Met 25
25
Awu Abraham
(1 Minkte 1:32-33; Met 35:28-29; 49:29-33)
1Abraham a nga beta lu'u minga mfe jôé na Ketura. 2A nga biaé nye bobefam ana: Zimran, Yôksan, Medan, Madian, Yisebak a Kua. 3Yôksan a nga biaé Saba a Dedan. Bengone be Dedan be mbe Beakurim. Beletusim a Beleumim. 4Bone be Madian be mbe: Efa, Efer, Hénok, Abida a Elda: Bobefam be Ketura e mbe le bese.
5Abraham a nga ve Izak e biôme bise bi mbe émbié. 6E mfa'a bone bibone bié a nga fa'é be biôm wôna valé a ngenan a vee, a nga lôme be ôyap a mone wé Izak, e mfa'a jôbe da tôô, e si ya jôp da tôô.
7E nté ényiñ Abraham ô mbe mimbu 175. 8Wôna Abraham a nga wu. A nga wu mvuse meva'a éto nnôm, abui mimbu, melu njalane nyô ne lut, a a nga jambe e vôme bimvame bié bi nga wu bi nga jambe. 9Izak a Ismaél e bobefame bé be nga jame nye mbas akok e Makpéla, afup Efroñ, mone Sôhar, mone Hitit, zo'one Mamré. 10E mbe afup Abraham a nga Kus e be Behitit. E nne Abraham a minga wé Sara be nga jambe valé. 11E mvus awu Abraham, Zambe a nga botan Izak, e monafame wé, e nye a mbe a too bebé anjeñe Lahayi-Rôyi.
Nkañete Ismaél a *nda bôte jé
(1 Minkte 1:28-31; Met 17:20; 21:17-21)
12E mvoñe bôt Ismaél, e mon Abraham e nye Agar ngone y'Ejipte, mbo ésaé minga Sara, a nga biaé Abraham, e nje nyô. 13Bobefam be Ismaél ô laté a jôé memvoñ me bôte map e mbe ba: Nebayôt, ntôle mone Ismaél, Kédar, Adbeél, Mibsam, 14Mikma, Duma, Masa, 15Hadad, Téma, Yetur, Nafik a Kedma. Bobefam be Ismaél mbe le; 16môé mabe le a minkane miap a minlame miap. Bejôô awôm a bebaé be mbe minlô ya meyoñe map. 17Ismaél a nga nyiñe mimbu 137. A nga suu mvebe a wu, a a nga ke fulan a bimvame bié bi nga wu. 18Beismaélit be nga tabe ataté Havila a kui Sur, e Asiri. Ismaél a nga tabe bobenyañe bé bese yat.
Nkañete Izak a *nda bôte jé
(Rm 9:10-13; Met 38:27-30; Hé 12:16-17)
19Mvoñe bôt Izak, mon Abraham, nje nyô: Abraham a nga biaé Izak. 20Izak a mbe mimbu 40 éyoñ a nga lu'u Rebeka, ngone Betuél, mone Aramééñ ya Padañ-Aram a kale Laban, mone Aramééñ. 21Izak a nga ye'elane Nti na a mvamane minga wé amu a mbe nkôkôm, a Nti a nga wô'ô meye'elane mé. Minga wé Rebeka a nga nyoñ abum. 22Bon be mbe be jimba'an abume dé été, a a nga jô na: Jé ja kui be ma? Ane a nga ke yemelan nkômbane Nti 23Nti a nga jô nye na:
Meyoñ mebaé me ne wo abum,
mvoñ bôt ébaé ja ye kandan éyoñe ja ye vame wo abum
mvoñe bôte jia y'été ja ye bo ngu a dañe nyô fok
ntôl wo ye ke éjôé nyô a ne mongô si.
24Eyoñ a mbeme biaé be nga yene na mimbiase mibaé mi ne nye abum. 25Nyô ôsu a nga vam nyôl ése é too nye e zañ évele a mfôl, é funa'ane alô'ô mimvot; ane be nga yôlé nye jôé na Esô. 26Mvus éte, monyañ a nga vam, wo wé ô bili étimekili Esô; a be nga yôlé nye na Yakob. Izak a mbe mimbu mewôm mesaman éyoñe be nga bialé.
27Bobefame bete be nga yaé. Esô a mbe ñyeme nsôm, môta mefan; ve Yakob a mbe môt a too ne séé, a mbe a nyeke'e a too e menda bindelé si. 28Izak a mbe a nyeke'e Esô, amu a mbe a nyeke'e a di tit; a Rebeka a mbe a nyeke'e Yakob.
29Môs éziñ Yakob a mbe a yamek étutu'a, Esô ve so nsôm, ate'e nyôl ne botok. 30Esô nye Yakob na: Jôké'é ma, ma ye'elane wo, na me di ngabe ya évele jôme te, amu ma wô'ô ate'e nyô. Ajô te be nga yôlé Esô jôé na Edom. 31Yakob nye na: Ku'ane ma môse wu éto ntôl. 32Esô a nga yalane na: Ma nyô me nga ye wu, éto ntôl te ja volô ma jé' 33Ane Yakob a nga jô na: Taté'é kane me ngana. E nde a nga kane nye ngana a kuan éto ntôle jé be Yakob. 34Eyoñe te Yakob a nga ve Esô belet a étutu'a kôôn. A nga di a nyu, mvus éte a nga kôlô si a ke. Avale te nde Esô a nga biasé éto ntôl.
Выбрано:
Met 25: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
