Lukase 17
17
Jêsuse ajoᴋertuivok, âᴋêvlunelo kalaktunik tallimaujortunik. Gudib nâlegauvianik tikiniartomik oᴋâlavok.
1Ilinniartinele oᴋautivait: Sinaungatitsineᴋanginek ajornarpok; kappianamêgle taimna sinaungatitsijok!
2Tâpsomunga idluarnersauvok, serᴋalitsiviub ujaraktanganik ᴋungasingagut nivingaiviogune, egitauvlunelo imarbingmut, ukkuararsuit ilangata sinaungatitauninganit.
3Udsertoritse. ᴋatangutivît idluitulivigikpatit, inerteruk; idluitulijungnaipallo, idluiningit issumagijungnaikit.
4Uvlormelo atautseme 7 ertorlune idluitulivigikpatit, uvloênarlo 7 ertorlune tikipatit, ᴋaᴋialerpungârdlune; issumagijungnairaksarivat.
5Apostelillo Nâlekamut oᴋarput: Okpernivut nakoᴋsititsuk.
6Nâlekagle oᴋautivait: Mustardib karngasûtiksatangatut okperneᴋarupse, napârtomullo paungaliksamut ômunga oᴋarluse: Tagvangat pêrit, imarbingmullo nukterit, tagva nâlengniarpâse.
7Kia ilapse kivgaliub perorsêvingme sanajomik, nergjutiniglônêt mianersijomik, perorsêvingmit tikilerangat, oᴋautiniarpaûk: Tuavidlutit nerrimârvingmut ingitsartorît?
8Imâk oᴋautiniangilaûk: Unnuksiumik nerᴋiksaliniaringa, sailitserlutillo kivgartoringa nerritilunga imertilungalo, kingunipkut nerrijuksauvotit imerlutillo?
9Kivgak tâmna ᴋujaginiarpaûk, perᴋojaunerminik pilaungmât? Taimâk issumangilanga.
10Taimâktauk ilipse, perᴋojaunise tamaita pinialaurupsigik oᴋaritse: Kivgakullôvogut; piniaraksavut kissêta pigaptigik.
11Jerusalemullo ingergarame, Samâria Galilêalo apᴋotigivak.
12Iglugasangnullo pingmat, angutit tallimaujortut kalaktut pâkpât; tâpkoa alivasiktome nangerput.
13Nipperᴋortovlutiglo oᴋarput: Jêsuse, nagliktok ajoᴋertuijok, nâpkigitigut!
14Takogamigillo, oᴋautivait: Ajoᴋertuijunut takotitsartoritse! Taingungalo aivlutik kalaᴋarungnailerput.
15Tâpkoale illangat kalagungnainerminik takogame, uterivok, Gûdelo nakoridlarpâ nipperᴋortovlune;
16Itiganginullo pâmakterpok, ᴋujagilâllo. Tâmnalo Samâriamiovok.
17Jêsusible kiovâ oᴋarlune: Kalaᴋarungnailertut 10 ungilât? Nauk taipkoa 9 ît?
18Assianik utertoᴋangilâk Gûde nakorilugo takorngartamit ômangât?
19Oᴋautivâlo: Makilutillo aularit, okpernivît ikajulaukpâtit.
20Farisêerille aperingmatsuk: ᴋanga Gûdib nâlegauvinga pijomârᴋâ? Kiovait oᴋarlune: Gûdib nâlegauving takuksaulune piniangilak.
21Oᴋartoᴋarniangilarlônêt: Ahâk, mânêpok ikanelônêt, Ahâk, Gûdib nâlegauvinga ilupsingnêpok.
22Ilinniartiminulle oᴋarpok: Naliutsomârpok Inûb Erningata uvlungita ilanganik takojomaniksase, takonagolo.
23Oᴋautijomârpâselo: Ahâk tamânêpok, ikanelônêt. Taikunga ainiarase malingniaraselo.
24Sorlo ᴋaumalak pikangat ᴋilangmit ᴋaumaidlarmat, ᴋaumatilugit tamaita ᴋilaub atanêtut, taimâktauk Inûb Erninga itsomarivok uvluksamine.
25Taimnale naliuterᴋârtinago, âniatitaujariaᴋarpok, ajaktortaujariaᴋarlunelo kinguvângoᴋatingênut tamakkonunga.
26Sorlo Nôab neliunerilauktangane pijoᴋalaungmat, taimâktauk Inûb Erningata uvluksangane itsomârivok.
27Ipkoa nerrivut imilarmiglo, nulianikput uinilarmiglo, uvlok taimna tikidlugo Nôab itervia umiaksoarmut; ullitornivaksûb tâva tikipait, nungudlugillo tamaita.
28Taimâktauk, sorlo Lotib naliunerilauktangane Pijoᴋalaungmat. Nerrivlutiglo imerput, pisiniarlutiglo, niuverlarmiglo, perorsêviliorput, igluliorlarmiglo;
29Uvlormele taipsomane, Lote aularmat Sodomamit, silalulerpok ᴋilangmit ikomamik orᴋsoromiglo, tamaitalo nungupait.
30Taimâktauk itsomârivok Inûb Erningata uvluksangane, sakᴋerviksangane.
31Uvlorme taipsomane iglub ᴋânganêtok akᴋarniarane, perᴋutine iglomêtut aijomavlugit. Taimâktauk perorsêvingmêtok uterniarane tunuminêtunut.
32Lotib nulianga erᴋarisiuk.
33Inôserminik ivlersinasuartub assiojijomârpâ; inôserminiglo assiojijomârtub, piuliniarpâ.
34Oᴋaupapse: Unnuarme taipsomane angutîk maggûk sinigvingme atautseme innangaᴋatigêgomârpuk; aipanga illaliortaujomârpok, aipâle ᴋemaktaukjomârpok.
35Arnâk maggûk kaivititseᴋatigêgomârpuk; aipanga illaliortaujomârpok, aipâle ᴋemaktaujomârpok.
36Angutîk maggûk perorsêvingmêtsomârpuk; aipanga illaliortaujomârpok, aipâle ᴋemaktaujomârpok.
37Aperivâlle oᴋautivlugo: Nâlegak, nanê? Oᴋautivaille: Nane ᴋigdloᴋartome nektoralit kativakput.
Выбрано:
Lukase 17: LIHB08
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Labrador Inuttitut Heritage Bible © Canadian Bible Society, 2008.
