Marko 7

Kusambizga mudauku wa ŵamwaka

(Mateyu 15.1-9)

1Ŵanguza kwaku iyo ŵaFarisi, ndiŵanyake ŵa ŵalembi, wo ŵangutuwa ku Yerusalemu, 2ndipo ŵanguwona kuti ŵanyake ŵa ŵasambizi ŵake ŵarghanga viŵande ndi manja ghamwikhu, uku nkhuti, ghambura kusamba. 3Chifukwa ŵaFarisi ndi wose ŵaYuda, kwambura kuti ŵasamba manja, kuti ŵaturgha cha, pakukoreze mdauku wa ŵara; 4ndipo pakuwe ku vyamaronda, kwambura kuti asamba, kuti ŵaturgha cha; ndipo vinyake vinandi viripo vyenivyo ŵaronde kukoreze, masukidu gha vyandi ndi viŵiya ndi viyaŵi vya mkuŵa. 5Ndipo ŵangumfumba ŵaFarisi ndi ŵalembi, “Chifukwa chine ŵasambizi ŵako ŵareka kuvwiya mdauku wa ŵara, kweni ndi manja ghamwikhu ŵaturgha chiŵande?” 6Ndipo wanguŵanene, “Yesaya wanguloske umampha ndi imwe mwafuzi, uli ndi mo kwalembeke,

‘Khamu lenili litindirumba ndi milomo yawo,

kweni mtima wawo we kutari ndi ine.

7Ŵatindisopa kwa waka,

pakusambizga uli ndi visambizgu marangu gha ŵanthu.’

8Mwaŵakureka dangu laku Chiuta, Mukoreze ukongwa mdauku wa ŵanthu.”

9Ndipo wanguŵanene, “Mutijikaniya mbwenu dangu laku Chiuta, mwakuti musunge mdauku winu. 10Chifukwa Mosese wanguti, ‘Tumbika ausu ndi anyoko’; ndipo, ‘Wakukambiya uheni awiske ndi anyina, wafwe nyifwa’; 11kweni imwe munena, ‘Asani munthu waneniyenge wiske pamwenga nyina, ndi Korbane’ (nkhuti, mpasku), chose cho ungovyeka nane; 12kuti mumzomerezga so cha kuŵachitiya kanthu awiske pamwenga anyina; 13ndipo mupenevya mazu ghaku Chiuta ndi mdauku winu, wo mwapereka; ndipo muchita vinandi vyakulingana ndi vyaviyo.”

Vyo vinanga munthu

(Mateyu 15.10-20)

14Ndipo wangudana so mzinda wo, wanguti, “Ndivwiyeni mose ndi wanimo: 15kulive kanthu kubwaro ku munthu, ko nkhanthazi kumkazuzga, kachisere mumoyo mwake; kweni vyakutuliya mukati mwake ndivyo vikazuzga munthu. [ 16Viyo legherezgani asani mwe ndi makutu ghakuvwiya!]” 17Ndipo wati wasere mu nyumba kutuwa ku mzinda wo, ŵasambizi ŵake ŵangumfumba vyapa ntharika yo. 18Ndipo watiti kwaku wo, “Kumbi namwe so mwe ŵambura kuwamo? Asi muteska kuti chose chakubwaro chakusere mu munthu chirive nthazi kumkazuzga; 19pakuti kuti chisere mu mtima wake cha, kweni mu chifu chake, ndipo chituliya ku zenji?” Viyo wangutozga vyakurgha vyose. 20Ndipo wanguti, “Cho chituwa mu munthu ndicho chikazuzga munthu. 21Chifukwa kutuwa mukati, mu mtima wa munthu, ghatuwa marunguruku ghaheni, mauyaya, maunkhungu, zimbanda, maureŵi, 22viŵinu, mauheni, fuvyu, ulakalaka, jiso liheni, mautusi, jani, uzereza, 23viheni vyose ivi, vituwa mukati, ndipo vikazuzga munthu.”

Chigomezgu cha munthukazi yo mwana wake wenga ndi mzimu wauyu

(Mateyu 15.21-28)

24Ndipo wati wasoka pa wangurutiriya mu mphaka zaku Turo ndi Sidoni. Ndipo wachisere mu nyumba kuti wakhumbanga yumoza kuziŵa cha; ndipo kuti wanguziŵa kubisika cha. 25Kweni sosonukweni, wati wavwa ndi iyo, munthukazi mweniyo mwana wake msungwana wenga ndi mzimu wawiyu, wanguza ndi wanguwa pa marundi ghake. 26Munthukazi yo wenga muGriki, muSurofonike mtundu wake. Ndipo wamuŵeyerenga kuti watuzge demone mu mwana munthukazi wake. 27Yesu wanguti kwaku iyo, “Wadange ŵanakugutiskika: chifukwa kuti kuyamucha kuto chiŵande cha ŵana kupong'e twagaru.” 28Kweni munthukazi wanguti, “Nadi, Ambuya: twagaru natu pasi pa gome turghapo marivuvu gha ŵana.” 29Yesu wangumnene, “Chifukwa cha mazu yagha ruta, demone watuwamo mu mwana-msungwana wako.” 30Ndipo wanguruta ku nyumba yake, wangusaniya mwana yo wara pa chita, kweni demone watuwamo.

Yesu wachizga wamgota-wachimama

31Wangutuwa so ku mphaka zaku Turo, wanguporota mu Sidoni kuza ku nyanja ya Galile, mukati mu mphaka za Dekapoli. 32Ndipo ŵangumtole wamgota wachimama, ŵangumuŵeyere kuti waŵikepo pake janja lake. 33Ndipo pakumto payija ku ubende wanguŵika minwiyake mu makutu ghake, ndipo pakufunyamata wangukwaska lilime lake, 34ndipo, wati walereska kuchanya, wangusiska mtima, ndipo wanguti kwaku iyo, “Efata, ko nkhuti, Banuka.” 35Makutu ghake ghangubanuka, lidada la lilime lake lingufwatulika, ndipo wangurongoro kaunthu. 36Ndipo wanguŵachinyiya kuti ŵangachinene munthu cha: kweni mo mose wanguŵachinyiya iyo, iwo ŵakondeskanga ukongwa kwakuruska. 37Ndipo ŵazizwanga ukongwa limu ŵatinge, “Vyose wachita urusu; ŵamgota wati ŵasanduska ŵakuvwa, ndipo ŵambuwu ŵarongoro.”

Выбрано:

Marko 7: TongaMw

Выделить

Копировать