Yuditi 2
2
Ta ku lwa na tinxaka ta le vupeladyambu
1Hi siku ra vu-22 ra n'hweti yo sungula elembeni ra vu-18 ra ku fuma ka Nebukadnetsara hosi ya Vaasiriya, va le ntsindza a va kanela mhaka yo tirihisela eka matiko hinkwawo lama aleke ku pfuna mufumi wa tiko, tanihi laha a vuleke hakona. 2Hiloko Nebukadnetsara a hlengeleta tindhuna ni tinganakana ta yena hinkwato, a ti vikela xihundla xa kungu ra yena, a ti boxela hi nomu wa yena ku homboloka hinkwako ka matiko lawa. 3Kutani ku twananiwa leswaku un'wana ni un'wana loyi a aleke xileriso xa hosi ú fanele ku dlayiwa.
4Loko Nebukadnetsara hosi ya Vaasiriya a hetile ku hlamusela kungu leri ra yena, a vitana Holofani, ndhunankulu ya mavuthu ya yena loyi a a ri xandla xa yena, a ku ka yena: 5“Ku vula mina hosi leyikulu, n'wini wa misava hinkwayo. Loko u suka laha emahlweni ka mina, teka tinhenha ta 120 000 exikarhi ka masocha yo famba hi milenge ni vagadi va tihanci va 20 000. 6Famba u ya hlasela matiko hinkwawo ya vupeladyambu, hikuva a va yingisanga swileriso swa mina. 7Va byele va lulamisa tinyiko ta vona ta misava ni mati,#Marito lawa ya Vaperesi ma vula hinkwaswo leswi faneleke ku lulamiseriwa mavuthu ya muhluri hikuva ndzi ta ka vona hi ku hlundzuka, ndzi ta funengeta misava hinkwayo hi mikondzo ya mavuthu ya mina, ndzi va nyiketa leswaku va dlayeteriwa hi masocha ya mina, 8ku kondza lava vavisekeke va tata minkova, swinambyana ni milambu swi khapa hi mintsumbu ya vona; 9kutani lava saleke va hanya exikarhi ka vona, ndzi ta va yisa evuhlongeni, ematikweni ya le kule ngopfu.
10“We Holofani, u ta pfa u ya ndzi tekela matiko hinkwawo ya vona. Va ta tinyiketa eka wena, kutani u ta ndzi hlayisela vona ku fikela siku ra ku xupuriwa ka vona. 11Kambe loko va tiarisa, u nga va tsetseleri, u va nyiketa eku dlaweni ni ku phangiweni ematikweni hinkwawo lama nga hansi ka wena. 12Ndzi hlambanya hi vutomi bya mina ni matimba ya mfumo wa mina, leswaku leswi ndzi swi vuleke ndzi ta swi endla. 13Kutani wena, vona leswaku u nga tshuki u tlula xileriso ni xin'we xa mina hosi ya wena, kambe xiyisisa leswaku u endla hinkwaswo hilaha ndzi ku leriseke hakona, naswona u nga hlweri.”
Ku hlasela ka Holofani
14Holofani a suka emahlweni ka n'wini wa yena, a vitana tindhunankulu ni vafambisi ni varhangeri hinkwavo va mavuthu ya Vaasiriya. 15Kutani a hlengeleta tinhenha leti tivaka ku lwa nyimpi hi mintlawa-ntlawa hilaha hosi yi n'wi leriseke hakona, ya ri masocha ya 120 000 yo famba hi milenge ni vacopi va miseve va 12 000 lava gadeke tihanci, 16a va lunghisa tanihi laha swi faneleke mavuthu lama tilulamiseleke ku ya hlasela. 17A hlengeleta tikamela ni timbhongolo ni timeyila to tala, swi ri swifuwo swo rhwala tinhundzu, a teka ni tinyimpfu ta ntsandza-vahlayi, ni tihomu, ni timbuti, swi ri swo tlhaviwa endleleni. 18A teka ni swakudya swo tala swa socha rin'wana ni rin'wana, ni xuma lexo tala ngopfu xa nsuku ni silivhere lexi humaka etindlwini ta le ntsindza.
19Kutani Holofani a huma ni mavuthu ya yena hinkwawo, a rhangela hosi Nebukadnetsara, a funengeta matiko hinkwawo ya vupeladyambu hi makalichi ni vagadi va tihanci ni tinhenha to famba hi milenge. 20#Vaav. 7:12; Yuw. 2:2-11Kun'we na vona a ku famba ni ntshungu lowu a wu fana ni humbi ya#Kumbe: ntlhambi wa tinjiya, wu ringana ntshuri wa misava, va ri vanhu va ntsandza-vahlayi.
21Holofani ni mavuthu ya yena va famba masiku manharhu ku suka eNinivha ku ya fika erivaleni ra Beketile, va gova kusuhi ni ntshava leyi nge n'walungwini wa Kilikiya. 22Ku suka kwalaho, Holofani a teka mavuthu ya yena hinkwawo, masocha yo famba hi milenge, vagadi va tihanci ni makalichi, a tlhandlukela etikweni ra swintshabyana, 23a herisa Putu na Ludu, a dlayetela vanhu hinkwavo va Rasisi na Vaiximaele lava tshameke kusuhi ni le mananga edzongeni ra tiko ra Vakalediya.
24Kutani Holofani a lulama ni nambu wa Yufrata, a tsemakanya Mesopotamiya, a herisa miti hinkwayo leyi akeleriweke eswintshabyanini, kusuhi ni xinambyana xa Abroni, a ya fika elwandle. 25A teka ni tiko ra Kilikiya, a dlaya un'wana ni un'wana loyi a a lwa na yena, kutani a fika edzongeni ra ndzilekana wa Yafeta ku langutana na Arabiya. 26A rhendzela Vamidiyani hinkwavo, a hisa mintsonga ya vona ni ku phanga matshanga ya tinyimpfu ta vona.
27Endzhaku ka sweswo, Holofani a ngirimelela erivaleni ra Damaska hi nkarhi wa ku tshoveriwa ka koroni, a hisa masimu ya vona hinkwawo, a dlayetela mintlhambi ya swifuwo swa vona, a phanga miti ni tiko hinkwaro, a dlayetela majaha ya vona hinkwawo hi banga. 28Vanhu hinkwavo lava akeke ku lulama ni lwandle kusuhi na Tiri na Sidoni, ni lava akeke eSuru ni le Okina, ni hinkwavo lava akeke eYamina, va tshuka ngopfu. Vanhu va Azoto na Askaloni, na vona va n'wi chava hi ku chava lokukulu.
Выбрано:
Yuditi 2: TSO89
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Bible Society of South Africa 1989. Used with permission. All rights reserved.