Marko 6

Yesu wakanika ku Nazarete

(Mateyu 13.53-58; Luka 4.16-30)

1Ndipo wangutuwa kweniko; wanguza ku charu cha kwake; ndipo ŵasambizi ŵake ŵangumrondo. 2Pa Sabata, wangwamba kusambizga mu sinagoge; ndipo ŵanandi ŵakumuvwa ŵazizwanga, “Wativito nunkhu vyenivi? Ndi zeru uli yo yapaskika kwaku iyo? Ndi vine vyanthazi vyo vyachitika ndi manja ghake! 3Asi uyu ndi muwomba-miti, mwana waku Mariya, mku waku Yakobe ndi Yose ndi Yuda ndi Simoni? Ndipo asi ŵazichi ŵake ŵe panu pamoza nafwe?” Ndipo ŵaguŵiskikanga mwaku iyo. 4Ndipo Yesu wanenanga nawo, “Mchimi kuti ngwambura thumbiku cha, kweni mu charu chakwake, mu ŵabali ŵake, ndi mu nyumba yake.” 5Ndipo kuti wanguziŵa kuchita nchitu zanthazi cha, kweni wanguŵika manja ghake pa ŵarwali ŵamanavi, wanguŵachizga. 6Ndipo ŵanguzizwa chifukwa cha uwura chivwanu wawo.

Yesu watuma ŵasambizgi ŵake chumi ndi ŵaŵi (12)

(Mateyu 10.5-15; Luka 9.1-6)

7Ndipo wazunguliyanga mu mizi yo kusambizga. Ndipo wangudana chumi ndi ŵaŵi wo, wangwamba kuŵatuma ŵaŵi-ŵaŵi; ndipo wanguŵapaska mtufu wapa mizimu yauyu. 8Wanguŵalanguliya kuti ŵangapinganga kanthu kapa nthowa cha, kweni ndodu pe, chaukurgha cha, katiri cha, ndrama cha mu likwamba; 9kweni kuvwara viyatu; mungavwaranga minjirira yiŵi cha. 10Ndipo wangunena nawo, “Kose kweniko mungasere mu nyumba tandarani kweniko mpaka kutuweko. 11Ndipo ku malo kose ko ŵareka kukurondeni, chingana nkhukuvwani, muchituwa kweniko, kung'unthani fuvu la kusi ku marwayo ghinu, nge nchisimisimi kwaku wo.” 12Ndipo ŵangutuwa, ŵangumemeza kuti ŵanthu ŵang'anamuke. 13Ndipo ŵatuzganga ŵademone ŵanandi, ndi kutukutizga ŵarwali ŵanandi ndi mafuta, ŵaŵachizganga.

Nyifwa yaku Yohane Mbatizi

(Mateyu 14.1-12; Luka 9.7-9)

14Herode karonga wanguvwa vyenivyo; chifukwa zina lake linguŵa lakuvwika. Ŵanyake ŵanguti, “Yohane Mbatizi yo wayuka ku ŵakufwa, ndipo chifukwa chenicho vyanthazi vyo vitataliya mwake.” 15Ŵanyake ŵanguti, “Ndi Eliya.” Ndipo ŵanyake ŵanguti, “Ndi mchimi, nge njumoza wa ŵamchimi,” 16kweni wachivwa Herode, wanguti, “Mwenuyu ndi Yohane yo ndingumdumuwa mutu; wayuka ku ŵakufwa.” 17Chifukwa Herode iyo wangutuma ndi kumko Yohane, ndipo wangumuŵika mu ulinda, pa chifwa chaku Herodiya, muwoli waku Filipu mkuwake; akuti wangamto. 18Chifukwa Yohane wanguti kwaku Herode, “Kuti kutenere iwe cha kuŵa ndi muwoli wa mku wako.” 19Ndipo Herodiya wangumfinga wakhumbanga kumbaya; kweni wengavi nthazi; 20chifukwa Herode wamopanga Yohane, pakumziŵa kuti wenga munthu murunji ndi wakupaturika, wamsungirizganga waka. Ndipo wachimuvwa wazizikikanga ukongwa; kweni wamuvwanga kwakukondwere. 21Ndipo pakuŵapo zuŵa lakwenere, Herode pa zuŵa la kawi wanguchitiya dghera ŵara ŵake ndi nduna zake ndi ŵarongozgi ŵa ŵaGalile. 22Ndipo wati waseremo mwana munthukazi waku Herodiya ndi kuvina, wangukondweska Herode ndi wo ŵajanga nayo pa kurgha; ndipo karonga yo wangumnene-msungwana, “Undipemphe chose cho ungakhumba, ndipo ndikupaskenge.” 23Ndipo wangumrapiya, kuti, “Chose cho ungandipempha ndikupaskenge, chingana chingaŵa chigaŵa chapaŵi cha ufumu wangu.” 24Ndipo wangutuwa ndi kunena ndi anyina, “Ndikapemphe chine?” Anyina ŵangunena nayo, “Mutu waku Yohane Mbatizi.” 25Ndipo wangusere kwakutinthimika ku karonga, wangumpempha wakuti, “Ndikhumba kuti mundipaske ruŵi pa mbale iyi mutu waku Yohane Mbatizi.” 26Ndipo karonga wanguŵa wachitima ukongwa, kweni chifukwa cha marapu gho, ndi chifukwa cha ŵakuja pa kurgha, kuti wangukhumba kumkaniya cha. 27Ndipo sosonukweni karonga yo wangutumizga wankhondomlinda, ndi wangumlanguliya kuto mutu wake: ndipo wanguruta, ndi wangumdumuwa mutu mu ulinda mo, 28ndipo wanguto mutu wake pa mbale, ndi wanguwupaska ku msungwana yo; ndipo msungwana wanguwupaska ku nyina. 29Ndipo ŵati ŵavwa ŵasambizi ŵake ŵanguza, ŵanguto thupi lake, ndipo ŵanguliŵika mu muunda.

Yesu waliska ŵanthu vikwi vinkhonde (5,000)

(Mateyu 14.13-21; Luka 9.10-17; Yohane 6.1-14)

30Ndipo ŵakutumika wo ŵanguwungana kwaku Yesu; ŵangumtauliya vyose vyo ŵanguchita ndi ŵangusambizga. 31Ndipo watiti kwaku wo, “Muzenge imwe mwija ku udeke ku malo ghabozwa, ndipo mujipumuzge kamanavi.” Chifukwa ŵanandi ŵazanga ndi kuruta, ndipo ŵengavi nyengo chingana njakurghiya. 32Ndipo ŵanguruta mu ngaraŵa ku malo ghabozwa ku ubende. 33Ndipo ŵanthu ŵanguŵawona ŵachiruta, ndipo ŵanandi ŵanguŵaziŵa, ndipo ŵanguchimbiya pasi kuruta kweniko kutuwa ku mizi yose, ndipo ŵanguŵarutiriya. 34Ndipo wachituwa Yesu wanguwona mzinda ukuru, mwakuti wanguŵafwiya lisungu, pakuti ŵenga uli ndi mberere zakuwura mliska: Ndipo wangwamba kuŵasambizga vinandi. 35Ndipo lati lateghama dazi ŵasambizi ŵake ŵanguti, “Malo ghano ndi bozwa, ndipo dazi laruta; 36ŵawezgeni, kuti ŵarutenge ku minda ndi mizi yakuzunguliya, ŵakajiguliye vyakurgha.” 37Kweni wakwamuka wanguŵanene, “Wapaskeni imwe vyakurgha.” Ndipo watiti kwaku iyo, “Kumbi tirutenge kwachigula viŵande vya matambala machumi pe chumi ghaŵi, kuti tiŵapaske ŵarghe?” 38Kweni iyo wanena nawo, “Mwe navyo viŵande viringa? Kaninga, mukaone.” Ndipo ŵati waziŵa ŵatiti, “Vinkhonde ndi somba ziŵi.” 39Wanguŵalanguliya kuteka pasi, mabungwi mabungwi, pa uteka uŵisi. 40Ndipo ŵanguja pasi mizere-mizere, mu machumi pe chumi ndi mu machumi ghankhonde. 41Ndipo wati wato viŵande vinkhonde vyo ndi somba zo ziŵi, wangulereska kuchanya, wangutumbika, ndipo wangumenya viŵande vyo; wangupaska ku ŵasambizi kuti waŵajarikiye; ndi somba ziŵi zo wangugaŵiya wose. 42Wose ŵangurgha, ndiŵanguguta. 43Ndipo ŵanguyora marivuvu ghakuzaza sokora chumi ndi ziŵi, ndi so gha somba. 44Ndipo ŵakurgha viŵande vyo ŵenga akhumba ŵanthurumi vikwi vinkhonde.

Yesu watenda pa maji pa nyanja

(Mateyu 14.22-33; Yohane 6.16-21)

45Ndipo sosonukweni wanguŵachiska ŵasambizi ŵake kusere mu ngaraŵa, ndi kumdanjiriya kusirgha ku Betesaida, iyo wachiwezga mzinda wo. 46Ndipo pakuŵarayira, wanguruta ku phiri kwachiromba. 47Ndipo ghati ghaŵa mazuro, ngaraŵa yenga mukati mu nyanja, ndi mweneko wenga yija pa mtunda. 48Ndipo wachiŵawona ŵakusuzgika mu kuvuŵa, chifukwa mphepu yenga ku musu pafupi pa lindu lachinayi la usiku watuza kwaku wo, wakwenda pa nyanja; ndipo wakhumbanga kuŵarutiriya, 49kweni iwo ŵachimuwona wakwenda pa nyanja ŵangurunguruka kuti ndi muzguka, ndipo ŵangukambura; 50chifukwa wose ŵangumuwona, ndipo ŵangumbwambwanthiya. Kweni wangurongoro nawo, wanguti, “Chinthani mtima; ndine; mungopanga.” 51Ndipo wangukwera mu ngaraŵa ndi yingureka mphepu, ndipo ŵangurwita ukongwa mwaku ŵija: 52chifukwa kuti ŵanguwamo cha ghapa viŵande vyo, mtima wawo ungunonopeskeka.

Yesu wachizga ŵakutama mu Genesarete

(Mateyu 14.34-36)

53Ndipo ŵati ŵalowoka, ŵanguza ku charu chaku Genesarete, ndipo ŵangukwezga pa likumba. 54Ndipo ŵachituwa iwo mu ngaraŵa yo, ruŵi ŵanthu ŵangumziŵa, 55ndipo ŵachimbiyanga kwakuzunguliya charu chiya chose, ndipo ŵangwamba kunyamulika ŵarwali pa vita kweniko ŵanguvwa kuti ndiku wenga. 56Ndipo kweniko kose wangusere mu muzi, pamwenga mu misumba, pamwenga mu minda, ŵajarikanga ŵakutama mu maluluwa gha maronda, ndipo wangumuŵeyere kuti ŵakwaske chingana ndi mphonji pe za munjirira wake: ndipo so wose ŵazikwaskanga, ŵachizgikanga.

Выбрано:

Marko 6: TongaMw

Выделить

Копировать