路加福音 18
18
寡婦及判官的譬喻
1耶穌閣對門徒講一個譬喻，教示𪜶著常常祈禱，毋通灰心。 2伊講：「某一個城有一個判官，伊無敬畏上帝，嘛無尊重人。 3佇彼個城有一個寡婦一直來尋伊，講：『我有一個訴訟的對頭，請你替我主持公道。』 4此個判官真久攏毋答應，後來伊家己想講：『我雖然毋驚上帝，嘛無尊重人， 5毋拘因為此個寡婦一直來給我吵，我欲替伊主持公道，才免伊一直來膏膏纏#18.5 「才免伊一直來膏膏纏」嘛通譯做「才免我的名聲受損害」。。』」
6主閣講：「恁著聽此個不義的判官所講的話！ 7上帝所揀選的人暝日對伊哀求，伊豈𣍐替𪜶主持公道？伊豈會拖延真久？ 8我給恁講，伊真緊就會替𪜶主持公道。總是，人子來臨的時，伊佇地上豈會看著此款的信心？」
法利賽派的人及貿稅的
9耶穌對許個看家己做義人閣看輕別人的人有講此個譬喻： 10「有兩個人上聖殿祈禱；一個是法利賽派的人，另外一個是貿稅的。 11法利賽人徛挺挺家己祈禱講：『上帝啊，我感謝你，因為我無親像其他的人恐嚇取財，不義，淫亂，嘛無親像此個貿稅的。 12我一禮拜禁食兩遍，閣奉獻全部收入的十分一。』 13毋拘彼個貿稅的徛佇遠遠的所在，連攑頭起來看天都毋敢，只有搥胸講：『上帝啊，憐憫我此個有罪的人！』 14我給恁講，罪得著赦免轉去𪜶兜的是此個人，毋是彼個法利賽人；因為提高家己的，會受降低；屈低家己的，會受提高。」
耶穌祝福囝仔
(太 19.13-15；可 10.13-16)
15有人連嬰仔嘛抱來耶穌遐，欲互伊按手祝福；門徒看著就給𪜶責備。 16毋拘耶穌叫𪜶來，講：「互囝仔來我遮，毋通給𪜶阻擋，因為上帝國是此款人的。 17我實在給恁講，人若無親像囝仔按呢接受上帝國，絕對𣍐當入去。」
好額的領導者來見耶穌
(太 19.16-30；可 10.17-31)
18有一個猶太人的領導者來問耶穌講：「好的老師，我著做什麼才會當承受永遠的活命？」
19耶穌給伊講：「你哪會講我是好？上帝以外，無一個是好。 20諸個誡命你攏識：『毋通姦淫；毋通害死人；毋通偷提；毋通作偽證；著孝敬父母。』」
21彼個人講：「諸個誡命我對細漢就一直有啲遵守。」
22耶穌聽著諸個話，就給伊講：「你猶欠一項。去賣所有的，得著的錢攏分互散赤人，你佇天頂就有財寶，然後來隨我。」 23彼個人一下聽著諸個話，真傷心，因為伊非常好額。
24耶穌看彼個人就講：「有錢人入上帝國偌仔呢困難！ 25駱駝穿過針鼻嘛比好額人入上帝國閣較簡單！」
26聽著諸個話的人問伊講：「若按呢，什麼人會當得著救？」
27耶穌應講：「人做𣍐到的，上帝攏會。」
28 彼得講：「阮已經放拺阮所有的來隨你啦。」
29耶穌給𪜶講：「我實在給恁講，人若為著上帝國放拺厝宅、某、兄弟、父母抑是子兒， 30佇今世一定會得著閣較多，佇來世得著永遠的活命。」
耶穌第三遍預告伊的死及閣活
(太 20.17-19；可 10.32-34)
31耶穌導十二使徒去邊仔，給𪜶講：「今咱欲上耶路撒冷，先知所記載關係人子的一切攏會應驗。 32伊會受出賣互外邦人；𪜶會給伊戲弄，侮辱，呸涎。 33𪜶會用鞭給伊拍，給伊害死，第三日伊會閣活。」 34毋拘使徒對諸個代誌攏無了解；諸個話的意思有對𪜶蓋啲，𪜶毋知耶穌啲講什麼。
耶穌醫好失明求乞的
(太 20.29-34；可 10.46-52)
35耶穌啲欲到耶利哥的時，有一個盲人坐佇路邊啲求乞。 36伊聽著群眾對遐經過，就問人看是什麼代誌。
37𪜶給伊講：「拿撒勒人耶穌啲欲對遮經過。」
38伊就大聲喝：「大闢的子耶穌，憐憫我！」
39佇頭前啲行的人給伊責備，叫伊恬恬，毋拘伊愈大聲喝：「大闢的子，憐憫我！」
40耶穌就停腳，叫人導伊來。伊倚來的時，耶穌問伊講： 41「你愛我給你做什麼？」
伊講：「主啊，我愛閣看見！」
42耶穌給伊講：「好，互你閣看見！你的信心互你得著醫好！」
43伊隨時閣會看見，就隨耶穌，歸榮光互上帝。眾人看著此個代誌，攏稱讚上帝。
Выбрано:
路加福音 18: TTVH
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society in Taiwan, 2021
