Yuditi 1
1
Nyimpi exikarhi ka Nebukadnetsara na Aripakixada
1Loko hosi Nebukadnetsara a ha fuma Vaasiriya emutini lowukulu wa Ninivha, hosi Aripakixada a a fuma Vameda emutini wa Ekibatana. 2Hi yona hosi leyi akeke rirhangu leri rhendzeleke Ekibatana hi maribye lama vatliweke ya ku tsindziyela 1,50 m ni ku leha 3 m; yi endla ni makhumbi ya rirhangu lawa ku ya ehenhla a ya ri 35 m, ya anamile 25 m. 3Enyangweni yin'wana ni yin'wana ú akile swihondzo leswi ku ya ehenhla a swi ri 50 m, swi anamile 30 m emasungulweni. 4A endla tinyangwa leti ku ya ehenhla a ti ri 35 m, ti anama 20 m, leswaku mavuthu ya yena ma ta kota ku hundza xikan'we hinkwawo, kun'we ni masocha ya milenge ma xaxamerile.
5Hi lembe ra vu-12 ra ku fuma ka yena, hosi Nebukadnetsara a ya lwa na hosi Aripakixada erivaleni lerikulu leri nge kusuhi ni muti wa Rhage. 6Nebukadnetsara#Van'wana va ri: Aripakixada ú pfuniwile hi vanhu hinkwavo va tiko ra swintshabyana, ni hinkwavo lava a va tshama etikweni ra milambu ya Yufrata na Tigrisi na Hidasipi, ni le rivaleni laha Ariyoko a a fuma Vaelima. Mavuthu ya Vakalediya ya engeteriwile hi vanhu vo tala va matiko yo hambana-hambana.
7Kutani Nebukadnetsara hosi ya Vaasiriya, a vitana enyimpini hinkwavo lava akeke ePersiya, ni le vupeladyambu, ni le Kilikiya, ni le Damaska, ni le Lebanoni na Antilebanoni, ni le ribuweni ra lwandle. 8A rhamba ni lava tshamaka eKarmele, ni le Giliyadi, ni le n'walungwini wa Galeliya, erivaleni lerikulu ra Esdreloni. 9A rhamba vaaki hinkwavo va le Samariya ni swimitana leswi rhendzeleke, ni hinkwavo va le hase ka nambu wa Yordani ku ya fika eYerusalema na Betaniya na Kelusi na Kadexe ni le nambyeni wa Egipta, ni le Tapanese na Ramsese, ni le tikweni hinkwaro ra Goxeni, 10hambi ku ri ku hundza eTanisi na Memfisi. A vitana ni hinkwavo lava akeke etikweni ra Egipta ku ya fika endzilekaneni wa Etiyopiya. 11Kambe vanhu hinkwavo lava akeke etindhawini leti hinkwato a va yingisanga ku lerisa ka Nebukadnetsara hosi ya Vaasiriya, va ala ku n'wi pfuna enyimpini, hikuva a va nga n'wi chavi. A va swi vona leswaku a wo va munhu ntsena; kutani varhumiwa va yena va tlherisiwa va nga khomanga nchumu, naswona va ri ni tingana.
12Kutani Nebukadnetsara a hlundzukela vanhu va tindhawu leti hinkwato, a hlambanya hi xiluvelo xa mfumo wa yena, leswaku ú ta tirihisela hakunene eka tiko hinkwaro ra Kilikiya na Damaska na Siriya, ni leswaku ú ta herisa hi banga Vamowabu, na Vaamoni, na Vayuda, na Vaegipta hinkwavo, ku suka eribuweni ra lwandle ra Mediteraniya ku ya fika ni le ka ribuwu ra Songankulu ra Vaperesi.
13Hi lembe ra vu-17 ra ku fuma ka yena, Nebukadnetsara a humesa mavuthu ya yena ku ya lwa na Aripakixada, a n'wi hlula, a hlula ni mavuthu ya Aripakixada hinkwawo, ni vagadi va yena va tihanci ni makalichi ya yena hinkwawo. 14Hi ndlela leyi, a hlasela miti ya Aripakixada, a fika ni le mutini wa Ekibatana, a teka swihondzo swa wona ni ku phanga swa le minxabyeni ya kona. Ku xonga ka muti lowu ku hundzuka tingana.#Kumbe: marhumbi 15A khoma Aripakixada etintshaveni ta Rhage, a n'wi tlhava hi matlhari ya vahloti, a herisela makumu mfumo wa Vameda. 16Kutani Nebukadnetsara a tlhelela eNinivha, yena ni mavuthu ya yena hinkwawo, ya ri masocha layo tala ngopfu; kwalaho va wisa ni ku dya nkhuvo wa masiku ya 120.
Выбрано:
Yuditi 1: TSO89
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Bible Society of South Africa 1989. Used with permission. All rights reserved.