Acts 20
20
Paul iloko Macedonia ma Greece
1Keualoko keonohenua la uoki kehakaukau, Paul eꞌave kakala i nahakina ana la io aꞌe i aia, kena ikakala hapulupulu aꞌe nakama la. Iaoki iko Paul ihaele ikaha ma kemakaꞌina la, 2nokaꞌa valoko namakaꞌina Macedonia ihapulupulu aꞌe nahakina ana la hoi. Kama la ukae henua nakama haGreek, 3kena inoho ilaa koukolu namalama. Ia keualoko Paul uꞌamaka iuhu nohulo i Syria, na{Jiu} la epena hakaꞌoko ihakauoki lakou. Kena Paul uhakaꞌoko ivaꞌai muli valoko Macedonia. 4Nakama nei ekakaꞌa lakou ma Paul,
Sopater, kekama Pyrrhus, hekama i Berea,
Aristarchus laua ma Secundus, nikama i Thessalonica,
Gaius, hekama i Derbe,
Timothy,
ia ma Tychicus laua ma Trophimus, nikama i Asia.
5Nakama nei uo imua nokae i Troas, kena ikali mai makou. 6Kena imuli keꞌai Halaoa Manihi la, makou euhu i Philippi. Kena imuli kaulima naaho, makou ukili nakama la i Troas, kena inoho i kemakaꞌina la ehiku naaho.
Kemaka haoki Paul i Troas
7Keaho kela kapu, makou ekili hakoa keꞌai kapu la. Kena Paul ukaukaꞌu nokae ilakonu kepo, maikinimea kaiao aia meihaele. 8Makou uꞌuku iloko puikana iluna la, ia komaꞌi naahi hakua ehamasina keꞌina la. 9Kela hekaupeala enoho konu iloko kama kokoꞌa iluna la, kanamale Eutychus. Paul ekauhano kekakala. Ia kena Eutychus uhimoe haeꞌo, kena usina nokeiho ilalo nomake. 10Ia Paul uhaele ilalo nokoukuli isulu valuna Eutychus nokaohi kinokama kama la, kena ime aꞌe nakama la, “Okou semakaꞌu, kama nei uola.” 11Kena Paul uꞌae muli iluna, noko lakou keꞌai kapu la, kena ikaukaꞌu nokae keulu keaka. Kena kama la uhaele. 12Nakama la uhihia lo, maikinimea kaupeala la uola. Kena nakama la ehakaꞌi kama la i hale lakou la.
Paul uuhu i Troas ihaele nokae i Miletus
13Makou uuhu i kevaꞌa nohulo i Assos, keꞌina Paul eme mai makou ikili aia, maikinimea kama la hihai ihaele vauka ikae ilaa. 14Keualoko kama la nikili makou i Assos, makou eko kama la nohaꞌae iluna kevaꞌa, kena ihulo nokae i Mitylene. 15Kena kela aho, makou uhulo nokapili Kios. Kena kela aho makou ukae i Samos. Kena kela aho imuli, makou uhulo nokae i Miletus. 16Paul nahakaꞌoko avale pela aia ihaele halaꞌa i Ephesus, maikinimea aia sehihai inoho iloko Asia. Apoi evave aia hihai ikae i Jerusalem imua keaho Pentecost.
Paul ekakala hakaualeꞌa nakama hamakua keloku i Ephesus
17Paul eꞌave nakakala i nakama hamakua keloku i Ephesus io aꞌe Miletus nomaka aia. 18Keualoko nakama la ukae aꞌe kemakaꞌina la, Paul eme aꞌe nakama la, “Keualoko anau nikae mai Asia, anau enoho kahi ma okou. Ia kena okou eailoa laoi nakipukipu keola anau. 19Niaina anau ehalono lihu i nahakaꞌoko saꞌino na{Jiu} la, anau eheheaꞌu pasemuu ma Kealiꞌi. Ia anau esali naleimaka anau. 20Keualoko anau eaoaꞌo aku okou imua keonohenua, ia iloko nahale okou la, anau ekaukaꞌu ikonaꞌi okou. Ia anau sehimea ekaohi imuli seme aku okou. 21Anau ekakala aꞌe na{Jiu} ma naGreek la ikiꞌe ikaha ma nahaisala lakou, kena uhakina ia Jesus, Kealiꞌi kakou la.
22“Ia vahonei, Keanana Kapu ehakaꞌi anau ihaele i Jerusalem. Ia anau semakino hea meiapihi mai anau ilaa. 23Keanana Kapu ekakala mai anau iloko namakaꞌina hakoa, pela anau meipono kia iloko kelokapu nohalono lihu. 24Ia anau sehakekele keola anau sonau. Anau hihai ihaoki naheheaꞌu kela Jesus niau mai la. Ikakala aꞌe naonohenua kelono kaualeꞌa pela Keakua ehihai ilolosi hakaualeꞌa lakou.
25“Anau ehamai ikaukaꞌu aku okou nakipukipu kenoholana Keakua. Ia anau eailoa pela okou meiselavaa keꞌike muli anau hoi. 26Kena keaho nei, anau eme aku okou. Amea hekama okou elano, kena seai hesala anau. 27Anau sehiualoko ekeiho pela isekakala aku i okou namea Keakua ehihai okou iailoa. 28Keakua ehaunalia iho kanakama nomake, ia kanakoko ekonaꞌi kakou ime mo kama aia. Kena Keanana Kapu ekini okou ilolosi nahakina ana la. Kena lolosi hamakonu soꞌokou ia ma nahakina ana Keakua la hakoa.
29“Anau makino kemenei. Imuli anau mehaele, alakama mekae aku poi nimanu leikama noseu nahakina ana la. 30Ia nikama okou hoi ame kakala namesala, ihakaꞌi nahakina ana la ikaukali lakou. 31Kena lolosi hamakonu, ia manaku keaoaꞌo anau nei. Keaho ma kepo iloko koukolu nahekau, anau epolopolo aku okou, ia sali naleimaka anau.
32“Anau ekuꞌu okou i nalima Keakua. Nakakala aia la meilolosi hakaualeꞌa okou, ikuu mau naola okou, kena ihakea naola okou iau aku okou nakuhana nakama ekonu kahi la. 33Keualoko anau enoho ma okou, anau semanaꞌo namoni ia ma naheheaꞌu kaualeꞌa okou la. 34Okou emakino pela anau eheheaꞌu sonau noko hea anau ehihai la, ia eheheaꞌu hoi iko hea nakama enoho manau la ehihai. 35Anau eheheaꞌu ihuli aku i okou pela kakou ikau keheheaꞌu ikonaꞌi nakama kela ekino kahi la. Manaku nakakala Kealiꞌi Jesus, ‘Nakama kela ehoꞌi namea lakou i alakama mehihia. Elaꞌa ma nakama kela eko kahi namela.’ ”
36Paul eme aꞌe nakakala nei, kena ikoukuli ilalo ma nakama la hakoa, kena iloku. 37Nakama la ekani naaloha lakou, kena ipulu kinokama Paul, kena ivaisoni lakou. 38Nakama la ekipuaina maikinimea Paul eme aꞌe nakama la pela lakou ameseꞌike aia hoi. Kena iko nakama la io nohaꞌae Paul i kevaꞌa.
Выбрано:
Acts 20: ojv
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 1999, Wycliffe Bible Translators, Inc. All rights reserved.
