Marko 11

Yesu wasere mu Yerusalemu wakukwera pa mbunda

(Mateyu 21.1-11; Luka 19.28-40; Yohane 12.12-19)

1Ndipo wachiŵandikiya ku Yerusalemu ku Betefage ndi Betaniya, pa phiri la Olivete, wangutuma ŵaŵi ŵa ŵasambizi ŵake. 2Wanguti kwaku wo, “Rutani ku muzi wakutghana namwe: ndipo sosonukweni muchisere musaniyenge mwana wa mbunda wakumangika, paku mweniyo wandajepo kali munthu chingana njumoza; mfwatuweni, muze nayo. 3Ndipo asani yumoza wanganena, ‘Muchitiyeni ichi?’ Nenani, ‘Ambuya ŵatumkhumba, ndipo sosonukweni wamtumenge so kuno.’ ” 4Ndipo ŵanguruta, ŵangusaniya mwana-mbunda wakumangika pa khomu pabwaro mu mseu; ndipo ŵangumfwatuwa. 5Ndipo ŵanyake ŵaku wo ŵanguma kweniko ŵangunena nawo, “Muchitanji pakufwatuwa mwana-mbunda?” 6Ndipo iwo ŵanguŵanene uli ndimo Yesu wangunene; ndipo ŵanguŵaleka. 7Wangumtole kwaku Yesu mwana-mbunda yo, ndipo ŵangupong'apo pake minjirira yawo; Yesu wangujapo paku yo. 8Ndipo ŵanandi ŵangutandika minjirira yawo mu nthowa; ŵanyake vivwati vyo ŵangutema mu minda. 9Ndipo ŵakudanjiya ndi ŵakurondo ŵakamburanga, “Hosana; ngwakutumbikika yo watuziya mu zina la Ambuya! 10Ngwakutumbikika ufumu wo utuza, ufumu waku Davidi auskefwe: Hosana mu mdengwendi!” 11Ndipo wangusere mu Yerusalemu, mu kasopi#11.11 kasopi: ndiku kuti tempile. yo; viyo wati walereska paku vyose, pakuti kwenga mazuro wanguwere ku Betaniya pamoza ndi chumi ndi ŵaŵi wo.

Yesu wachenya mkuyu

(Mateyu 21.18-19)

12Ndi mlenju wachituwa ku Betaniya, wanguvwa nja. 13Ndipo wati wawona mkuyu kutari, wakuvwalira mane, wanguza kuti vinu wangasaniyamo kanthu; wati waza pafupi kuti wangusaniyamo kanthu cha kweni mani pe; chifukwa kuti yenga nyengo ya nkhuyu cha. 14Ndipo wakwamuka wanguwunene, “Mpaka muyaya munthu wangarghamo mwako so cha chipasi.” Ndipo ŵasambizi ŵake ŵavwanga.

Yesu wasere mu kasopi

(Mateyu 21.12-17; Luka 19.45-48; Yohane 2.13-22)

15Wanguza ku Yerusalemu: ndipo wati wasere mu kasopi, wangwamba kuŵatuzga ŵakusaska ndi ŵakugula mu kasopi; wangugadabuwa magome gha ŵakusintha-ndrama, ndi vitengu vya ŵakusaska nkhunda; 16ndipo kuti wanguzomerezga cha kuti yumoza wapinge chiyaŵi ndi kuporota mu kasopi. 17Ndipo wasambizganga, ndi wangunena nawo, “Asi kwalembeka, ‘Nyumba yangu yikazumbulikanga nyumba yakusopiyamo ya mitundu yose?’ Kweni imwe mwayisanduska mphanji ya ŵakupoka.” 18Ndipo ŵazukuru ŵara ndi ŵalembi ŵanguvwa, ndipo ŵapenjanga mo ŵamnangiyenge: chifukwa ŵamopanga, pakuti mzinda wose wazizwanga pa chisambizgu chake. 19Ndipo ghati ghaŵa mazuro, ŵangutuliya kubwaro kwa msumba wo.

Chisambizgu chapa mkuyu

(Mateyu 21.2-22)

20Ndi mlenji ŵachijimphapo, ŵanguwona mkuyu uwa wamira kutuwa ku nkhorozu. 21Ndipo Petro, wachikumbuka, watiti kwaku iyo, “Rabi, awonani, mkuyu wo mungutemba, wamira.” 22Yesu wakwamuka watiti kwaku wo, “Muŵe ndi chivwanu mwaku Chiuta. 23Ndikuneneskiyani kuti yose yo wanganene phiri ili. ‘Uzulike, ndi upong'eke mu nyanja,’ asani kuti wakangang'a mu mtima wake cha, kweni wavwana kuti cho warongoro chingachitika; ndi chikamuŵiyanga. 24Chifukwa chenichi ndikuneniyani, vyose vyo muromba ndi mupempha, gomekezgani kuti mwaronde, ndipo vikamuŵiyaninga. 25Ndipo penipo pose mutuma ndi kuromba, khururukiyani, asani mwe nako kanthu pa yumoza; kuti Auskemwe ŵakuchanya nawo akhururukiye imwe mamphuru ghinu. [26Asani kuti mugowoke anyinu cha, kuti Auskemwe ŵakuchanya nawo kuti ŵamurekiyeninge cha maubudi ghino.]”

Fumbu ndi mazaza ghaku Yesu

(Mateyu 21.23-27; Luka 20.1-8)

27Ndipo ŵanguza so ku Yerusalemu: ndipo wachenda mu kasopi wanguza kwaku iyo ŵazukuru ŵara ndi ŵalembi ndi ŵaraŵara; 28ndipo ŵamufumbanga, “Mu mtufu wakutinji uchitiya vinthu ivi? Pamwenga ndi yani yo wakukupaska mtufu uwu kuchita vyenivi.” 29Ndipo Yesu wanguŵanene, “Nane so ndikufumbeninge mazu ghamoza, mundamuke, ndipo ndikambiyenge imwe mu mtufu uli ndichitiya vyo. 30Kumbi ubatizo waku Yohane wenge wakutuwa kuchanya, pamwenga ku ŵanthu? Ndamukeni.” 31Ndipo ŵangukambirana mwaku ŵija, ŵakuti, “Asani tinenenge, ‘Kutuwa kuchanya,’ ŵakambenge, ‘Na, chifukwa chine mwengavi kuvwana nayo?’ 32Kweni asani tinganena, ‘Kutuwa ku ŵanthu’?” Wopanga khamu lo: chifukwa wose ŵapimanga Yohane kuti wengadi mchimi. 33Ndipo ŵangwamuka wangunena ndi Yesu, “Kuti tiziŵa cha.” Ndipo Yesu watiti kwaku wo, “Chingana ndine kuti ndikuneniyeninge cha ndi mtufu uli ndichitiya vyenivyo.”

Выбрано:

Marko 11: TongaMw

Выделить

Копировать