Met 24
24
Alu'u Izak
(Met 28:1-10; 29:1-2)
1Valé Abraham a ntoo nnôm, tañe mimbu jé abui, a Nti a nga botane nye mimfa'a mise. 2Abraham a nga jô mbo ésaé wé, nyô a dañeya saane nye ayap e *nda je été, e nye fe a mbe a jô'ô biôme bié bise na: Wo ye some akule wo dôé *abé dame si, 3a ma ye bo na ô kane ngana a jôé Nti, Zambe ya yôp a Zambe ya si na: Ô bo te nyoñe minga a so bengone Bekananééñ me too été asu monafame wom. 4Ve wo ye ke e si jam, e tin abialé jam a nyoñe minga asu monafame wom Izak. 5Mbo ésaé a nga yalane na: Ndô'ôtô minga a ye bo te kômbô zu bia nye e si bi too nyô; ye ma yiane kee monafame wôé e si ô nga kôlô' 6Abraham a nga yalane nye na: Tabe'e ntyele ya beta kee me mone wé! 7Nti, Zambe ya yôp, nyô a nga bo na me kôlô *nda bôte jam, e tin abialé, nyô a nga kobô ma a kane ngana na a ye ve mvoñe bôte jame *si nyô, émien a ye lôm éngele ôsu viôé: a e wé nye wo ye nyoñe minga asu monafame wom. 8Nge minga a nji kômbô tôñe wo, wo ye tabe fili mfa'a ngana ma bo wo na ô kan. Ve da na wo ye bo te kee ma mone wé. 9Ane mbo ésaé a nga some wo *abé Abraham, masa wé si, a kane nye ngana ajô jame te. 10Mbo ésaé a nga nyoñe bekamel awôm e bekamel be masa wé a ke, a bili akume masa wé ese. 11A nga kôlô si, a ke e Mézôpôtami, e tisone Nakor. A nga bo na bekamel be kute meboñe si e tison atan, bebé a anjeñe mendim, mamengô'é, éyoñe binga ba kui atan a ke labe mendim.
12Wôna a nga jô na: A Nti, e Zambe masa wom Abraham, ma ye'elane wo na: Bo'o me na, e môse wu, me tôbane jôme ma jeñ, a liti'i masa wom Abraham *mvam! 13Ma nyô me tele bebé anjeñe mendim, a bobebinga be bôte ya tison be nga kui atane na be labe mendim. 14E ngone minga ma ye jô na: Lu'i e nde'e mendime jôé, ma ye'elane wo, me nyu, nye ke ve yalane na: Nya'ak, ma ye fe ve bekamel bôé na be nyu, ngone minga éte é bo'o nyô ô tobeya asu masa wom Izak! Nalé ate ma ye yeme na wo liti masa wome *mvam.
15A ngenane te suu nkobô e teme na Rebeka a kuu, nde'e ékon étuu, ngone Betuél, ndaé Milka baa Nakor, monyañ Abraham. 16A mbe étua abeñe ngone minga. A mbe éndun, fam éziñ é ngenane te nye yem. A nga sis anjeñ, a jalé nde'e ékone jé mendim a beta bet. 17Mbo ésaé a nga mate mbil a ke tôbane nye a jô na: Ma ye'elane wo na: Va'a ma abime mendim éziñe ya nde'e jôé. 18A nga yalane na: Nya'ak a monti! A nga ji'a luui nde'e jé a ve nye mendime ya nyu. 19Eyoñ a maneya ve nye mendime ya nyu, a nga jô na: Ma ye lap asu bekamel bôé, akekui be nyuya abime da yian. 20A nga bo avôle ya sôé mendime ya nde'e jé mese e vôme biyem bia nyu, ve mate mbil asu ya beta lap anjeñ, a nga labe mendim asu bekamel bese. 21Mbo ésaé a mbe a sili'i émiene minsili évôl été ajô Rebeka, asu ya yem nge yaa nge momo na Nti a mbe a bo'o na dulu dé e wulu *mvo'é.
22Eyoñe bekamel be nga mane nyu, môt ate (mbo ésaé Abraham) a nga nyoñ élondo or, adit étune sikel, a mekome mebaé, adit besikel be or awôm, asu mo mé. 23Nye na: Ô ne e ngone za? Kate ma de, ma ye'elane wo? Ye vôme ya bômbô e *nda ésoo a ne yené asu dangan ane bi ne lôt alu' 24A nga yalane na: Me ne e ngone Betuél, e monafame Milka a nga biaé Nakor. 25A nga beta jô na: Bidi biyem bi ne abui e *nda jangan, afôla ya bômbô e ne fe. 26Eyoñe te môt ate a nga kumbu a kute fe meboñe si asu Nti, 27nye na: Akéva e be Nti, e Zambe masa wom Abraham, nyô a nji jô'é nlitane mvame jé a zôsôôô wé e be masa wom! Nti a wuluya ma a kui e ndaa bobenyañe be Masa wom. 28Ngone minga é nga mate mbile ya ke kañete nyia wé mam mete mese. 29Rebeka a nga bili ndôm jôé na Laban. Laban a nga kui atane mbil e mfa'a môt a mbe, bebé a anjeñ. 30A nga yen élondo a mekom e mo me kale jé a wô'ô fe mame kale jé Rebeka é mbe é jô'ô na:
Avale di e nde môt ate a te kobô ma. A nga zu be môt a mbe a tele fefele bekamel, e mfa'a anjeñe mendim. 31A nga jô nye na: Za'ak e wo ô bili ébotane Nti. Amu jé ô tele atan? Me maneya kôme *nda a afôla asu bekamel. 32Môt a nga nyiine *nda. Laban a nga bo na be vaa bekamel mimbe'e a ve be bidi biyem a mendim asu ya sôbe nneñe mebo a bôte baa be be be mbe nsamba. 33Wôna be nga telé bidi ôsu vié. Ve a nga jô na: Maa ye ke di te na me jô e jam me bili na ma jô. Laban nye na: Kobô'ô!
34Ane a nga jô na: Me ne e mbo ésaé Abraham. 35Nti a botaneya masa wom étua abui, a ntoo éwôlô môt. A veya nye moné a beta mbame biyem, argent a or, bebo bisaé befam a ba be binga, bekamel a bijakas. 36Sara, e minga masa wom, e nnôme wé été, a biaéya masa wome monafam: a veya monafam ate e biôme bié bise. 37Masa wom a nga bo me na me kane ngana a jô'ô me na: Wo ye bo te nyoñe monafame wome minga e be bengone Bekananééñ ya si me too; 38ve wo ye ke *nda bôte jam, ayoñe dam a nyoñe minga asu monafame wom. 39Me nga jô masa wome na: Ndô'ôtô na minga a ye bo te tôñe ma. 40A nga yalane me na: Nti, nyô me nga wulu ôsu vié, a ye lôm éngele wé mia nye mi wulu a a ye bo na dulu dôé e lôte *mvo'é: wo ye nyoñe monafame wome minga e *nda bôt a ayoñe dam. 41Wo ye bo fili mfa'a ya ngana ma yemete wo, éyoñ ô kuiya ayoñe dam; nge da kui na ba bo te ve wo ngone minga, wo ye tabe fili mfa'a ngana ma yemete wo. 42Den ma te kui anjeñ a ma te jô na: A Nti, e Zambe masa wom Abraham, nge wo kañese bo na dulu me tele é lôte *mvo'é, 43ma nyô me tele bebé anjeñe mendim, e bo'o na ngone minga ja ye zu laé mendim, a nje ma ye jô na: Ma ye'elane wo na va'a ma abe mendime ya nyu e nde'e jôé, 44je ke é yalane na: Womiene nya'ak, ma ye fe lap asu bekamel bôé! Ngone minga éte é bo'o minga Nti a tobeya asu monafame masa wom! 45Te na me mane kobô e nleme wom été, e teme na Rebeka a nga zu, nde'e mendime jé étuu; a sise anjeñ a labe mendim. Ma te jô nye na: Ma ye'elane wo na: Va'a ma mendime ya nyu. 46E nde a te ji'a viti nde'e mendim a be a be'e a jô na: Nya'ak, ma ye fe ve bekamel bôé be nyu! Ma te nyu, wôna a te fe ve bekamel na be nyu. 47Ma te sili nye na: Ô ne ngone za? Nye na: Me ne ngone Betuél ndaé Nakor baa Milka. Ma te jalé nye ôdôk e jôé a mekome mo. 48Wôna ma te vitibi a kute meboñe si asu Nti a ma te ve Nti akéva e Zambe Masa wom Abraham e nyô a te wulu ma zôsôôô na me nyoñe ngone monyañe Masa wom asu monafame wé. 49Eyoñe ji, nge wo kômbô liti *mvam a zôsôôô e be masa wom, katane ma de; nge momo, katane ma de, a ma ye bulane mbo nnôm, nge mbo ngal.
50Laban a Betuél be nga yalane na: Jame di da so be Nti, bi se nguleya jô wo jam éziñ é too yaa nge momo. 51Rebeka le a ne wo ôsu; nyoñe nye a kelek, a a bo'ok e minga monafame masa wôé, avale Nti a jôya.
52Eyoñe mbo ésaé Abraham a nga wô'ô Nkobô wop, a nga kute meboñe si asu Nti. 53Mbo ésaé ate a nga kuli biôme bi argent, biôme bi or a mengômesan, a ve bie Rebeka; a nga ve fe ndôm a nyia wé biôm akap. 54Mvus éte, nye a bôte be mbe nsamba wé be nga di a nyu a lôt alu. Mametyé, éyoñe be kôlôya si, mbo ésaé a nga jô na: Jôka'ane ma me bulane be Masa wom. 55Ndôm a nyia Rebeka be nga jô na: Esoé ngone minga é beta'a tabe a bia ôbe nté, melu awôm; mvus éte, wo ye bo nguleya ke. 56A nga yalane be na: Te jañelane ma éyoñ, amu Nti a boya na dulu dam é lôte *mvo'é. Jôka'ane ma na me bulan a ke be Masa wom. 57Be nga yalane na: E nlo'one ésoé ngone minga, nsila'an émien. 58Be nga loone Rebeka a jô nye na: Ye wo kômbô ke a e môte nyô? Nye na: Yaa.
59Be nga suu na kale jabe Rebeka, nyia ntoñe wé be ke baa be mbo ésaé Abraham a bôte béé. 60Be nga botane Rebeka a jô nye na:
Wo, kale jangan,
bo'o nyia betoyini teke alañé!
Mvoñe bôte jôé é vamba'ane *mbé besiñe bé!
61Rebeka a nga kôlô si a bebo bisaé be binga bé; be nga dañ e bekamel a tôñe môt ate. Mbo ésaé Abraham a nga nyoñe Rebeka a ke.
62A koone na Izak a soya anjeñe Lahayi Rôyi a a mbe a too Négéb. 63Ngô'é éziñ Izak a too nkuane ya ke a fase mam afan, abete a bete mis, a nga yene bekamel be za'ak. 64Rebéka fe a nga bete mis a yen Izak, ve yôô a tebe si kamel 65a jô mbo ésaé na: Môte *mbé a ne afan a za'a tôbane bia' 66Mbo ésaé nye na: Masa le. Ane a nga nyoñ éyañese jé a buti asu. Mbo ésaé a nga kañete Izak mam mese a nga bo. 67Izak a nga kee Rebéka e *nda éndelé nyia wé Sara. A nga nyoñe Rebéka a bo minga wé, a nga nye'e nye. Nalé ate Izak a nga volôbane *nlem éyoñ a maneya dimili nyia wé.
Выбрано:
Met 24: BDCB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible en langue Bulu © L'Alliance Biblique du Cameroun, 2007, 2015.
