Kîam 32

Jakovu nîwevaarîrie gûcemania na Esaû

1Jakovu nîwathiîre na mbere na rûgendo rwake, na arî rûgendorî, nîwatûnganire na araika. 2Rîrîa oonire araika acio nîwaugire atîrî, “Îno nî mbûtû ya athigari a Ngai.” Kwoguo nîwetire vandû vau Mahanaimu. #32.2 Mahanaimu: Rîîtwa rîrî na Kîhibirania riugaga mbûtû igîrî cia mbaara.

3Jakovu nîwatûmire anjaama kûrî mûrwang'ina Esaû vûrûrirî wa Edomu. Andû acio mathiîre marî mbere yake. 4Jakovu nîwerire andû acio mathiî makeere Esaû atî ndungata yake Jakovu yauga atîrî, “Ndûûraga ûgenirî kwa Labani na ndûûrîte kuo nginya ûmûnthî. 5Nîrî na ng'ombe, mbûri na mvunda, ng'ondu wana ndungata cia arûme na cia aka. Natûmana kûrî we mwathi wakwa, ngîîrîgagîrîra atî nîngwîtîkîrîka nîwe.”

6Anjaama arîa Jakovu aatûmîte nîmaacokire na makîmwîra atîrî, “Nîtûthiîre kûrî mûrwanyûkwe Esaû, na nîagûka gûgûtûnga arî na andû magana mana.” 7Jakovu nîwegwire guoya na agîtangîka mûno. Nîwagaanirie andû arîa aarî nao, mbûri na ng'ondu, ng'ombe na ngamîîra, maita maîrî. 8Ekire ûguo agîciragia atî, Esaû angîûka arûe na gîkundi kîmwe, kîu kîngî nîgîkûûra.

9Jakovu nîwavoire atîrî, “Ngai wa methe makwa Iburahimu, na Isaka; we Ngai-Mûnene wambîrire njoke vûrûrirî wetû na kûrî andû etû, na atî nîûgaatûma maûndû makwa matuîke maro. 10Ndirî mwagîrîru wanarî vanini wa kwonua wendo ûtathiraga na wîvokeku ûrîa ûmonetie nie ndungata yaku. Naaringire rûnjî rwa Jorodani nîrî na mûragi tu, na rîu naûka na ikundi igîrî. 11Nakûthaitha ûmvonokie kuuma kûrî mûrûwaiya Esaû. Nînîretigîra atî avota gûka gûtûûraga tuonthe ciana wana aa ng'ina. 12#Kîam 22.17 Nwatî we nîwambîrire atî nîûkaanthondekera maûndû makwa monthe, na atî nîûkaamva njiarwa nyîngî itangîtarîka ta mûthanga ûrîa ûrî rûtere rwa îria.”

13Ûtukû ûcio Jakovu nîwararire vandû vau, na akîthuura kîveo gîa kûva mûrwang'ina Esaû kuuma kûrî indo ciake. 14Nîwathuurire mvarika magana maîrî na nthenge mîrongo îîrî, mîatî magana maîrî, na ndûrûme mîrongo îîrî, 15ngamîîra mîrongo îthatû irîa ciakamagwa vamwe na njaû ciacio. Ng'ombe cia nga mîrongo îna, na ndegwa îkûmi; mvunda mîrongo îîrî cia nga na îkûmi cia nûme. 16Jakovu nîwagaanirie nyamû icio kûrî ndungata ciake, na akîva wa ndungata ndîthia nîguo îmenyagîrîre. Jakovu nîwerire ndungata ciake atîrî, “Thiîni mbere yakwa na mûtigatukanie ndîthia, mûtigage mwanya gatagatîrî ka ndîthia na îrîa îngî.” 17Jakovu nîwerire ndungata yake îrîa yatongoretie atîrî, “Rîrîa mûgaatûngana na mûrwaiya Esaû, na akûrie wî wa û, na nîkû ûthiîte, na indo ino nî ciaû? 18Ûkamûcokeria atîrî, ‘Nî cia ndungata yaku Jakovu. Aitûmîte irî kîveo kûrî mwathi wake Esaû. Jakovu ke mwene arî ava vuva wetû.’ ” 19Jakovu nîwerire ndungata îrîa yarî na ndîthia ya kaîrî wa na ya kathatû wana icio ciîngî atîrî, “Mwatûngana na Esaû mûmwîre wa ûguo, 20na mûcoke mûmwîre atîrî, ‘Ndungata yaku Jakovu îrî ava vuva wetû.’ Jakovu eeciragia atî nwakûvoteke akavoreria Esaû na iveo irîa ikaathiî mbere yake magîgaakinyia vîndî ya kwonana na monana avota gûkaamwîtîkîra.” 21Kwoguo Jakovu nîwatûmanire kîveo kîu kîthiî mbere yake, na ûtukû ûcio ke mwene nîwaraarire kûrîa aambîte îgema.

Jakovu arî Penieli nîwagianire na Ngai

22Ûtukû wa ûcio, Jakovu nîwaûkîrire, agîoca aka ake oîrî na ndungata irîa cia aka igîrî, ciana ciake îkûmi na ûmwe, na akîringa karûnjî ka Jaboku. 23Amaringia, nîwacokire akîringia indo icio ciîngî cionthe aarî nacio, 24#Hos 12.3-4 nwatî ke aatigirwe arî wenga.

Mûndû ûmwe nîwaûkire na akîgiana nake nginya gûgîkîa. 25Rîrîa mûndû ûcio oonire atî nîakûvootwa nî Jakovu, nîwamûringire ngunguro, nakuo kûgûrû kwa Jakovu gûkîvenûka. 26Nake mûndû ûcio nîwerire Jakovu atîrî, “Tiga nthiî nîûndû kûthiîte gûkîa.”

Nake Jakovu nîwamûcokerie atîrî, “Ndingîkûrekereria ûthiî ûtandathimîte.”

27Mûndû ûcio nîwaûririe Jakovu atîrî, “Wîtagwa atîa?” Nake nîwacokirie atîrî, “Jakovu”.

28 # Kîam 35.10 Nake mûndû ûcio nîwerire Jakovu atîrî, “We ndûgeetwa Jakovu rîngî nîûndû nîwagiana na Ngai na andû na wavootana, we ûgeetagwa Isiraeli#32.28 Isiraeli: Rîîtwa rîrî nî ta rîa Kîhibirania rîrîa riugaga, “nî agianaga na Ngai” kana “Ngai nîagianaga”..”

29 # Atir 13.17-18 Jakovu nîwerire mûndû ûcio atîrî, “Nakûthaitha, mbîra wîtagwa atîa?” Mûndû ûcio nîwamûcokerie atîrî, “Ûrenda kûmenya rîîtwa rîakwa nîkî?” Nîwacokire akîrathima Jakovu.

30Jakovu nîwaugire atîrî, “Nie nîmonanîte na Ngai ûthiû kwa ûthiû, na nîrî wa mwoyo.” Kwoguo Jakovu nîwetire vandû vau Penieli#32.30 Penieli: Rîîtwa rîrî nî ta rîa Kîhibirania rîrîa riugaga “Ûthiû wa Ngai.”. 31Riûa nîrîarathire Jakovu arî njîrarî aumîte Penieli, na nîwathuaga nîûndû ngunguro yake yarî mvenûku. 32Nginya ûmûnthî Aisiraeli matirîcaga nyama ya ngunguro ya nyamû wa yonthe nîûndû nîvo Jakovu aaringirwe.

Jakovu nîwacemanirie na Esaû

Выбрано:

Kîam 32: KKB

Выделить

Копировать