Marko 12

Ntharika ya ŵalimi ŵa munda wa mphereska

(Mateyu 21.33-46; Luka 20.9-19)

1Wangwamba kurongoro nawo muzintharika, “Munthu wangupanda munda wa mphereska, wanguŵigha lisitu, wangukumba pakuponde mphereska, wanguzenga chigongwe, ndipo wanguwupazgiya ku ŵalimi, ndipo wanguyamtambula ku charu chinyake. 2Ndipo pa nyengo ya vipasi wantuma muŵanda ku ŵalimi wo, kuti warondeko ku ŵalimi vipasi vya munda wa mphereska. 3Ndipo ŵangumto ndi kumpuma, ndipo ŵangumdika ŵaka. 4Wanguŵatumiya so muŵanda munyake; ndipo mweniyo ŵangumutema ku mutu, ndi ŵangumdika kwasoni. 5Wangutuma munyake; ndipo uyu ŵangubaya: ndi ŵanandi ŵanyake; kuŵapuma ŵa; kubaya ŵanyake. 6Sono wakuŵa ndi mwana yumoza, nkhwanjiwa, wanguŵatumiya mwenuyu pakumariya, wakuti, ‘Ŵamuphwerenge mwana wangu.’ 7Kweni ŵalimi yaŵa ŵangunenerana, ‘Uyu ndi muhara; tiyeni, tibaye, ndipo chihara cho chiŵenge chidu.’ 8Ndipo ŵangumto, ŵangumbaya ndipo ŵangumpong'a kubwaro ku munda wo wa mphereska. 9Viyo waŵachitiyengenji mweni-munda wamphereska yo? Wazenge, ndi wanangenge ŵalimi wo, ndipo wapaskenge munda wo ku ŵanyake. 10Asi mwaŵerenga na lembo ili:

‘Mwa wo ŵakuzenga ŵanguwupata,

weniwo waŵa mutu wa nyondu:

11ichi ndi nchitu ya Ambuya,

ndipo nchakuziziswa mu maso ghidu’?”

12Ndipo ŵapenjanga kumko; kweni ŵangopa mzinda wo; chifukwa ŵanguteska kuti wakambiyanga paku iwo ntharika yo; ndipo ŵangumeleka, ŵanguruta.

Fumbu la kasonkhedu ka msonkhu

(Mateyu 22.15-22; Luka 20.20-26)

13Ndipo ŵangutumiya ŵanyake ŵa ŵaFarisi ndi ŵa ŵaHerode alinga kuti ŵamko mu kurongoro. 14Ndipo ŵanguti ŵaza ŵanguti, “Msambizigi, tiziŵa kuti ndimwe muneneska, ndi kuti muphwere yumoza cha: chifukwa kuti mulereska chisku cha ŵanthu cha, kweni kwakuneneksa musambizga nthowa yaku Chiuta: kumbi kuyamu kupaska msonkhu kwa Kaisare, pamwenge awa? 15Tipaskenge, pamwenga tirekenge kupaska?” Kweni iyo, pakuziŵa kufuvya kwawo, wanguŵanene, “Mutindesiyanji? Nditoleni tambala ndimuwone.” 16Ndipo iwo ŵangumtole. Sono watiti kwaku wo, “Vyaku yani chikozgu ichi ndi lembo ili?” Wangumnene, “Vyaku Kaisare.” 17Yesu wanguŵanene, “Vyaku Kaisare paskani kwaku Kaisare, ndi vyaku Chiuta kwaku Chiuta.” Ndipo ŵanguzizwa ukongwa paku iyo.

Fumbu ndi za chiyuka ku ŵakufwa

(Mateyu 22.23-33; Luka 20.27-40)

18Ndipo ŵanguza ŵaSaduki, ŵeniwo ŵakamba kuti chiyuka kulive; ŵangumfumba, ŵakuti, 19“Msambizgi, Mosese wangutilembe kuti, Asani mkuwake wa munthu wangafwa, ndi wangasiya muwoli, wambura mwana cha, mhurwa wake wamto munthukazi yo, mwakuti wayuskiye mkuwake mbeu. 20Wanguŵapo ŵabali ŵankhonde ndi ŵaŵi: wachimoza wanguto munthukazi, ndipo wachifwa kuti wangusiyapo mbeu cha; 21ndi wachiŵi yo wangumto, ndipo wangufwa wakusiyapo mbeu cha; ndi wachitatu kwakulingana, 22ndipo ŵankhonde ndi ŵaŵi wo ŵengavi kusiyapo mbeu. Pakumariya paku wose munthukazi nayo wangufwa. 23Mu chi yuka cho waŵenga muwoli waku nunju waku wo, pakuti ŵankhonde ndi ŵaŵi ŵenga nayo nge ndi muwoli?”

24Yesu wanguŵanene, “Asi mwaku chenichi muranda, pakuti mulive kuziŵa malembo gho, chingana ndi nthazi yaku Chiuta? 25Chifukwa penipo ŵayukenge ku ŵakufwa, kuti ŵakatonga cha, chingana nkhuti ŵaŵirwenge cha; kweni ŵamuja nge mbangelo kuchanya. 26Kweni nge nkhu ŵakufwa, kuti ŵayuskika, asi mwaŵerenga mu buku laku Mosese, pa chivwati cho, mo Chiuta wangumnene, kuti, ‘Ndine Chiuta waku Abrahamu, ndi Chiuta waku Yisaki, ndi Chiuta waku Yakobe’? 27Kuti ndi Chiuta wa ŵakufwa cha, kweni wa ŵamoyo: muranda ukongwa.”

Dangu likuru

(Mateyu 22.34-40; Luka 10.25-28)

28Ndipo wanguzako yumoza wa ŵalembi, wachiŵavwa ŵakufumbana pamoza ndi pakuziŵa kuti waŵamuka umampha, wangumfumba, “Nindi dangu likuru kwaku ghose?” 29Wangwamuka Yesu, “Lakudanga ndenili: ‘Uvwepo, Yisraele; Ambuya Chiuta widu, Mbuya njumoza: 30ndipo wanjenge Mbuya Chiuta wako ndi mtima wako wose, ndi ndi mzimu wako wose, ndi ndi vinjeru vyako vyose, ndi ndi nthazi yako yose.’ 31Lachiŵi ndenili, ‘Wanjenge mwanase wako nge ndiwe wamweni.’ Dangu linyake likuru ndi ghenagha palive.” 32Ndipo mlembi yo wangunena nayo, “Umampha, Ambuya, mwaneneska kuti njumoza; ndipo palive munyake kweni iyo pe; 33ndipo kumwanja iyo ndi mtima wose, ndi ndi uteska wose, ndi ndi nthazi yose, ndi kumwanja mwanase wako nge ndiwe wamweni, nkhwakuruska vyakocha vizirima ndi visopu.” 34Ndipo wachiwona Yesu kuti wamuka kwazeru, wangumnene, “Kuti we kutari ku ufumu waku Chiuta cha.” Ndipo kutuwa penipa kuti yumoza wanguŵa ndi chinganga kumfumbapo so fumbo cha.

Fumbu lapaku Mesiya

(Mateyu 22.41-46; Luka 20.41-44)

35Ndipo Yesu wachisambizga chisambizga mu kasopi, wanguti, “Akamba uli ŵalembi kuti Kristu ndi mwana waku Davidi? 36Davidi iyo wangunena pakututuzgika ndi Mzimu Wakupaturika,

‘Ambuya ŵangunene Ambuyangu, uje ku marghe ghangu,

mpaka po ndaŵika ŵarwani ŵanu pasi pa marundi ghinu.’

37Davidi iyo watimzumbuwa Ambuya; na ndi mwana wake uli?”

Yesu wachenjezga ndi ŵasambizgi ŵamarangu

(Mateyu 23.1-36; Luka 20.45-47)

Ndipo mzinda ukuru wo wamuvwanga kwakusangaruka. 38Mu chisambizgu chake wanguti, “Cheŵani ndi ŵalembi wo ŵakhumba kwendaenda mu makhanju, ndi ŵakukhumba matauzgu mu zimphara za maronda, 39ndi vitengu vyachimoza mu masinagoge, ndi malo ghachimoza mu madghera; 40wo so ŵaturgha nyumba za vyoko, ndipo mu kujiwoneska ŵaromba kwakutaruliya. Yaŵa ŵarondenge chisusa chakuruska.”

Kaperekedu ka choko mpasku

(Luka 21.1-4)

41Ndipo wachija pasi pakuthyana ndi chambiku, wawonanga mo mzindawo watayiyangamo ndrama mu chambiku mo. Wanandi ŵasambasi ŵatayangamo vinandi. 42Ndipo chinguza choko chimoza chikavu, chingutayamo tumakopara tuŵi, to tutufwa tambala yumoza. 43Ndipo pakujidaniya ŵasambizi ŵake wanguŵanene, “Ndineneske imwe, kuti choko ichi chikavu chatayamo kwakuruska wose ŵakutayamo mu chambiku cho: 44chifukwa wose ŵangutayamo vyo vyakuŵafurwiya; kweni icho ku usauchi wake chatayamo vyose vyo chenga navyo, umoyo wake wose.”

Выбрано:

Marko 12: TongaMw

Выделить

Копировать