Marko 8

Yesu waliska vyakurgha ŵanthu vikwi vinayi (4,000)

(Mateyu 15.32-39)

1Mu mazuŵa ghenigha, pakuŵapo so mzinda ukuru, ndi pakuŵavi iwo kanthu kakurgha, Yesu wanguŵadana ŵasambizi ŵake, wanguti kwaku wo, 2“Ndendi lisungu pa mzinda wo, pakuti sono ŵatandara nane mazuŵa ghatatu, ndipo kuti ŵargha kanthu cha: 3ndipo asani ndiŵatumenge waka kuruta kwawo ŵanja, ŵafwenge msara mu nthowa; pakuti ŵanyake ŵaku wo ŵatuwa kutari.” 4Ndipo ŵangumwamuka ŵasambizi ŵake, “Yumoza wangaziŵa uli kuŵagutiska ndi kurgha panu pa bozwa?” 5Ndipo wanguŵafumba, “Mwe navyo viŵande viringa?” Wanguti iwo, “Vinkhonde ndi viŵi.” 6Ndipo wangulanguliya mzinda wo kuteka pasi: wanguto viŵande vinkhonde ndi viŵi vyo, ndipo wati wawonga wangumenya, wapaskanga ku ŵasambizi ŵake, kuti ŵaŵapaske: ndipo ŵangupereka kumzinda wo. 7Ndipo ŵenga natu tusomba tumanavi: ndipo wati watumbika wangulangula kuŵapaska twenito natu. 8Ndipo ŵangurgha ndi kuguta: ndipo ŵanguyora vitete vinkhonde ndi viŵi vya marivuvu ghakujapo. 9Kweni wenga ŵanthu akhumba vikwi vinayi: ndipo wanguŵatuzga ŵarutenge. 10Ndipo sosonukweni wati wakwera mu ngaraŵa pamoza ndi ŵasambizi ŵake, ŵangufika mu vigaŵa vya Dalmanuta.

ŴaFarisi ŵafumba chisimikizgu

(Mateyu 16.1-4)

11Ndipo ŵanguza ŵaFarisi, wangwamba kufumbana nayo, ŵakulembe kwaku iyo chisimikizgu chakutuwiya kuchanya, pakumwesa. 12Wakutamantha ukongwa mu mzimu wake, watiti, “Mgonezi uno upenjiyanji chisimikizgu? Nadidi ndinene imwe, kuti chipaskikenge chisimikizgu ku mgonezi uno cha.” 13Ndipo wanguŵaleka, wangukwera so mu ngaraŵa, wanguruta kusirgha linyake.

Mtupu wa ŵaFarisi ndi Herode

(Mateyu 16.5-12)

14Ndipo ŵanguruwa kupinga viŵande, vinandi, ŵenga ndi chiŵande chimoza pe mu ngaraŵa. 15Ndipo wanguŵalanguliya wakuti, “Cheŵani ndi mtupu wa ŵaFarisi ndi mtupu waku Jerode.” 16Ndipo ŵakambirananga, ŵakuti, “Tirive viŵande!” 17Yesu pakuziŵa watiti kwaku wo, “Mukambirananji, chifukwa mulive chiŵande? Ndasono asi muteska, chingana nkhuwamo? Kumbi mwe ndi mtima unononu viyo? 18Wakuŵa ndi maso, kweni kuti mulereska cha? Wakuŵa ndi makutu, kweni kuti mutuvwa cha? Ndipo asi mukumbuka? 19Penipo ndingumenya viŵande vinkhonde mu vikwi vinkhonde, munguyora sokora ziringa za marivuvu?” Wamunene, “Chumi ndi ziŵi.” 20“Ndipo ndi viŵande vinkhonde ndi viŵi vyo mu vikwi vinayi munguyora vitete vilinga vya malivuvu?” Wamunene, “Vinkhonde ndi viŵi.” 21Ndipo wanguti kwaku yo, “Asi mundawemo ndasono?”

Kuchizgika kwa wachiburumutiya

22Wanguza ku Betesaida. Ndipo wangumtole wachiburumutiya wangumuŵeyere kuti wamukwaske. 23Ndipo wati wamko wachiburumutiya yo pa janja, wangumrongozge kubwaro ku muzi; ndipo wati wafunyiya mata pa maso ghake, ndi kuŵikapo pake manja ghake, wangumfumba, “Kumbi uwona kanthu?” 24Ndipo wati wayinuska maso, wanguti, “Ndiwona ŵanthu, ndituŵaona uli ndi miti ŵakwendayenda.” 25Sono wanguŵikapo so manja pa maso ghake; ndipo wangulereska umamphavi, wanguchizgika, ndi wawonanga ukweru wose. 26Ndipo wangumtuma ku nyumba yake, wakuti, “Chingana ndi mu muzi ungaseremu cha.”

Petro wasimika kuti Yesu ndi Kristu

(Mateyu 16.13-20; Luka 9.18-21)

27Ndipo wanguruta Yesu, ndi ŵasambizi ŵake, mu mizi yaku Kaisarea Filipi: ndipo mu nthowa wanguŵafumba ŵasambizi ŵake, wakuti kwaku wo, “Wanthu ŵatiti ine ndine yani?” 28Ndipo ŵangumnene, ŵanguti, “Yohane Mbatizi yo: ndi ŵanyake, Eliya; ŵanyake, yumoza wa ŵamchimi.” 29Ndipo wanguŵafumba, kweni nanga imwe mutiti, “Ine ndine yani?” Petro watamuka, watiti kwaku iyo, “Imwe ndimwe Kristu.” 30Ndipo wanguŵalanguliya kuti ŵangachinene yumoza cha vya paku iyo.

Yesu wakamba ndi kukomwa kwake ndi nyifwa yake

(Mateyu 16.21-28; Luka 9.22-27)

31Ndipo wangwamba kuŵasambizga, kuti kutenere Mwana wa munthu kuvwiyapo vinandi, ndi kukanika ndi ŵara, ŵazukuru ŵara ndi ŵalembi, ndi kubayika, ndipo pavuli pa mazuŵa ghatatu kuyuka. 32Ndipo warongoronga ivi pakweru. Sono Petro wangumto ndi wangwamba kumususka. 33Kweni iyo wangung'anamuka, ndi wakuwona ŵasambizi ŵake, wangumuchenya Petro, wanguti, “Kanga kuvuli kwangu, Satana; chifukwa kuti usuŵiriya vyaku Chiuta cha, kweni vya ŵanthu.”

34Ndipo wangudana mzindawo pamoza ndi ŵasambizi ŵake, wangunena nawo, “Asani yumoza wakhumba kuza kuvuli kwangu, wajikanizge, wato mphinjika yake, ndi wandirondonge ine. 35Chifukwa yose yo wangakhumba kutaska umoyo wake, wawutayenge; kweni yose yo wangataya umoyo wake pa chifukwa chaku ine ndi evangeli wo, wawutaskenge. 36Chifukwa kumovyengenji munthu kwanduwa charu chose, ndi kutayapo umoyo wake? 37Pamwenga munthu wangapaska chine chakugulizgana ndi umoyo wake? 38Chifukwa yose wachitenge soni paku ine ndi mazu ghangu mu mgonezi uno waureŵi ndi waulakwi, Mwana wa munthu nayo wamuchita soni paku iyo, penipo wazenge mu unkhankhu wa Awiske pamoza ndi ŵangelo ŵakupaturika.”

Выбрано:

Marko 8: TongaMw

Выделить

Копировать