Kîam 31

Jakovu nîwaûrire akiuma kûrî Labani

1Jakovu nîwegwire atî avîcî a Labani maaugaga atîrî, “Jakovu nîakuuîte indo cionthe irîa ciarî cia vava. Ûtonga ûyû wonthe arî naguo umanîte na indo irîa vava aarî nacio.” 2Wana nîwonire atî Labani ndamwendete ta ûrîa aamwendete mbere. 3Ngai-Mûnene nîwerire Jakovu atîrî, “Coka vûrûrirî wa methe maku ma tene, na kûrî andû enyu na ngethagîrwa nîrî vamwe nawe.”

4Kwoguo Jakovu nîwatûmanîre Rakeli na Lea kîthakarî kûrîa aarî na ndîthia yake. 5Nîwamerire atîrî, “Nînîrona atî aguo ndamendete ta ûrîa aamendete mbere. Nwatî Ngai wa vava ethîrîtwe arî vamwe na nie. 6Mue nîmwîcî atî ndungatîrîte aguo na vinya wakwa wonthe. 7Kûnarî ûguo, aguo ethîrîtwe akîmveenia, na akagarûra mûcara wakwa maita îkûmi. Nwatî Ngai ndaanamwîtîkîria ambîke ûndû mûcûku. 8Rîrîa rîonthe Labani auga atî, ‘Irîa irî macûgû nîcio igatuîka mûcara waku,’ ndîthia yonthe îciaraga twori tûrî na macûgû. Na rîrîa auga, ‘Irîa irî na manyaga nîcio ciaku,’ ndîthia yonthe îciaraga twori twa manyaga. 9Kwoguo Ngai nîacunîte aguo ndîthia yake aanengera.

10“Vîndî îmwe rîrîa ciegûtanagia, nînarotire ngîonaga nthenge irîa ciegûtagia mbûri irî na manyaga, macûgû, na maroro. 11Nake mûraika wa Ngai nîwambarîrie na njîra ya kîroto akîmbîra atîrî, ‘Jakovu.’ Nanie ngiuga, ‘Îî nîrî ava.’ 12Nake nîwambîrire atîrî, ‘Taroria wone nthenge irîa iregûtia mîgoma nî irîa irî manyaga, macûgû na maroro. Nie nîreka ûguo nîûndû nîmonete ûrîa Labani ethîrîtwe agîgwîka. 13#Kîam 28.18-22 Nie nînie Ngai ûrîa wakumîrîre rîrîa warî Betheli, varîa wamûrire îthiga rîa kîririkano na njîra ya kûrîtîrîria maguta, na nwa vo warûthîre mwîvîto nanie. Rîu îîvarîrie ûthiî vûrûrirî ûrîa waciarîrwe.’ ”

14Rakeli na Lea nîmaacokerie Jakovu atîrî, “Gûtirî kîndû gîtigarîte tûngîgaa kuuma kûrî vava. 15Ke atwonaga tûrî ageni gwake, nîûndû nîwatwendirie, na akîrîa rûracio rûrîa aatwendirie rûkîthira. 16Ûtonga ûyû wonthe Ngai acunîte vava nî wetû vamwe na ciana cietû. Kwoguo îka ûrîa wonthe Ngai akwîrîte wîke.”

17Kwoguo Jakovu nîwevarîrie kûthiî. Nîwocire ciana ciake, na aka ake na akîmatwîthia îgûrû rîa ngamîîra. 18Nîwacokire agîoca ndîthia yake yonthe îrîa aagîte nayo arî Padani-aramu (Mesopotamia) vamwe na indo cionthe irîa aarî nacio, nîguo acoke Kanaani kûrî îthe Isaka. 19Vîndî îo, Labani aarî akûthiî kwenja ng'ondu ciake. Nake Rakeli nîwaîire ngai cia mîvuanano irîa îthe aaigîte nyomba. 20Jakovu nîwaveenirie Labani na njîra ya kûrega kûmûmenyithia atî nîwendaga kûthiî. 21Jakovu nîwocire indo cionthe irîa aarî nacio. Nîwaringire Rûnjî rwa Farati na akîthiî vûrûri ûrîa ûrî irîma wa Gileadi.

Labani nîwarûmîrîrie Jakovu

22Mûthenya wa kathatû, Labani nîwerirwe atî Jakovu aarî mûmûtiganîriu. 23Labani nîwocire andû a gwake, na makîthiî rûgendo rwa mîthenya mûgwanja marûmîrîrîtie Jakovu. Nao nîmaamûkinyîrîre irîmarî cia Gileadi. 24Ûtukû ûcio Ngai nîwaumîrîre Labani na njîra ya kîroto na akîmwîra atîrî, “Menyerera ndûkeere Jakovu ûndû, ûrî ûndû mwaro kana mûcûku.” 25Labani nîwakinyîrîre Jakovu varîa aambîte îgema rîake irîmarî cia Gileadi. Nake Labani vamwe na andû ake nîmaambire îgema rîao kuo wanao.

26Labani nîwerire Jakovu atîrî, “Wamveenirie nîkî na ûgîoca erîtu akwa na ûkîûra nao ta aka matavîtwe mbaararî? 27Wathiîre na nthitho nîkî, ûkîmveenia na ûkîrega kûmbîra na nîngîakumagaririe ngîkwinagîra nyîmbo na tamburini na ngita? 28Nîndûî gîatûmire ûrege tuganîre ûvoro na tûcûcû twakwa vamwe na erîtu akwa? We wekire ûndû wa ûrimû! 29Nîrî na ûvoti wa gûgwîka ûndû mûcûku, nwatî Ngai nîarambarîrie ûtukû na njîra ya kîroto, ambîra ndigakwîre ûndû mûcûku kana mwaro. 30Nîmbicî wathiîre nîûndû nîwegucaga wîrirîrîtie mûno gûcoka kwenyu. Nwatî waîire ngai ciakwa nîkî?”

31Jakovu nîwacokirie atîrî, “Nîkwa neguire guoya, neciragia we wavota kûnjuuna erîtu aku na vinya. 32Nwatî ethîrwa andûrî aya onthe nwa wone kûrî na mûndû ûrî na ngai ciaku nîkwa akûragwa. Mbere ya andû aku na akwa gweta kîndû kîrîa nîrî nakîo gîaku na woce.” Nwatî Jakovu ndaaicî atî Rakeli aarî mwîu ngai cia Labani.

33Labani nîwatonyire îgemarî rîa Jakovu na agîtonya îgemarî rîa Lea, na îgemarî rîa ndungata irîa igîrî cia aka agîcaragia ngai ciake kuo nwatî ndaaciona. Nîwacokire akîthiî agîtonya îgemarî rîa Rakeli. 34Rakeli nîke wocete ngai cia mûciî cia îthe na agîciga matandîkorî ma ngamîîra na agîciîkarîra. Labani nîwaicaririe îgemarî ndaarî nwatî ndaaciona. 35Rakeli nîwerire îthe atîrî, “Mwathi wakwa, ndûkandakarîre nîûndû ndingîvota kûrûgama mbere yaku nîûndû nîrî na mambura makwa ma mweri.” Labani nîwacaririe ngai cia mûciî wake nwatî ndaaciona.

36Jakovu nîwarakarire na agîtetia Labani na akîmûria atîrî, “Mavîtia makwa nî marîkû? Nî mevia marîkû mbîkîte mau matûmîte ûnûmîrîrie na vinya ûguo? 37Nîûndû nîwaroria indorî ciakwa cionthe, nîndûî wona kuo gîa kuuma gwaku? Kige ava mbere ya andû akwa na andû aku nîguo matûtuîre ciira. 38Mîaka mîrongo îrî îrîa mbîkarîte gwaku mîatî yaku wana mvarika ciaku itirî ciavuna na ndianarîa ndûrûme wanarî îmwe kuuma ndîthiarî ciaku. 39Ndianakûretera irîa ciaûragwa nî nyamû, nîguo atî wone tî mavîtia makwa. Kîrîa kîonthe kîngîaîyagwa, mûthenya kana ûtukû, wandîvagia cionthe. 40Mavinda meengî nanatinda mvîte nî riûa mûthenya, na ûtukû naraaraga ngîrîwa nî mvevo, na ndakwona toro. 41Mbîkarîte gwaku mîaka mîrongo îrî; nagûtungatîre mîaka îkûmi na îna nîguo mvikie erîtu aku oîrî, na ngîrîthia ndîthia yaku mîaka îtandatû. Kûnarî ûguo, we wîthîrîtwe ûgarûrîte mûcara wakwa maita îkûmi. 42Tiga nî ûrîa Ngai wa methe makwa ûrîa arî ke Ngai wa Iburahimu na Isaka ethîrîtwe arî vamwe nanie ûngîamîngatire ndarî kîndû. Nwatî Ngai nîwonire mathîna makwa na wîra ûrîa ndutîte na nîkîo kîratûmire agûkaanie ûtukû.”

Jakovu nîwarûthire kîrîkanîro na Labani

43Labani nîwacokerie Jakovu atîrî, “Aviki aya nî erîtu akwa, ciana ciao nî ciakwa, na ndîthia îno nî yakwa. Indo ino cionthe ûrona ava nî ciakwa. Nwatî gûtirî ûndû nîngîvota kûvingîria erîtu aya akwa vamwe na ciana ciao. 44Tiga tûrûthe kîrîkanîro nawe. Nîtûmbe mathiga vamwe” #31.44 Nîtûmbe mathiga vamwe: Mandîko mamwe matirî ciugo ino; “Nîguo matûririkanagie kîrîkanîro gîetû.”

45Kwoguo Jakovu nîwocire îthiga na akîrîvanda rîgîtuîka rîa kîririkano. 46Jakovu nîwacokire akîra andû ake atîrî, “Îthîraniani mathiga na mûmaûmbe vamwe.” Nao nîmocire mathiga na makîmaûmba vamwe. Nîmaacokire makîrîa irio marî vau kîrûndorî Kîam mathiga. 47Labani nîwetire vandû vau Jegari Sahadutha, #31.47 Jegari Sahadutha: Rîîtwa rîrî na Kîaramaîki nîkuga, kîrûndo gîa gûtûririkania. nake Jakovu akîveeta Galeedi. 48Labani nîwaugire atîrî, “Kîrûndo gîkî Kîam mathiga nî kîthîrwa kîrî kîririkania gîetû tuoîrî.” Kwoguo vandû vau nîwavetire Galeedi. 49Labani nîwacokire akîra Jakovu atîrî, “Ngai-Mûnene arotwonaga wa tuoîrî rîrîa rîonthe tûkethagîrwa tûtarî vamwe.” Kwoguo vandû vau nîvaacokire vagîtwa rîngî Mizipa. 50Labani nîwathiîre na mbere na mîario na akiuga atîrî, “Ûngîkaathînia erîtu aya akwa kana ûvikie erîtu engî wana ethîrwa ndikethîrwa ngîmenya, ririkanaga atî Ngai nîke mûira. 51Mama nîmo mathiga marîa nacokanîrîria gatagatîrî getû, na rîrî nîrîo îthiga rîa kîririkano. 52Kîrûndo gîkî Kîam mathiga na îthiga rîîrî rîa kîririkano nîciagûtûririkanagia atî ndikaavîtûka kîrûndo gîkî mbûkîte gûkûthithûkîra, nawe ndûkaavîtûka kîrûndo gîkî kana îthiga rîîrî rîa kîririkano ûkîte kûnthithûkîra. 53Ngai wa Iburahimu na Ngai wa Nahoru Ngai wa îthe wao nîagaatûtuîra ciira.” Jakovu nîwacokire akîîvîta na rîîtwa rîa Ngai wa îthe Isaka atî nama nîakûvingia mwîvîtwa ûcio. 54Jakovu nîwaitire nyamû na akîrutîra Ngai kîgongoona kûu kîrîmarî na agîîta andû ake marîcanîre. Marîkia kûrîa, nîmaararire kûu kîrîmarî. 55Mûthenya ûcio wîngî kîraûko, Labani nîwamumunyire aa ûcûwe wa vamwe na erîtu ake na akîmarathima. Nîwacokire akîmatiga akînûka.

Выбрано:

Kîam 31: KKB

Выделить

Копировать