Kîam 35

Jakovu arî Betheli nîwarathimirwe nî Ngai

1 # Kîam 28.11-17 Ngai nîwerire Jakovu atîrî, “Ûkîra ûthiî Betheli ûtûûre kuo; na ûtumîre Ngai metha ya kîgongoona kuo. Ngai ûcio nîke wakumîrîre rîrîa waûraga nî mûrwanyûkwe Esaû.”

2Jakovu nîwerire andû a mûciî wake na arîa onthe maarî nake atîrî, “Tani ngai ng'eni irîa mûrî nacio, mwîtherie, mûrute nguo irîa mûrî nacio mwîkîre ciîngî. 3Tigani tûkîre tûthiî Betheli, nîguo ngatumîre Ngai metha ya kîgongoona. Ngai ûcio nîke wandethirie rîrîa naarî thînarî, na nîke wîthîrîtwe arî vamwe nanie kûrîa kwonthe naathiîcaga.” 4Kwoguo nîmaanengere Jakovu ngai cionthe ng'eni irîa maarî nacio, na mindo irîa mekîrîte matû. Jakovu nîwaithikire rungu rwa mûtî wa mûvuru vakuvî na Shekemu.

5Rîrîa Jakovu na avîcî ake maambîrîrie rûgendo, andû a matûûra marîa maamathiûrûrûkîrîtie nîmaanyitirwe nî guoya nyîngî kuuma kûrî Ngai. Kwoguo nîmaaremirwe nî kûmarûmîrîria. 6Jakovu na andû ake onthe nîmaakinyire Luzi (na nîkuo gwîtagwa Betheli) vûrûrirî wa Kanaani. 7Nîwatumire metha ya kîgongoona vau na agîîta vandû vau Eli-betheli#35.7 Eli-betheli: Kiugo gîkî kiugaga, “Ngai wa Betheli”, nîûndû kûu nîkuo Ngai aamumîrîre rîrîa aaûraga kuuma kûrî mûrwang'ina Esaû. 8Debora ûrîa warerire Rebeka nîwakwire na akîthikwa rungu rwa mûtî wa mûvuru mwena wa îveti wa Betheli. Kwoguo mûtî ûcio nîwetirwe Aloni-bakuthi. #35.8 Aloni-bakuthi: Kiugo gîkî kiugaga, “Mûvuru wa Kîrîro.”

9Rîrîa Jakovu aaumire Padani-aramu (Mesopotamia), Ngai nîwamumîrîre rîngî na akîmûrathima. 10#Kîam 32.28 Ngai nîwamwîrire atîrî, “We wîtagwa Jakovu, nwatî kuuma rîu ûgetagwa Isiraeli.” Kuuma vîndî îo Jakovu nîwambîrîrie gwîtagwa Isiraeli. 11#Kîam 17.4-8 Ngai nîwacokire akîmwîra atîrî, “Nînie Ngai mwene vinya wonthe. Ûrogîa na ciana nyîngî. Ndûrîrî nyîngî nîikauma kûrî njiarwa ciaku, na nîûgatuîka îthe wa athamaki. 12Nîngaakûva vûrûri ûrîa naveete Iburahimu na Isaka, na vuvarî nîûvecane kûrî njiarwa ciaku.” 13Ngai nîwacokire akiuma vau maaragîria na akîthiî. 14#Kîam 28.18-19 Jakovu nîwavandire îthiga rîa kîririkano vandû vau Ngai aamwaragîria arî, na akîrîtîrîria îtega rîa indo cia kûnyuwa na maguta, akîrîrathima. 15Nîwacokire agîta vandû vau maragîria na Ngai Betheli.#35.15 Betheli: Kiugo gîkî kiugaga “Nyomba ya Ngai.”

Rakeli nîwakwire

16Jakovu na andû a mûciî wake nîmaaumire Betheli. Na marî varaca na Efiratha, îvinda rîa Rakeli rîa kûgîa na mwana nîrîakinyire, na aarî na ûrûrû mwîngî mûno wa gûciara. 17Rîrîa eegucaga ûrûrû mwîngî wa gûciara, mûndûmûka wa kûmûtethereria gûciara nîwamwîrire atîrî, “Ndûkegue guoya Rakeli, nîûndû nîûkûgîa mwana wîngî wa kavîcî.” 18Rakeli nîkwa aakucaga, nwatî mbere ya atigithana, nîwetire kaana kau Benoni#35.18 Benoni: Kiugo gîkî na Kîhibirania kiugaga “Mwanake wa thîna wakwa.”, nwatî îthe agîgeta Benjamini#35.18 Benjamini: Kiugo gîkî na Kîhibirania kiugaga “Mwanake ûrîa ûkaarathimwa.”.

19Kwoguo Rakeli nîwakwire na akîthikwa mûkîrarî wa njîra ya kûthiî Efiratha na nîyo Bethilehemu. 20Nake Jakovu nîwavandire îthiga rîa kîririkano îgûrû rîa mbîrîra yake, na nginya ûmûnthî, îthiga rîu rîtwîre rîonanagia mbîrîra ya Rakeli. 21Isiraeli nîwathiîre na mbere na rûgendo na akîamba îgema rîake mwena ûcio wîngî wa nyomba nene ya Ederi.

Avîcî a Jakovu

(1Maû 2.1-2)

22 # Kîam 49.4 Vîndî îrîa Isiraeli aatûûraga vûrûrirî ûcio, Reubeni nîwamenyanire kîîmwîrî na Biliha ûrîa warî mûndûmûka wa kwigwa wa îthe na Isiraeli nîwamenyire ûvoro ûcio.

Jakovu aarî na anake îkûmi na aîrî 23Avîcî a Lea maarî: Reubeni (îrikithathi rîa Jakovu), Simeoni, Lawi, Juda, Isakaru, na Zebuluni. 24Avîcî a Rakeli maarî: Josefu na Benjamini. 25Avîcî a Biliha, ndungata ya Rakeli ya mûndûmûka maarî Dani na Nafutali. 26Avîcî a Zilipa ndungata ya Lea ya mûndûmûka maarî Gadi na Asheri. Aya nîo avîcî a Jakovu arîa maaciarîrwe Padani-aramu (Mesopotamia.)

Gûkua kwa Isaka

27 # Kîam 13.18 Jakovu nîwathiîre Mamure kûrî îthe Isaka vakuvî na Kiriathariba (na nîyo Heburoni), kûrîa Iburahimu na Isaka maatûûraga. 28Isaka aatûûrire mîaka îgana rîmwe rîa mîrongo înana, 29na agîkua arî mûkûrû mûno, nao avîcî ake, Esaû na Jakovu makîmûthika.

Выбрано:

Kîam 35: KKB

Выделить

Копировать