Kîam 34

Dina nîwanyitirwe na vinya na akîmenywa kîîmwîrî

1Mûthenya ûmwe Dina mwîrîtu wa Jakovu na Lea; nîwathiîre gûcerera aka amwe a Kanaani. 2Rîrîa Shekemu mûvîcî wa Hamori ûrîa Mûhivi oonire Dina, nîwamûnyitire na akîmûmenya kîîmwîrî na vinya. Shekemu nîke warî mûnene wa vûrûri ûcio. 3Shekemu nîwendire Dina mwîrîtu wa Jakovu na ngoro. Kwoguo nîwamwaragîria na wendo nîguo Dina wanake amwende. 4Shekemu nîwacokire akîra îthe Hamori atîrî, “Nîrenda ûmbocere Dina atuîke mûka wakwa.”

5Jakovu nîwegwire atî mwarî aarî mûmenye kîîmwîrî na vinya. Nwatî nîûndû avîcî ake maarî kîthakarî kûrîthia ndîthia yake, nîwakirîrîrie nginya rîrîa meenûkire. 6Hamori îthe wa Shekemu nîwathiîre kwaria na Jakovu. 7Vîndî îo avîcî a Jakovu nîmaaumire kûrîthia. Na rîrîa meegwire ûvoro ûcio, nîmaamakire na makîrakara mûno nîûndû wa ûrîa Shekemu eekîte. Na njîra ya gîko kîu gîa kûnyita mwarî wa Jakovu na vinya na kûmûmenya kîîmwîrî, Shekemu nîwaretire gîconoko kûrî andû a Isiraeli. Ûndû ta ûcio ndwagîrîrwe nî gwîkîka. 8Nwatî Hamori nîwerire Jakovu vamwe na avîcî ake atîrî, “Mûvîcîwa Shekemu nîaûmbîtwe nî mwarîguo. Nakûthaitha ûreke amûvikie. 9Tigani tûrîkanîre atî tûkaavikagia erîtu enyu namue mûkavikia etû. 10Mue nwa mwîkare vûrûrirî ûyû wetû na mûtûûre wa varîa mûndû angîenda, na nwa mûrutage wîra wa kûgûra na kwendia mûtagwîtigîra, na mûgîe na indo cienyu.”

11Shekemu nîwacokire akîra îthe wa Dina na aa mûrwang'ina atîrî, “Mbîtîkîrani na kîrîa kîonthe mûkambîtia nîngûmûnengera. 12Mbîrani kîrîa kîonthe mûkwenda nîmûnengere, na mwîtie îrîvi înene wata ûrîa mûkwenda, nie nîngûmûnengera ethîrwa nîmûkûmbîtîkîria mvikie Dina.”

13Na nîûndû Shekemu nîwekîte Dina gîko gîa gîconoko, avîcî a Jakovu nîmaamacokerie na njîra ya wara atîrî, 14“Tue tûtingîtîkîra mwîrîtu wetû avikue nî mûndû ûtarî mûruu; nîûndû ûcio ûngîthîrwa ûrî ûndû wa gûtûconorithia. 15Ûndû ûrîa ûngîtûma twîtîkîre ûvikie Dina nwa arûme onthe enyu marwithirue mekare tatue. 16Mweka ûguo, tue nîtûgwîtîkîra mûvikagie erîtu etû, natue tûvikagie erîtu enyu, na twîkare gûkû kwenyu tûtuîke kîndû kîmwe. 17Mwarega gwîtîkîra ûguo tûramwîra na mûrue, nîtwoca mwîrîtu wetû tûkînathiî.”

18Maûndû mau nîmaakenirie Hamori na mûvîcî Shekemu. 19Shekemu ndaata kavinda atekîte ûguo eerirwe, nîûndû nîwendete Dina mwarî wa Jakovu. Shekemu nîke waveetwe gîtîîo mûno kwao mûciî.

20Kwoguo Hamori na mûvîcî Shekemu nîmaathiîre varîa vaacemanagua vakuvî na kîvingo gîa îtûûra, na makîra andû onthe a îtûûra atîrî, 21“Andû aya nî arata etû; tigani matûûre vûrûrirî ûyû wetû, na magûrage na makendia matagwîtigîra. Vûrûri ûyû nî mûnene wa kûmegana wa nao. Tigani tûvikagie erîtu ao nao mavikagie erîtu etû. 22Nwatî ûndû ûrîa ûngîtûma andû acio metîkîre gûtûûrania natue na tûtuîke kîndû kîmwe nao nî atî: Arûme onthe etû marue wata ûrîa o marî aruu. 23Na kinthî ndîthia yao yonthe na indo irîa ciîngî cionthe marî nacio itigûtuîka cietû twetîkîra ûrîa maakuuga? Kwoguo tigani twîtîkîre matûûranie natue.” 24Nao andû onthe a îtûûra rîu nîmetîkanirie na Hamori na mûvîcî Shekemu nao arûme onthe a îtûûra rîu nîmaaruire.

25Mîthenya îthatû kuuma andû acio marua na magîtuuragwa mûno nîûndû wa kwimba, avîcî aîrî a Jakovu Simeoni na Lawi, arîa maaciaranîrîtue na Dina, nîmoocire mviû ciao na makîthiî îtûûrarî rîu na nthitho na makîûraga arûme onthe. 26Nîmaaûragire Hamori na mûvîcî Shekemu na magîcoka makîruta Dina gwa Shekemu nyomba na makîthiî nake. 27Vuva wa kûragana, avîcî acio engî a Jakovu nîmaathiîre kûu kwaûraganîtwe na magîtava indo îtûûrarî rîu nîguo merîvîrîrie maûndû ma gîconoko marîa mwarwang'ina eekîtwe. 28Nîmoocire ng'ondu, ng'ombe, mvunda na kîrîa kîonthe Kîamrî îtûûrarî rîu na mîgûndarî. 29Nîmaatavire ûtonga wa andû acio wonthe, twana twao, aka ao, na indo cionthe irîa ciarî nyomba ndaarî.

30Jakovu nîwerire Simeoni na Lawi atîrî, “Mue nîmwandetera thîna. Nîûndû Akanaani, Aperizi na andû onthe a vûrûri ûyû nîmakûmena. Ndirî na arûme eengî, na kwoguo andû a gûkû mangînyitana vamwe na manthithûkîre nwa mambûrage vamwe na andû akwa.”

31Nao nîmaamûcokerie atîrî, “Tûtingîtîkîra mwarwaiya ekwe maûndû ta ma mûmaraa.”

Выбрано:

Kîam 34: KKB

Выделить

Копировать