Amatiyu 9

Eyesu a shaŋ are la a mom egʼba

1Eyesu a gre amgblami a khwo nga, a bla a gre atam, nga a ba osku ba Akafanahum. 2Moarekyeŋ a shri alomakyeŋ la a mom egʼba, moa a shri ŋa akpakpa nga a shri a ba okro Eyesu. Eyesu a ka ba obmi ba adlidzi mo o wo la osheshye. Okyku eka he a nyuŋ alom la a mom egʼba lo a lu mi le, Anwye me, o da esõ boŋ e gbu obiŋ! Ame e kyu ŋo abgo odlobi boŋ. 3Omba he lo nga, moakyeŋ la a nye odaŋ a lu ta la emo a lu mi le, Alom hi a la a tpi eshko Ahogbrẽ ayi angyiŋ! 4Eyesu a yi eka ekplo moa a la a tne aga esõ mo, okyku eka he aŋa a nyuŋ mo a lu mi le, Okyku eshi agimi e tne aga abi eka he? 5Oyaŋ o wo ohli o gre, ba moa a lu ta la alom lo ma, Ame e kyu ŋo abgo odlobi boŋ le, ba moa a lu ma, o kso o sko akpakpa boŋ o yi eŋo? 6Okyku eka he ame e tsa gimi ba Anwye Arehwĩ a wo ekʼpo ma obiŋ hi, ba o kyu abgo odlobi. Nga a nyuŋ alom la a mom egʼba lo a lu mi le, Aŋo o kso o sko akpakpa boŋ o yi eŋo odne! 7Aŋa a kso nga a gre eŋa odne. 8Omba ba moare a ka eka he nga, moa a kpo eyli, nga moa a hlu Ahogbrẽ eshko okyku baŋ a shri ekʼpo edgu hi a shri a da moarehwĩ.

Eyesu a bzi Amatiyu

9Eyesu a kso a sku okro he lo. Omba baŋ a la a bre a yi nga, aŋa a ka alomakyeŋ la a yga ewaŋ, aŋa a ri Amatiyu. A wo aku ba oyga ewaŋ. Eyesu a nyuŋ Amatiyu a lu mi le, Aŋo o lu me ma. Amatiyu a kso nga, a lu Eyesu ma.

10Omba ba Eyesu a la a ri algo odne baŋ, moare la a yga ewaŋ nzenze, pa la moaedlobi, moa a dzu a ri algo otsotse eteblo ekyekyeŋ pa la moanwyeotum baŋ. 11MoaEfarisi a ka eka he a khwo nga, moa a zhĩ moanwyeotum baŋ a lu mi le, Okyku eshi andakʼpo bimi a la a ri algo pa la moa la a yga ewaŋ, pa la moaedlobi? 12Eyesu a gno eka he a khwo nga, a tno mo ma a lu mi le, Are la a wo oshye a la a yi aku agum mbo, o wo le are la a no dne. 13Agimi e yi e mbli ekplo ba Odlo Ahogbrẽ o lu e ka. Odlo Ahogbrẽ o lu mi le, Ame e klo oshriondba ba ebyi angyiŋ mbo, ambo ame e klo okpoghwo angyiŋ. Okyku eshi ame e ba okyku moaedlodzi angyiŋ mbo, ambo okyku moaedlobi.

Odlo eshri onyomshrialgo

14Moanwyeotum ba Eyohana la a kpo moare abaptisma a ba a zhĩ Eyesu a lu mi le, Okyku eshi, agi, pa la moaEfarisi e la e nyom eshri algo ombamba pyeŋ, ambo moanwyeotum boŋ a kpo eka he mbo? 15Eyesu a tno mo ma a lu mi le, Eka bimi e ka, o wo odzi ba moazhẽ a nyom eshri algo omba ba moa a kpo abgo anwyeshe? Alo o kpo o bgu mbo! Ambo omba ó yi ó ba, ba moa á ba a sko anwyealom anwyeshe á sku mo. Omba he lo nga moa á nyom eshri algo.

16Arekyeŋ a la a shri oknye ohe, a shum ewyle oknye ogbyi mbo, okyku eshi ó da ewyle lo é hwile é ta ma. 17Nga moa a la a shri ami anab la a bza mbo a shri a ygi émgbu egbyi mbo. O wo ba moa a shri ami la a bza mbo a ygi émgbu egbyi le, omba ba alo a bza nga a vẽ nga, á ndzu. O raŋ o gre moa a shri ami la a bza mbo a ygi émgbu ehe, okyku eshi ekplokyeŋ é kpo ta la lo mbo.

Anuoyeshe andakʼpo ta la ashe la a tka ariga Eyesu

18Omba ba Eyesu a la a lu odlo pa la moare eka he nga, andakʼpo ba anwyeakulu moaEyahuda a ba a kʼpu obiŋ egi ayi Eyesu nga a lu mi le, O ka, anwye me alashle a kpu a sheŋ a gre ple sha ayga, ambo, ame e klo boŋ o yi o tka ŋa otka sha okyku o daŋ a sa a vro. 19Eyesu a kso nga a lu ŋa ma, moanwyeotum baŋ nga a gre ka la ŋa.

20Ashekyeŋ a wo ma. Aŋa a la a wo egi ehwõ. Aŋa a kpo eyi otsko baŋ a la a kpo ewu la edgu olo he lo. Aŋa a gre egi okũ Eyesu nga a tka akaŋ ariga baŋ. 21Omba baŋ a gre a wo mbo, ashe lo a lu esõ baŋ a lu mi le, O wo ba ame e tka ariga baŋ otka sha a mbo, ame é shaŋ. 22Eyesu a zhiŋ nga a ka ashe lo nga a nyuŋ ŋa a lu mi le, Aŋo o da esõ boŋ e gbu obiŋ, aŋo anwye me! Obmi ba adlidzi boŋ angyiŋ o shaŋ ŋo. Omba he lo, ashe lo a shaŋ.

23Eyesu a gre odne andakʼpo ba anwyeakulu nga, aŋa a ka moare a la a hlu agbaru, nga a la a wu okũ eku, nga esõ e kŋe moare e bga pyeŋ. 24Eyesu a nyuŋ mo a lu mi le, Agimi pyeŋ e zgi! Eyi anwyeshe a kpu angyiŋ mbo, ambo a ndze enu angyiŋ! Moa a gno eka he a khwo nga moa a lu odlo ototno eshri baŋ. 25Ambla ba moare pyeŋ a zgi a khwo nga, Eyesu a gre aku lo eshyẽ nga, aŋa a vu anwyeshe lo obgo, nga aŋa a kso. 26Oshpa ekplo la e kpo he lo o ngla o tsu o gre egi obiŋ lo pyeŋ.

Eyesu a shaŋ moavgayi aha

27Ambla ba Eyesu a kso a sku okro he lo nga, a la a dzi a yi, moavgayi aha a ba okro baŋ, nga moa a la a lu ŋa ma. Moa a lu mi le, Aŋo Anwye Adawuda, o ka gi ayiekŋe! 28Omba ba Eyesu a gbu odnekyeŋ nga, moavgayi aha lo a ba okro Eyesu, nga aŋa a zhĩ mo a lu mi le, Agimi e bmi ba adlidzi ba ame e shaŋ gimi e gbu? Moa a tno ma a lu mi le, Andakʼpo, agi e bmi ba adlidzi. 29Ambla he nga Eyesu a tka ayi moavgayi aha lo nga a nyuŋ mo a lu mi le, Agimi e shaŋ eka bimi e bmi ba adlidzi! 30Ambla he nga, eyayi mo e hwile. Ambo Eyesu a shĩ mo a lu mi le, Agimi e lu ekplo la e kpo e da arekyeŋ mbo ba! 31Ambo, ambla moa a zhiŋ ogbu a gre a khwo nga, moa a yi a lu oshpa ekplo ba Eyesu a kpo ogʼba obiŋ moa a wo ma pyeŋ.

Eyesu a shaŋ are la a buŋ olum

32Omba ba moa a yi a mo nga, moarekyeŋ a shri alo-makyeŋ la a kpla egba a gbu mbo, a ba egi ayi Eyesu, okyku eshi egbgabi o la o kpo otum ka la ŋa. 33Ambla ba Eyesu a se lo a sku ŋa a khwo nga, a kpla eŋa egba. Areyaŋ a mbo a ka egbregbre a gre eshri. Nga moa a lu mi le, Agi e ka ekplokyeŋ eka he obiŋ ba Esrayila ondakyeŋ mbo! 34Ambo moaEfarisi a lu mi le, Areŋ egbgabi angyiŋ a shri ekʼpo a da Eyesu a daŋ a la a se egbgabi.

Eyesu a ka moare ayiekŋe

35Eyesu a la a gre esku andandandim, ta la anwye esku andandandim. Aŋa a nye moare anwyeakulu mo. A nyum Oshpaodzadzi ba Oreŋ Ahogbrẽ, nga a shaŋ moare la a no elolo endandandim ta la ewu egʼba endandandim. 36Omba baŋ a ka eshki moare nga, a ka mo ayiekŋe, okyku eshi esõ e kpla mo e gbu, nga moa a yi eheŋ-ekyeŋ ba o kpo-kpo mbo eka ba ékylu la e wo la are la a kpaŋ mo mbo. 37Nga Eyesu a nyuŋ moanwyeotum baŋ a lu mi le, Algo a wo ma nzenze ba oyoyla, ambo moare la a yla a gaŋ ku-ku mbo. 38Agimi e fa olu okyku o da are algo lo a klo moare la a yla a ta ma, okyku o da mo a yla ŋa alo.

Выбрано:

Amatiyu 9: EGONT74

Выделить

Копировать