LUKA 22

Ta ku xenga ka Yudasi.

1Nkhuvo wa swinkwa leswo kala comela, lowu vuriwaka Paseka, a wu tshinele. 2Kutani vaprista lavakulu ni vatsari a va lava hilaha va nga ta dlaya Yesu hakona, hikuva a va chava tiko.

3Kambe Satana a nghena eka Yudasi la vuriwaka Iskariyota, la nga hlayiwa ni lava khume na vambirhi; 4kutani a ya eka vaprista lavakulu, ni ka tindhuna ta nyimpi, ku kanela na vona hilaha a nga ta va nyiketa yena hakona. 5Kutani va tsaka, va pfumelelana ku n'wi nyika mali. 6Kuteloko a pfumerile, a lava hilaha a nga ta va nyiketa yena hakona, ku nga ri na dzolonga.

Ta Paseka ni Xilalelo.

7Kuteloko siku ro sungula ra swinkwa leswo kala comela ri fikile, ri nga leri va tlhavaka Paseka ha rona, 8a rhuma Petro na Yohane, a ku eka vona: “Yanani, mi hi lunghisela Paseka leswaku hi ta yi dya.” 9Kambe va ku eka yena: “Hi kwihi laha u swi rhandzaka leswaku hi ya lunghisa kona?” 10A ku eka vona: “Loko mi nghenile emutini, mi ta hlangana ni munhu la rhwaleke khuwana ra mati; mi n'wi landzela endlwini leyi a nga ta nghena eka yona. 11Kutani byelani n'wini wa yindlu, mi ku: ‘Mufundhisi u ri eka wena: Yindlu yi kwihi laha ndzi nga ta dya Paseka eka yona ni vadyondzisiwa va mina?’ 12Kutani u ta mi komba yindlu leyikulu, leyi nga ehenhla, leyi andlariweke; hi kona mi nga ta hi lunghisela kona.” 13Kutani va suka, va ya kuma swi ri tano, hilaha a nga va byerisa swona; kutani va lunghisa Paseka.

14Loko nkarhi wu fikile, a tshama etafuleni swin'we ni vaapostola. 15Kutani a ku eka vona: “Ndzi swi rhandzile ngopfu ku dya Paseka leyi na n'wina, ndzi nga si vaviseka; 16hikuva ndzi ri eka n'wina: Ku sungula sweswi, a ndzi nga ha yi dyi, ku ko ku fika siku leri yi nga ta hetiseka eku fumeni ka Xikwembu.”

17Kuteloko a tekile xinwelo, a khensa, a ku: “Tekani mi siyerisana; 18hikuva ndzi ri eka n'wina: A ndzi nga ha nwi murhi wa vhinya, ku ko ku fika ku fuma ka Xikwembu.”

19A va a teka swinkwa, kuteloko a khensile, a phema, a va nyika, a ku: “Leswi, i miri wanga, lowu nyikeriwaka n'wina; endlisani sweswo, mi ta ndzi anakanya ha swona.” 20A endlisa sweswo ni xinwelo, loko va lalele, a ku: “Xinwelo lexi, i ntwanano lowuntshwa engatini ya mina, leyi halateriwaka n'wina. 21Kambe vonani, voko ra la ndzi xengaka ri kona la etafuleni na mina. 22Loko a ri N'wana wa Munhu, u ta tifambela hilaha swi nga vuriwa hakona, kambe u ni khombo munhu loyi a n'wi xengaka.” 23Kutani va sungula ku vutisana, va ta tiva xana i mani exikarhi ka vona la nga ta swi endla.

Ta vadyondzisiwa loko va kanetana ta vukulukumba.

24Kutani ku kanetana ku va kona exikarhi ka vona, ku tiva la ringanisiwaka lonkulu. 25Kambe a ku eka vona: “Tihosi ta matiko ta ma fuma; kutani lava ma fumaka hi matimba va vuriwa vakatekisi va wona. 26Kambe swi nga tshuki swi va tano eka n'wina; kambe lonkulu exikarhi ka n'wina, a a kotise lontsongo; kutani la fumaka a a kotise la tirhaka. 27Hikuva lonkulu i mani? Xana hi la tshamaka etafuleni, kumbe la tirhelaka kona xana? A hi la tshamaka etafuleni xana? Kambe mina, ndzi le xikarhi ka n'wina kukota la tirhelaka. 28Kambe hi n'wina lava tiyiseleke na mina emiringweni ya mina. 29Na mina ndzi ta mi nyika ku fuma kukota Tatana a ndzi nyikeke kona. 30Mi ta va lava dyaka, ni lava nwaka etafuleni ra mina, eku fumeni ka mina; kutani mi ta tshama eswiluvelweni, mi avanyisa tinxaka ta khume na timbirhi ta Israele.”

Ta Petro loko a byeriwa leswaku a ta va mulandzuri.

31Kutani Hosi yi ku: “Simoni, Simoni, waswivo, Satana a mi komberile, leswaku a mi hlela kukota mavele; 32kambe mina ndzi ku khongelele, leswaku ku pfumela ka wena ku nga tshuki ku titivala. Kutani wena, loko u hundzukile, u ta tiyisa vamakwenu.” 33Kambe Petro a ku eka yena: “Ndzi tilunghisele ku ya na wena ekhotsweni ni le eku feni.” 34Kambe Yesu a ku eka yena: “Petro, ndza ku byela leswaku, nkuku wu nga ka wu nga ringi namuntlha, u nga si landzula kanharhu leswaku wa ndzi tiva.”

35Kutani a ku eka vona: “Enkarhini lowu ndzi mi rhumeke, mi nga ri na xikwamana xa mali, ni nkwama wa timbuva, ni tintanghu, xana mi vuyile mi pfumala nchumu xana?” Va ku: “A hi pfumalanga nchumu.” 36Kutani a ku eka vona: “Kambe sweswi, la nga ni xikwamana xa mali, a a xi teke, ni la nga ni nkwama wa timbuva, a endla sweswo na yena, kutani la pfumalaka tlhari, a a tixavele rona hi nguvu ya yena. 37 Hikuva ndza mi byela leswaku, mhaka leyi tsariweke yi fanele ku hetiseka eka mina, leyi nge: ‘U hlayiwile ni swidyohi.’ Hikuva leswi ndzi bvumbhiweke ha swona, kunene swi ta hetiseka.” 38Kutani va ku: “Hosi, matlhari mambirhi hi lawa!” Yesu a ku eka vona: “Swi ringene.”

Ta Getsemane.

39Kutani a suka a ya eNtshaveni ya Mitlhwari, hi ku tolovela ka yena; kutani vadyondzisiwa va yena va n'wi landza. 40Kuteloko va fikile kona, a ku eka vona: “Khongelani leswaku mi nga ngheni emiringweni.”

41Kutani a va sukela, a ya ekulenyana, hi mpfhukanyana lowu ringanaka ku hoxiwa ka ribye, kutani a khinsama, a khongela, a ku: 42“Tatana, loko u swi rhandza, tshineta ndzheko lowu ekule na mina! Kambe, ku nga endliwi ku rhandza ka mina, a ku endliwe ka wena.” 43Kutani ntsumi yi humelela, yi huma etilweni, yi ta n'wi tiyisa. 44Kakuloko a ri emaxangwini lamakulu, a tiyisa matimba ku khongela; kavaloko nyuku wa yena wu xiririka, wu fana ni mathonsi ya ngati lama tshonelaka emisaveni. 45Kuteloko a sukile eku khongeleni, a ta eka vadyondzisiwa, a va kuma va etlele hi gome. 46Kutani a ku eka vona: “Xana mi etlelele yini? Pfukani, mi khongela, leswaku mi nga ngheni emiringweni.”

Ta ku khomiwa ka Yesu.

47A ku a ha vulavula, ku humelela ntshungu wa vanhu, kutani la vuriwaka Yudasi un'wana wa lava khume na vambirhi, a a wu rhangele emahlweni, a tshinelela Yesu ku n'wi ntswontswa. 48Kambe Yesu a ku eka yena: “Yudasi, xana u nyiketa N'wana wa Munhu hi ku n'wi ntswontswa xana?” 49Kutani lava ngi va ri na yena, loko va vona leswi nga ta humelela, va ku eka yena: “Hosi, xana hi ta lwa hi tlhari xana?” 50Kutani un'wana wa vona a tlhava nandza wa muprista lonkulu, a n'wi tsema ndleve ya xinene. 51Kambe Yesu a vulavula, a ku: “Va tshikeni.” Kutani a khumba ndleve ya munhu loyi, a n'wi horisa.

52Kutani Yesu a vulavula ni lava nga n'wi tela, va nga vaprista lavakulu, ni tindhuna ta nyimpi ya tempele, ni vakulukumba, a ku eka vona: “Mi humile ku ta ndzi khoma hi tisavula ni tinhonga, kukota loko ngi ndzi ri khamba; 53a ndzi tshama ndzi ri na n'wina etempeleni hi masiku; a mi vekanga mavoko ehenhla ka mina; kambe hi wona nkarhi wa n'wina, ni matimba ya munyama.” 54Kuteloko va n'wi khomile va n'wi yisa endlwini ya muprista lonkulu. Kambe Petro a a landzela a ri ekule.

Ta ku landzula ka Petro.

55Kuteloko va tshiverile ndzilo ehubyeni, va tshamisa swin'we; na yena Petro a tshama exikarhi ka vona. 56Nandza un'wana wa wansati, kakuloko a n'wi vona a tshamile ekusuhi ni ndzilo, a n'wi langutisa, a ku: “Na yena loyi a a ri na yena.” 57Kambe yena a n'wi landzula, a ku: “Wansati, a ndzi n'wi tivi!”

58Kaharhi sweswo, un'wana a n'wi vona, a ku: “Na wena u wa vona.” Kambe Petro a ku: “Munhu ndzi wena, a ndzi wa vona!”

59Kuteloko ku hundzile nkarhi wu ri wun'we, un'wana a tiyisa, a ku: “Kunene na loyi a a ri na yena, hikuva na yena i wa le Galeliya.” 60Kambe Petro a ku: “Munhu ndzi wena, a ndzi tivi lexi u xi vulaka!” A ku a ha vulavula, nkuku wu ringa hi nomu lowu. 61Kutani Hosi yi hundzuluka, yi languta Petro; kutani Petro a tsundzuka rito ra Hosi hilaha yi nga n'wi byela hakona, yi ku: “Nkuku wu nga si ringa, u ta va u ndzi landzule kanharhu.” 62Kutani Petro a humela ehandle, a rila hi xiviti.

Ta ku xanisiwa ka Yesu.

63Kutani vavanuna lava khomeke Yesu va n'wi hleka, va n'wi ba; 64kuteloko va n'wi sive mahlo, va n'wi vutisa, va ku; “Bvumbha la ku beke.” 65Kutani va n'wi sandza hi timhaka tin'wana leto tala.

66Kuteloko byi xile, vakulu va tiko ni vaprista lavakulu ni vatsari, va hlengeletana, va n'wi yisa ehubyeni ya vona, 67va ku eka yena: “Loko u ri Kriste, hi byele.” A ku eka vona: “Hambi ndzi mi byela, mi nga ka mi nga pfumeri. 68Kambe, hambi ndzi mi vutisa, a mi nga ndzi hlamuri, kambe mi nga ka mi nga ndzi tshiki. 69Ku sungula sweswi, N'wana wa Munhu u ta tshama evokweni ra xinene ra matimba ya Xikwembu.”

70Kambe hinkwavo va ku: “Xana hileswaku u N'wana wa Xikwembu xana?” A ku eka vona: “Ma vurisa, ndzi yena.” 71Kutani va ku: “Ha ha lavela yini vumbhoni xana? Hikuva na hina hi ti twile hi nomu wa yena.”

Выбрано:

LUKA 22: TSO29

Выделить

Копировать