Kîam 36

Njiarwa cia Esaû

(1Maû 1.34-37)

1Ino nîcio njiarwa cia Esaû na nîke wîtagwa na rîîtwa rîngî Edomu. 2#Kîam 26.34 Esaû nîwavikirie aka Akanaani. Nao nî: Ada mwarî wa Eloni ûrîa Mûhiti, Oholibama mwarî wa Ana. Ana aarî mûvîcî wa Zibeoni ûrîa Mûhivi, 3#Kîam 28.9 Basemathi mwarî wa Ishumaeli na mwarwang'ina wa Nebaiothi. 4Ada nîwaciarire Elifazi, Basemathi agîciara Reueli; 5nake Oholibama nîwaciarire Jeushi, Jalamu na Kora. Avîcî aya onthe a Esaû maaciarîrwe Kanaani.

6Esaû nîwacokire agîoca aka ake, ciana ciake, andû onthe a gwake mûciî, ndîthia yake yonthe, na indo cionthe ciake irîa aagîte arî Kanaani, na akîthiî vûrûrirî wîngî kûraca na mûrwang'ina Jakovu. 7Aaumire kûu nîûndû vûrûri ûrîa ke na Jakovu maatûûraga ndwameganaga. Maarî na ndîthia nyîngî na matingîavotire gwîkarania vamwe. 8Kwoguo Esaû (na nwake Edomu) nîwathiîre gûtûûra vûrûri ûrîa ûrî irîma wa Seiru.

9Ino nîcio njiarwa cia Esaû, îthe wa Aedomu. 10Elifazi mûvîcî wa Esaû na ng'ina eetagwa Ada; Reueli na ng'ina eetagwa Basemathi. 11Avîcî Elifazi maarî: Temani, Omari, Zefo, Gatamu, na Kenazi. 12Timuna ûrîa warî mûka wa kwigwa wa Elifazi nîwaciarire Amaleki. Icio nîcio ciarî njiarwa cia Ada mûka wa Esaû.

13Mûka wa Esaû ûrîa wetagwa Basemathi aaciarire mwanake ûmwe tu wîtagwa Reueli. Nake Reueli nîwaciarire Zera, Shama na Mizia. Icio nîcio njiarwa cia Basemathi mûka wa Esaû.

14Mûka wa Esaû ûrîa wetagwa Oholibama, mwarî wa Ana, na mûcûkûrûwe wa Zibeoni nîwaciarîre Esaû anake athatû, nao nî: Jeushi, Jalamu na Kora.

15Îno nîo mîvîrîga îrîa yaumire kûrî avîcî a Esaû. Elifazi, îrikithathi rîa Esaû nîke warî îthe wa tene wa mîvîrîga ya Temani, Omari, Zefo, Kenazi, 16Kora, Gatamu na Amaleki. Andû aya maarî njiarwa cia mûka wa Esaû ûrîa wetagwa Ada.

17Mîvîrîga îrîa yaumanire na Reueli yarî: Nahathi, Zera, Shama na Miza. Aya nao maarî njiarwa cia mûka wa Esaû ûrîa wetagwa Basemathi.

18Mîvîrîga ya Esaû îrîa yaumanire na mûka ûrîa wetagwa Oholibama, mwarî wa Ana yarî: Jeushi, Jalamu na Kora. 19Mîvîrîga îo yonthe yaumîte kûrî Esaû.

Njiarwa cia Edomu

(1Maû 1.38-42)

20Andû arîa maatûûraga vûrûrirî wa Edomu tene maarî avîcî a Seiru ûrîa warî Mûhori. Nao maarî: Lotani, Shobali, Zibeoni, Ana, 21Dishoni, Ezeri na Dishani.

22Avîcî a Lotani maarî Hori na Hemani. (Nake mûrwang'ina na Lotani etagwa Timuna.)

23Shobali aarî îthe wa tene wa: Aluvani, Manahathi, Ebali, Shefa na Onamu.

24Zibeoni aarî na avîcî aîrî, nao nî: Aia na Ana. (Ûyû nî Ana ûrîa wonire kûndû kûrîa kûtherûkaga manjî mama maviû werûrî akîrîthia mvunda cia îthe Zibeoni.)

25Ciana cia Ana ciarî: Dishoni na mwîrîtu wetagwa Oholibama. 26Nao avîcî a Dishoni maarî: Hemudani, Eshibani, Ithirani na Cherani.

27Avîcî a Ezeri maarî: Bilihani, Zaavani na Akani.

28Nao avîcî a Dishoni maarî: Uzi na Arani.

29Aya nîo maarî avîcî a Hori: Lotani, Shobali, Zibeoni, Ana, 30Dishoni, Ezeri na Dishani. Wa mûndû aarî mûnene wa mûvîrîga wake vûrûrirî wa Seiru.

Athamaki a Edomu

(1Maû 1.43-54)

31Aya nîo maarî athamaki arîa maathanaga vûrûrirî wa Edomu mbere ya kûgîa na athamaki vûrûrirî wa Isiraeli: 32Bela mûvîcî wa Beori aathanaga vûrûrirî wa Edomu na mûciî wake mûnene warî Dinihaba. 33Bela akua, Jobabu mûvîcî wa Zera kuuma Bozira nîwathanire vandûrî vake. 34Jobabu akua, Hushamu wa kuuma vûrûri wa Atemani nîwathanire vandûrî vake. 35Hushamu akua, Hadadi mûvîcî wa Bedadi kuuma Avithi nîwathanire vandûrî vake. Mûciî wake mûnene warî Avithi. Nîwavootire Amidiani mbaararî îrîa maarûagîra vûrûrirî wa Moabu. 36Hadadi akua, Samula wa kuuma Masireka nîwathanire vandûrî vake. 37Samula akua, Shauli kuuma Rehobothi îrîa îrî vakuvî na rûnjîrî rwa Farati nîwathanire vandûrî vake. 38Shauli akua, Baali Hanani mûvîcî wa Akibori nîwathanire vandûrî vake. 39Baali Hanani akua, Hadadi nîwathanire vandûrî vake. Mûciî wake mûnene warî Pau. Mûka wa Baali Hanani eetagwa Mehetabeli mwarî wa Matiredi mûcûkûrûwe wa Mezahabu.

40Esaû nîke warî îthe wa tene wa mîvîrîga ya andû a Edomu. Wa kûrîa mûvîrîga watûûraga, gwetanagua na rîîtwa rîaguo. Nayo yarî: Timuna, Aliva, Jafethi, 41Oholibama, Ela, Pinoni, 42Kenazi, Temani, Mibizari, 43Magidieli na Iramu.

Выбрано:

Kîam 36: KKB

Выделить

Копировать