Kîam 28

1Nake Isaka nîwetire Jakovu akîmûrathima na akîmwîra atîrî, “Ndûkaanagûre mwîrîtu Mûkanaani. 2Ûkîra ûthiî Mesopotamia kwa ûmaguo Bethueli, na ûgûre mwîrîtu ûmwe wa mamaguo Labani. 3Ngai mwene vinya wonthe arokûrathima na akûve njiarwa nyîngî, nîguo ûgaatuîka îthe wa ndûrîrî nyîngî. 4#Kîam 17.4-8 Arokûrathima we na njiarwa ciaku wata ûrîa aarathimire Iburahimu. Vûrûri ûyû ûtûûraga, na nîguo Ngai aaveere Iburahimu, ûrotuîka waku!” 5Isaka nîwarekererie Jakovu athiî Padani-aramu (Mesopotamia) kwa Labani mûvîcî wa Bethueli, Mûaramea. Bethueli aarî mûrwang'ina wa Rebeka, ng'ina wa Esaû na Jakovu.

Esaû nîwavikirie mûndûmûka wîngî

6Esaû nîwamenyire atî Isaka nîwarathimîte Jakovu na akamwîra athiî Padani-aramu (Mesopotamia) akagûrane kuo. Esaû nwa wamenyire atî Isaka akîrathima Jakovu, nîwamwîrire atî ndakanagûre mûndûmûka Mûkanaani. 7Esaû nwa wonire atî Jakovu nîwathîkîre îthe na ng'ina, na nîwathiîre Padani-aramu. 8Kwoguo rîrîa Esaû aamenyire atî aka a Kanaani matiakenagia îthe, 9nîwathiîre kwa Ishumaeli mûvîcî wa Iburahimu na akîvikia mwarî wetagwa Mahalathi, ûrîa warî mwarwang'ina na Nebaiothi.

Kîroto kîa Jakovu arî Betheli

10Jakovu nîwaumire Beerisheba na akîthiî Harani. 11Kîvwaî riûa rîathûa, nîwathiîre vandû na agîkara vo. Nîwocire îthiga rîmwe vo agîtiira kîongo narîo na akîmama. 12#Joh 1.51 Nîwarotire akîona ngathî yumîte nthî îgakinya îgûrû na araika makaunûkagia na makanyûrûrûkaga nayo. 13#Kîam 13.14-15 Nake Ngai-Mûnene nîwarûngamaga vakuvî nake akamwîra atîrî, “Nînie Ngai-Mûnene, Ngai wa Iburahimu na Isaka. We wa vamwe na njiarwa ciaku, nîngaamûva vûrûri ûyû ûmamîte. 14#Kîam 12.3; 22.18 Njiarwa ciaku nîikengîva ta mûthetu wa nthî. Nîigaatamba mîena yonthe ya nthî. Na njîra ya njiarwa ciaku, nîngaarathima mavûrûri monthe nthî. 15Ririkana atî kûrîa kuonthe ûkaathiî, ngethagîrwa nîrî vamwe nawe na ngaakûgitagîra na ngûcokie vûrûrirî ûyû. Nie ndigaagûtiganîria nginya rîrîa ngaavingia maûndû monthe marîa nakwîrîra.”

16Jakovu nîwaramûkire na akiuga atîrî, “Nama Ngai-Mûnene arî ava, na ndiraicî!” 17Jakovu nîwegwire guoya na akiuga atîrî, “Kaî kûndû gûkû nîgwakûmakania-î! Nwanginya îno îthîrwe nî nyomba ya Ngai, na nî kîvingo gîa gûtonya îgûrû.”

18Mûthenya ûcio wîngî kîraûko tene, Jakovu nîwaramûkire, agîoca îthiga rîrîa rîarî rungu rwa kîongo gîake na akîrîvanda rîrî rîa kîririkano, agîcoka akîrîtîrîria maguta akîrîamûrîra Ngai. 19Nîwacokire agîtuîrîra vandû vau rîîtwa Betheli#28.19 Betheli: Rîîtwa rîrî na Kîhibirania riugaga “nyomba ya Ngai.”. (Nwatî îtûûra rîu mbere rîetagwa Luzi). 20Jakovu nîwacokire akîîvîta kûrî Ngai akiuga atîrî, “Ethîrwa ûkethagîrwa ûrî vamwe nanie, na ûngitagîre rûgendorî rwakwa, na ûmvecage irio na nguo, 21na ûgaatûma njoke mûciî kwa vava na thayû, we Ngai-Mûnene, nîûgaatuîka Ngai wakwa. 22Îthiga rîîrî rîa kîririkano navanda, rîkethagîrwa rîrî nyomba yaku ya kûgoocagîrwa. Ngaakûvecaga gîcunjî gîa îkûmi gîa kîrîa kîonthe ûkaamvecaga.”

Выбрано:

Kîam 28: KKB

Выделить

Копировать