路加福音 17
17
罪、信心、服事
(太 17.20；18.6-7, 21-22；可 9.42)
1耶穌閣對伊的門徒講：「引起人犯罪的事一定有，不過造成此個事的人慘啊！ 2寧可用大石磨給伊吊佇頷頸㧒落海，嘛毋通互微細的一個跋倒犯罪。 3恁家己嘛著謹慎！
「你的兄弟抑是姊妹若犯罪，著給伊責備，伊若悔改，著給伊赦免。 4若有人一日得罪你七遍，七遍攏越倒轉來給你講『我悔改啦』，你嘛攏著給伊赦免。」
5使徒對主講：「求你加添阮的信心！」
6主講：「恁若有親像芥菜籽赫大的信心，給此欉桑材樹講『連根拔起來，去栽佇海裡』，彼欉樹嘛會服從恁。
7「恁中間豈有什麼人，伊的僕人去作園抑是飼羊，對園裡轉來的時，會給僕人講『趕緊坐落來食飯』？ 8伊豈𣍐給伊講『給我準備暗頓；縖圍裙來侍候我食飯，後來你才食才飲』？ 9僕人做主人所吩咐的代誌，主人豈著給伊說謝？ 10恁嘛是按呢，恁做受交代的代誌了後，著講『阮是無路用的僕人，阮不過盡本分做若定』。」
醫好十個痲瘋病人
11耶穌去耶路撒冷的路中，經過撒馬利亞及加利利的交界。 12伊入去一個庄社的時抵著十個痲瘋病人。𪜶徛佇遠遠的所在， 13大聲喝：「耶穌老師啊，憐憫阮！」
14耶穌一下看著，就給𪜶講：「恁去互祭司檢查！」
𪜶佇路中，就得著清氣。 15其中有一個看著家己的病已經好，就倒轉來大聲謳咾上帝， 16仆佇耶穌的腳前，給伊感謝。此個是撒馬利亞人。 17耶穌問講：「豈毋是有十個人得著醫好？猶彼九個佇叨位？ 18此個外族的人以外豈無人轉來感謝上帝？」 19耶穌就給彼個人講：「起來，轉去。你的信心有救你。」
上帝國的來臨
(太 24.23-28, 37-41)
20有一遍，一寡法利賽派的人問耶穌，上帝國什麼時會來臨。耶穌應講：「上帝國的來臨毋是人看會出來， 21嘛無人會當講『你看，佇遐』，抑是講『你看，佇遮』，因為上帝國是佇恁中間。」
22耶穌就對伊的門徒講：「日子啲欲到，恁想欲看人子來臨的日子，連一日嘛看𣍐著。 23有人會給恁講『你看，佇遐』，抑是講『你看，佇遮』。毋通出去，嘛毋通隨𪜶去。 24熠爁對天此旁熠，照到天彼旁，人子佇彼日嘛會親像按呢來臨。 25不過，伊一定著先受真多苦難，閣互此世代的人拒絕。 26人子來臨的日子會及挪亞的時仝款； 27彼時人照常飲食嫁娶，一直到挪亞入去大船彼日。大水到，給𪜶攏消滅。 28彼日嘛及羅得的日子仝款，人照常飲食，買賣，種作，起厝， 29毋拘羅得對所多瑪出去彼日，對天有落火及硫磺，給𪜶攏消滅。 30人子顯現的日嘛會親像按呢。
31「彼日，佇厝頂的，毋通落來提厝內的物件；佇園裡的，嘛毋通倒轉去。 32著會記得羅得的某所抵著的代誌！ 33所有想欲保存家己性命的，會喪失性命；所有喪失家己的性命的，會得著性命。 34我給恁講，佇彼暗，有兩個人睏仝一頂眠床，一個會受導去，另外一個會留啲。 35有兩個婦仁人做夥啲挨石磨，一個受導去，一個留啲。 36有兩個人佇園裡，一個受接去，一個留啲。」#17.36 有的抄本無 36 節。
37門徒問耶穌講：「主啊，會佇叨位發生？」
耶穌給𪜶講：「屍體佇叨位，禿頭鷹攏會擒倚去遐。」
Выбрано:
路加福音 17: TTVH
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society in Taiwan, 2021
