit, tagva perᴋuteᴋatsiarniarpotit ᴋilangme; ᴋailerillo maliklunga.
23Tamannale tussaramiuk, kiksalerpok; akluitoksôgame.
24Jêsusible kiksartitaumajok takogamiuk oᴋarpok: Akluitut nâlegauvingmut ᴋilangmêtomut pilutik Sappernaᴋasakpok.
25Ajornanginersauvok Kamêle merᴋutib ijingagut pilune, akluitub iterniarninganit Gûdib nâlegauvinganut.
26Tamattomingale tussartut oᴋarput: Kinale tagva piulijaujungnarniarᴋâ?
27Oᴋarporle: Inungnut ajornartok Gûdemut ajornangilak.
28Tagva Pêtrusib oᴋautivâ: Ahak, tamaita ᴋemalaukpavut malilarpillo.
29Oᴋautivâle: Âhamarik oᴋaupapse: ᴋemaijoᴋangilak iglomik, angajoᴋângniglônêt, ᴋatangutiniglônêt nuliamiglônêt, ᴋitornganiglônêt Gûdib nâlegauvinga pivlugo,
30Tunitjiviolungitomik unuktunik mattomanêdlune, silamelo pijomârtome inôtsemik nungusuitomik.
3112 ille ingminut pitipait oᴋautivlugillo: Ahâk takpaunga Jerusalemut aivogut, nelautaijullo aglangit ilûnatik nelautsilârput Inûb Erninga pivlugo.
32Tâmna pititaulârpok nalojunut: mitautigilârpât, allêkutigilugolo, ᴋetserarlugolo;
33Issaᴋalârpâllo, toᴋodlugolo; uvluglo pingajuangne makitsomârivok.
34Tamakkoale tamaita tukkisingilait, oᴋausingillo nalonadlalaukput tâpkonunga, ᴋaujimanatiglo oᴋauserilauktanginik.
35Jêriᴋomulle ᴋaglilerame, tautungitok apᴋotâne iksivavok ᴋenuvlunelo.
36Inugasaksuit senerᴋotut tussaramigit apertsorpait mattominga.
37Jêsusemigle Nazaremiomik ᴋângiutijomik oᴋautingmatsuk,
38Niplialerpok oᴋarlune: Jêsuse Davidib erninga nâpkiginga!
39Sivorlertulle inerterpât nipangerᴋovlugo. Tâmnale niplialualerpok: Dâvidib erninga napkiginga!
40Jêsusible nokᴋalerdlune tessiortauᴋovâ ingminut. Alermatsugle, aperivâ,
41Oᴋarlunelo; Sumîk uvamnut piniarviojomavêt? Kiovâ: Nâlegak, tautuleromavlunga.
42Jêsusiblo oᴋautivâ: Tautulerit, okpernivît ikajorpâtit.
43Tagvainarlo tautulerpok, maliklugolo, Gûdelo nakoridlarpâ. Inuillo ilûnatik tamattominga tautuktut Gûde nertorpât.
Выбрано:
Lukase 18: LIHB08
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Labrador Inuttitut Heritage Bible © Canadian Bible Society, 2008.
