Acts 19
19
Paul iloko Ephesus
1Keualoko la, Apollos oinoho iloko Corinth, ia Paul uhaele valoko namouna la nokae Ephesus. Paul elave nakama ekaukali Jesus kela enoho i kemakaꞌina la, 2kena ivasili aꞌe nakama la, “Keualoko okou uhakina, Keanana Kapu ekae aku okou?” Ia nakama la eme aꞌe Paul, “Seai. Makou semakino Keanana Kapu.”
3Ia kena kama la uvasili aꞌe, “Kipukipu kehaauꞌau kapu okou eme pehe?” Nakama la eme aꞌe, “Poi hea John Baptist ekakala aꞌe keonohenua la.”
4Kena Paul eme aꞌe, “John Baptist ehaauꞌau kapu keonohenua la ihuli aꞌe pela lakou ukiꞌe ikaha ma nahaisala lakou. Ia John ekakala aꞌe keonohenua la ihakina i kekama meihamai imuli aia la. Kela o Jesus.”
5Keualoko nakama Ephesus la elono nakakala nei, Paul ehaauꞌau kapu nakama la i kemale Kealiꞌi Jesus. 6Kena Paul uhapili nalima aia iluna nakama la, ia kena Keanana Kapu ukae iloko nakama la, ilavaa lakou kekakala nakakala lakou semakino, kena ihakae nakakala Keakua. 7Kela sehui ma lua nakanaka hakoa.
8Paul ehaele kahi i kehale loku na{Jiu} la koukolu namalama, ia esemakaꞌu kekakala hamakahua aꞌe na{Jiu} la nakipukipu kenoholana Keakua. 9Ia alakama na{Jiu} ehakapanaka, kena ihai aꞌe nakipukipu Kealiꞌi imua namaisu keonohenua. Ia kena Paul ukiaꞌi nakama la, kena iko nakama kaukali Jesus la nokaꞌa maia. Ia keaho ma keaho, kama la epolopolo iloko kehale Tyrannus. 10Siaoa nahekau Paul eaoaꞌo penei, kena na{Jiu} ma naGreek hakoa iloko Asia ulono nakakala Kealiꞌi.
Nakama Sceva
11Keakua ehuli aꞌe namahi aia iloko keola Paul. 12Alakama eko napamalo kela Paul ehahao la, noahu iluna nakama lavea, ikonaꞌi nakama la nokaualeꞌa, ia ihakui nakipua saꞌino la ikaha. 13Kena alakama na{Jiu} la uo hakiꞌe keonohenua, ikapa kemale Kealiꞌi Jesus ihaꞌike nohaise nakipua saꞌino ikaha ma nakama keonohenua la. Nakama la eme aꞌe nakipua saꞌino la, “Anau eme aku aꞌoe i kemale Jesus kela Paul ekaukaꞌu la, oikaha.” 14Kela koahiku nakamakane Sceva, kemaakua hamakua na{Jiu} la.
15Ia kipua saꞌino la eme aꞌe nakama la, “Anau eailoa Jesus, ia anau makino Paul hoi. Ia oai okou?”
16Kena kekama eisi nakipua saꞌino la ulee aꞌe iluna namahi aia, novuhu ma nakama la hakoa, nokaia nakama la nomele. Kena nakama la esopo nohulo ikaha ma kehale la, sehipamalo eleleu. 17Na{Jiu} ma naGreek kela enoho iloko Ephesus elono kelono nei. Kena nakama la umakaꞌu, ia uhamaha kemale Kealiꞌi Jesus. 18Komaꞌi nahakina ana la uhaꞌali aꞌe namea saꞌino kela lakou sasaꞌa kahi la. 19Nakama haipanamu la ehaꞌuku nalauniu napanamu lakou la imua keonohenua la nokuni namela hakoa. Kesui nalauniu la mekae kipulima nasimaka namoni eꞌiva. 20Kela hea nakakala Kealiꞌi la ehuli aꞌe namahi aia, kena ekauhano i kekoha.
21Kena Paul ehakaꞌoko i kehaele valoko Macedonia ma Greece ma ikae Jerusalem, kena ime aꞌe, “Anau mekae Jerusalem, kena uhaele nomaka kemakaꞌina Rome la hoi.” 22Paul ehaunalia Timothy laua ma Erastus, koꞌolua nakama heheaꞌu aia la imua, nokaꞌa i Macedonia. Ia Paul soia ehanase iloko Asia.
Nakama iloko Ephesus ehakaukau
23Saika la, keonohenua iloko Ephesus ehakaukau ma nakama kela ekaukali nakipukipu Jesus. 24Kela hekama enoho i Ephesus, kanamale Demetrius. Kama la epena pena nakamahale eꞌiva ekipu poi haleaiku hakipua Artemis, kena isusui namela noko namoni komaꞌi. 25Demetrius ehaꞌuku nakama kela epena pena nakamahale la, kena ime aꞌe nakama la, “Okou nakanaka. Okou eailoa pela kakou eko namoni komaꞌi i keheheaꞌu nei. 26Ia okou emakino pela Paul eusuusu aꞌe naonohenua iloko Ephesus ia ma namakaꞌina Asia. Kama la ekakala pela ma nakamaiku kakou epena pena la, ala seai niakua hamaoni. 27Nakama Asia lakou ma nakama kemaalama nei hakoa ehamalumalu Artemis. Ia vahonei, keonohenua kemakaꞌina nei ame amaka nosehakaꞌoko maha name kakou epena la. Kela mea hoi. Nakama la ame amaka nosehamaha haleaiku Artemis la, kena hakipua kakou la meisehananiu poi imua.”
28Keualoko keonohenua la nilono nakakala nei, nakama la uloko haeꞌo, kena ihako naleo lakou noanaa hamaloa, “Artemis hakipua Ephesus la ehananiu.” 29Saika la, kemakaꞌina la uhakaukau hakoa, kena ikaohi Gaius laua ma Aristarchus, nikama Macedonia. Maikinimea koꞌolua la ekaꞌa lakou ma Paul. Kena keonohenua la uhulo iloko malae elahi lakou la. 30Paul ehihai ikuu imua keonohenua la, nokakala aꞌe nakama la. Ia nahakina ana la epui Paul isehaele imaka hale. 31Alakama hamakua henua Asia la esoa laoi ma Paul, kena ihaunalia alakama nome aꞌe Paul isehaele valoko malae la.
32Keonohenua la evaa hakoa, ia nakama semakino hea lakou evaa. Kena komaꞌi nakama la usemakino lakou eo aꞌe noa. 33Na{Jiu} la ehaunalia hekama lakou la imua keonohenua la, kanamale Alexander, kena ime aꞌe kama la ihakonu hea keonohenua la ehai aꞌe na{Jiu} la. Kena kama la uhaiauna aꞌe keonohenua la isevaa. 34Ia keualoko nakama la eꞌike pela Alexander he{Jiu}, nakama la hakoa uhako naleo lakou noanaa hamaloa, “Artemis hakipua Ephesus la ehananiu.”
35Kena hekama hamakua kemakaꞌina la emea keonohenua la isevaa, kena ime aꞌe, “Keonohenua Ephesus. Nakama kemaalama nei hakoa eailoa pela kemakaꞌina kakou nei elolosi haleaiku Artemis, ia ilolosi hoi hakipua hananiu Artemis kela ekeiho ikaha ma kevaelani. 36Selavaa hekama i kemea pela kakala nei esehamaoni. Okou ekau pela isevaa, ia sepena namesala. 37Okou ehakosi mai nakanaka nei. Ia nakama nei sekakala saꞌino hakipua hine kakou nei, ia iseailalao namea iloko hale haleaiku la. 38Apoi Demetrius ma nakama heheaꞌu maia la ehakaꞌoko pela nakanaka nei epena namesala, nakama la ekau kekakala aꞌe nakama hamakua iloko nahale hakonu konu kakou la. 39Amea poi okou hihai ihanuu alamea hoi, kakala aꞌe nakama hamakua kemakaꞌina nei la. 40Alakama meꞌike okou ehakaukau keaho nei, kena meikakala pela kakou epena name sala. Ia kakou meselavaa kekakala hamakahua hea kakou epena, maikinimea keꞌuku nei seisi hakaꞌoko aia.”
41Keualoko kama hamakua la ekakala penei, kama la eme aꞌe keonohenua la imaseu nokaꞌa.
Выбрано:
Acts 19: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
