Amatiyu 10
10
Moanwyeotum otsko
1Eyesu a bzi moanwyeotum otsko, nga a shri ekʼpo a da mo, okyku o da mo a se egbgabi, nga a shaŋ edgu ewu endandandim, ta la elolo endandandim. 2Moa la a nyum oshpa otsko he lo a ri, Esima, eshko baŋ ba oha e ri Ebitru, ta la anáŋ Andru, ta la Eyakubu, ta la anáŋ Eyohana, moaha he lo moa a wo moanwye ba Azabadi angyiŋ. 3Ta la Efilibu, ta la Abatalamawu, ta la Otoma, ta la Amatiyu, aŋa a wo are la a yga ewaŋ angyiŋ, ta la Eyakubu, aŋa a wo anwye Alafus, ta la Tadas. 4Ta la Esima anwye-obiŋ, ta la Eyahuda Eskariyoti. Aŋa angyiŋ a yla Eyesu.
Eyesu a hom moanwyeotum baŋ otsko otum
5Eyesu a hom moanwyeotum otsko otum, nga a lu mi le, Agimi e yi ogʼba obiŋ moa la a wo moaEyahuda mbo mbo, ta la esku moaEsamariya mbo. 6Ambo agimi e yi okro moarehwĩ ba Esrayila la a wo eka ékylu la e som ayi. 7Agimi e yi e nyum oshpa ba Oreŋ Ongyeŋ o wo osusku a mo, e ygi mo! 8Nga e shaŋ moa la a no olo, nga e vro moa la a kpu, nga e shaŋ moa la a gbu eshru, nga e se egbgabi. Agimi e hwiŋ ekʼpo he lo ototno, okyku eka he agimi e yga ekplokyeŋ okyku lo mbo. 9Nga agimi e shri amgbaŋ mbo. 10Nga agimi e shri abre ba o vẽ algo mbo, nga agimi e shri ariga aha mbo, ta la akpadga aha, ta la opi o dzi oklo mbo. O raŋ o gre ba moa a shri egbre ba are la a kpo otum a shri a daŋ.
11Omba bimi e gbu osku, o mbo le anwye osku, agimi e yi odne are la a wo anyu eŋo, nga e dzu ka la ŋa, o tsa onda ba agimi e kso okro lo. 12Omba bimi e gre odnekyeŋ le, agimi e lu mi le, Opyapyaŋ ba esõ o dzu ka la gimi. 13O wo moarehwĩ ba odne lo a yga gimi la anyu eŋo le, oshko bimi e shko mo lo ó kpo mo owlama, ambo o wo ba moa a yga gimi la anyu eŋo mbo, alo ó kpo mo owlama ku-ku mbo. 14Odne, o mbo le osku la o yga gimi mbo le, agimi e zgi e sku lo, nga e ndza abgo bimi e sku lo. 15Agimi e ka! Onda Osõmbgu le, Ahogbrẽ á ka moarehwĩ ba Osodom, ta la Ogomora a mbo ayiekŋe á gre osku mi lo!
Ewu la é ba
16Agimi e ngli e gno! Ame e hom gimi otum eka ba ékylu angyiŋ egi ayi ba ebuakam. Okyku eka he agimi e nyuŋ e kpo-kpo eka amabi nga e dzu moarehwĩ la a kpo anvaŋ mbo eka ba abyebye. 17Agimi e nyuŋ e ka, moare la á ba a ba á vu gimi nga á shri gimi á yi akuombgu á yi á ba. Moa á taŋ gimi andzu aku ba moa a la a shki eshki ma. 18Moa á shri gimi á ba okro moa a la a ri ekʼpo, pa la moanyuŋ-areŋ, moa á sõ gimi ombgu okyku me, okyku o da gimi e nyum Oshpaodzadzi e ygi mo pa la moa la a wo moaEyahuda mbo. 19Omba ba moa a shri gimi a gre okro ombgu le, agimi e da esõ e ngʼba gimi okyku ekplo bimi é ba e lu mbo. Omba mi lo, moa á tsa gimi ekplo bimi é ba e lu. 20Odlo bimi é ba e lu o zgi aga esõ bimi angyiŋ mbo. Ogbgaodzi ba Adigi angyiŋ ó ba o dzu esõ bimi ó ba o lu odlo.
21Moare á shri moanimo á di, okyku o da mo a bga mo. Moadimo anwye nga á kpo ekakahelo angyiŋ pa la moanwye mo. Moanwye nga á tla moadimo, nga moa á bga mo. 22Areyaŋ a mbo á tla gimi okyku me. Ambo are la a ta esõ akpyli o tsa omba amom-abgo le, aŋa á gro. 23O wo ba moa a kpo gimi ewu oskukyeŋ le, agimi e knye e yi osku ohwõ. Ame e lu e da gimi, agimi é dzi anwye esku ba obiŋ Esrayila pyeŋ é khwo ayga, Anwye Arehwĩ á ba a ba mbo.
24Anwye-engla a wo ekʼpo a gre are la a nye ŋa mbo, nga awaghrẽ a sa a wo ekʼpo a gre adaŋ-odne mbo. 25Okyku eka he, o raŋ o gre ba anwye-engla a sko edgu odzudzu ba are la a nye ŋa. Awaghrẽ nga, o raŋ o gre baŋ a sko edgu odzudzu ba adaŋ-odne. O wo ba moa a bzi andakʼpo ba ogukyeŋ ma Ebilazabuba le, moarehwĩ ba ogu lo, moa á ri ashko la a wo abi a gre ahi lo a mbo!
Are bimi e ba e kpo eyli baŋ
26Agimi e kpo eyli moarehwĩ mbo. Ekployaŋ a mbo la e ghre, é gbu edzi. 27Nga ayakplo ba ame e la e lu e da gimi agʼbaha me ka la gimi sha, e bla lo e lu egi ayi moare mvye. Nga ayakplo bimi e gno emvygi, agimi e su lo. 28Moarehwĩ la a bga egʼba agimi e kpo eyli mo mbo, okyku eshi moa a wo ekʼpo ma ba moa a bga esõ arehwĩ mbo. Ambo agimi e kpo eyli Ahogbrẽ la a kpo a gbu baŋ a bga egʼba pyeŋ, ta la esõ a mbo enzheovo. 29Aŋo o kpo o gbu boŋ o gbmo ebyi-akpa eha okyku okobo. Ambo o wo le Adigi a bmi ayga dne akyeŋ a kpu. 30E ka, amasẽ eshri bimi a mbo, moa a sheŋ a tsi lo pyeŋ. 31Okyku eka he agimi e kpo eyli mbo, agimi e gre ebyi-akpa la anyuanyuŋ!
O zgi egŋe Ekristi egi ayi moarehwĩ
32Areyaŋ a mbo la a zgi egŋe la eyayi a lu ma aŋa a wo a me, ame a mbo é zgi egŋe ekakahelo eshri baŋ egi ayi Adugu la a wo Ongyeŋ. 33Ambo areyaŋ a mbo la a kpo evom me egi ayi moare, ame a mbo é kpo evom baŋ egi ayi ba Adugu la a wo Ongyeŋ.
Odzudum angyiŋ mbo, ambo ewu angyiŋ
34Agimi e tne aga eka ba ame e shri odzudum angyiŋ e shri e kom moarehwĩ obiŋ hi mbo. Ame e shri odzudum angyiŋ e shri e ba mbo, ambo ewu angyiŋ. 35Ame e ba okyku o shri eko o zga agʼbaha moanwye pa la moadimo anwye, nga e shri eko e shri e zga agʼbaha moadzum pa la moadzum. 36Moafpu ba are á wo moarehwĩ ba ogu baŋ angyiŋ. 37Areyaŋ a mbo la a klo adaŋ, ta la anaŋ a gre me le, aŋa a wo ekplokyeŋ angyiŋ egi ayi me mbo, nga are-yaŋ a mbo la a klo moanwye baŋ a gre me le, aŋa a wo ekplo-kyeŋ angyiŋ egi ayi me mbo. 38Areyaŋ a mbo la a bmi okyku o kpo ewu okyku me, nga a la a kpo ayakplo ba ame e klo mbo le, aŋa a wo ekplokyeŋ angyiŋ egi ayi me mbo. 39Areyaŋ a mbo la a klo eshri baŋ le, é yla. Ambo are la a shri eshri baŋ a di okyku me le, á hwiŋ oshla.
Egbre
40Areyaŋ a mbo la a yga gimi le, a yga me angyiŋ, nga areyaŋ a mbo la a yga me le, a yga are la a hom me otum. 41Areyaŋ a mbo la a yga are ba Ahogbrẽ a hom ŋa otum okyku ba are lo a wo are ba Ahogbrẽ a hom ŋa otum le, á pu egbre baŋ ka la ŋa. Nga areyaŋ a mbo la a yga are la a wo la eda edzi, okyku eda edzi lo angyiŋ le, aŋa á pu egbre baŋ ka la ŋa. 42Agimi e ka! Areyaŋ a mbo la a shri ami owa-wa sha a mbo, a shri a di akyeŋ eshki moarehwĩ la a lu me ma, okyku me le, are he lo á hwiŋ egbre baŋ.
Выбрано:
Amatiyu 10: EGONT74
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Eggon New Testament © United Bible Societies, 1974. Bible Society of Nigeria
