Mak 16
16
Fịḅụsịsẹ Mị
(Mat 28.1-8; Luk 24.1-12; Jọn 20.1-10)
1Ịnyọsara Ene mị ḅọrọ sịkị Meri Magdalin ma na, Jems nyengi Meri ma na, pịkị Salomi ma na, ye kụnụma olo nwọ fẹ se àrị se mun Jizọs Ḅe oju mị ọmbị-ẹmunmẹ. 2Chọchị ene mị be dede funfun ḅụ, ịrụa paka sịkị ḅụ, ini iḍupu mị sime anga nwọ mun mẹ. 3-4Ateliogbo ini nwọse jịnḅọ jịnḅọ ḅẹmẹ, “Tụḅọ iḍupu mị ḅọkọ sime ḍụparị mị nwọ mbimbile sin wa pịrị ḅe?” (Opuma ḍụḅa ḍụparị-ẹ.) Anịsịkị ini tọrụ deki chịẹma ḍikimẹ, se ọrịmẹ na ḍụparị mị ini anị mbimbile ọḅụ dasam. 5Anị ini iḍupu mị ḅie sọmunye-ẹ, se gbọrị asẹmẹnịḅọ anịa amaḅara anga ḅụ simeọkụ ini nwọ ọrịmẹ, ḅịaḅịa ḅụchụaye ọ̀ nwọ chụa waraḅẹ, se ijira inia ḅụ ḅakama saramẹ.
6“Ijira ọ́ ḅụ ḅaama,” ọ̀ nwọ ḅẹmẹ. “À nemimẹ na Jizọs Nazarẹtḅọ ḅe ọ́ nwọ ḍọkịaḅẹ, ini seni mgbẹsẹchịn ọgọnọ kakịḅaaḅọ ḅe. Ọ̀ mịnyọ ofori-ẹ, Ọ̀ sịsẹsam! Ḍiki, mịn ini Ò se koroma nyọ mị-ẹ. 7Mịọkụ ó mun oku mị ḍuko Oria ọḅụḍukoapụma na Pita ḅe na pịrị: ‘Ori ọ́ ḅọrọ tatarị Galili nwọ mun aḅẹ, anịnyọ ómine Ori ọrịḅịa, Ò ḍuko ọ́ pịrị sa ḅara ḅụ.’”
8Anị ini pakaḅo se iḍupu mị koroma mangị soye-ẹ, anịatịḅị ḅalafa na ḅụgeregere na inia ḅụ sọmẹ. Ini gbọrịye sọ ḍuko pịrịḅọ ofori-ẹ, anịatịḅị inia ḅalafamẹ.
IḄIỌKWẸỊN MỊ SE OLOMU MA KULAMA ḄARA
Jizọs Ḅe Ọ̀ Ḅụ Seni Meri Magdalin Ma Ḍiemẹ
(Mat 28.9-10; Jọn 20.11-18)
9[Jizọs Ḅe fịḅụsịsẹ so sịkị chọchị ene mị ḅe dede funfun ḅụ, Ori Ọ̀ ḅụ seni tatarị Meri Magdalin ma ḍiemẹ, anị ò ḅie ḅụ sọnọma si-a-tẹmẹma desinḅọ ma. 10Á mun seni anị ḍuko ori na nwẹngịapụma pịrịmẹ. Ini kururu se pịkị owusimemẹ, 11ini ḅo naa na á nwọ ḅẹmẹ na, Jizọs Ḅe Ò ḍumo waraḅẹ, na árị Ori ọrịsam, nwọ ḅẹ sịkị á ḍukoye mị ini ḅerenikẹ.
Jizọs Ḅe Ọ̀ Ḅụ Se Mama Ọḅụḍukoapụ Ḍiemẹ
(Luk 24.13-35)
12Mịn mị ḅọrọ sịkị, Jizọs Ḅe Ọ̀ ḅụ seni kịrị ḅara ḅụ inia ḅụ mama apụ ḍiemẹ, ini nwẹngị ama ḅie sọmun-arịogbo. 13Ini vinpịkị ḅo anị ḍuko ísíapụma pịrịmẹ, ọkụma ini anị ḅerenikẹ.
Jizọs Ḅe Ọ̀ Ḅụ Seni Oyigbọrịapụ Fịnjị Ma Ḍiemẹ
(Mat 28.16-20; Luk 24.36-49; Jọn 20.19-23; Oku 1.6-8)
14Arịmgba ḅe kuluma, Jizọs Ḅe Ọ̀ ḅụ seni oyigbọrịapụ fịnjịma ḍiemẹ ini yefịarịogbo. Ori ini ḍiki ịganị mẹ, ini ḅereni nyanakaye ẹrẹchị, pịkị kụrọ tịḅịḅie chụamẹ Ori ọrị apụma ḍuko ini pịrịye nwọ ḅerenika ḅụ, na ini Ori ọrịmẹ Ò ḍumo waraḅẹ. 15Ọ̀ nwọse ini ḅẹmẹ, “Ó bebe tomonikiri mị mgba mun se Iḅiọkwẹịn mị ḍuko tomoni mamgba pịrị. 16Ḅereni se ini mengi se saraḅọ goyegoye ḍụaḅọrọma nyanaḅịa; ḅerenikaḅọ goyegoye ḅẹrẹḅarasi nyanaḅịa. 17Mà elekima ma ḅe kụrọ ini nwọse ḅereni nyana apụma pịrịḅịa, ini ị̀ya ẹrẹ ḅụ sitẹmẹma desinḅịa, ini kịrị ḅẹlẹ se ọkwẹịnḅịa; 18ini nemikase oruwu ọlọmẹ ḅẹḅẹ, anịkanịka nweni ḅaaḅaaye ḅumẹ ḅẹḅẹ anị ye se ini lama ẹkẹ; ini inia ḅarama se obiapụ ọgọnọ gbanaḅịa, inia ḅụ iḅiḅịa.”
Jizọs Ḅe Ini Nwọ Ọkị Iwo Soḅie Mun mẹ
(Luk 24.50-53; Oku 1.9-11)
19Nyanaḅọ Jizọs Ḅe ini na ọkwẹịn so sịkị, ini Ori ọkị iwo soḅie mun mẹ se Ọ̀ Tamụnọ Ḅe amaḅara anga simemẹ. 20Ọḅụḍukoapụma so mun nyọ layelaye ḅụ Tamụnọ ḅẹrẹ mị ḍukomẹ, se Nyanaḅọ Ḅe ini na fịrịnwẹngịmẹ, se ḍiepakụma na ini ḍukoarị Tamụnọ ḅẹrẹ mị kọkọmaye-ẹ, ḅụgbiripuma elekima nwọse inia ọkwẹịnma mịẹkụrọma ḅụ.]
ANỊḄE JỊN OLOMU KULUMA ḄARA
9[Eremeni ma Pita ḅe na oria ikiapụma na nwọ damamunmẹ, se kpụlụma ini ḍuko ini pịrịsaye mamgba nwọ ḍuko ini pịrịmẹ. 10Mịn mị ḅọrọ sịkị, Jizọs Ḅe Oria ọḅụḍukoapụma ḅụ ḅọrọ ịrụapakapaka nyọ ḅụ wẹrị osiḅụ sime se ḍumogbaso oku mị, kunoka ḍụaḅọrọma nyanaye mị fịrịma mun ịrụasọsọ nyọ lamamẹ.]
Выбрано:
Mak 16: OBTP
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible Society of Nigeria
