Matyù 18
18
A ɨ̀wə̌ mbə ŋònə̀ ngẅùunə?
(Mrk 9.33-37; Luk 9.46-48)
1Tyìʼə̀ nkwùə̀ ghu ɨ̀zùŋə̀ ndzùmə̀ Yěsû lə̀ tô mbyiitə̀ ambo ze lo, “A tsàarə̀ ɨ̀wə̌ ntsàarə̀ a ŋwùə̀ ntsùmə̀ amwuə ànwùə̀ nɨ̀fò Nɨ̀pwuurə̀?”
2Yěsû, a fuŋə̀ a mɨlyiʼə mɨnkɨ̂ a tô mbaatə̀ e, a tə̂ e a tɨ̀tɨ̀rə̀ pobə, 3nshwəŋə̀ ambo pobə lo, “A tyìʼə̀ nkǔŋə nkuŋə lo nɨ̀ tə ghoŋə̀ a wɨghə tə pə̀ŋə̀ ntyiʼə̀ tsaʼa kɨyii àghòbə, yi mbə̀ʼə nɨ̀ laʼa nkwuunə̀ a wɨghə amwuə ànwùə̀ Nɨ̀fò nɨ̀pwuurə̀ apə̀. 4Ŋònə̀ ngẅùunə amwuə ànwùə̀ Nɨ̀fò nɨ̀pwuurə̀ a ẅùə̀ wa nɨ à shwuʼkə̀nə mbɨ̀ŋmə̀ e ntyiʼə̀ mbə tsaʼa mɨnkɨ̂ wə̀. 5Lenəla, ŋònə̀ nɨ à kẅiirə̀nə a mɨnkɨ̂ tsaʼa wə̀ aŋunə nɨ̀linə̀ ɨ̀tsâ à kẅiirə̀ la gha.
Ɨ̀kwàʼnə̀ nɨ ghɨ̀rə̀nə ŋwùə̀ ghɨ̀rə̀ tɨ̀pòŋə̀
(Mrk 9.33-37; Luk 9.46-48)
6“La ŋònə̀ ɨ̀tse à tə ngɨ̀rə̀ lo taʼà mɨnkɨ̂ wə̀ ɨ̀tse nɨ à nùŋə̀nə ntɨŋmə̀ e aŋunə mɨ̀ŋə̀ â kunə̀ amwuə tɨ̀pòŋə̀ yi a pòŋə̀ lo pɨ̀ korə̀ a àlẅèŋə̀ yè ẅùunə a loŋə ze mmàʼà e â ẅènə̀ amwuə nchyə ghu nɨŋnə̀nə. 7Ndòonə̀ ɨ chyə̂ a àtwuə̀ ɨ̀shyə̂ mbə̀ʼə ɨ̀kwàʼnə̀ a nɨ ghɨ̀rə̀ a tɨ̀pòŋə̀! Ɨ̀kwàʼnə̀ chyə̂ a nɨ tô, la ndòonə̀ pə a àtwuə̀ ŋònə̀ nɨ à lòonə a àkwàʼnə̀ zə̀ ntô. 8Mbə̀ʼə àpô o kə̀ àkwùə̀ o a tə ghɨ̀rə̀ lo wə̀ ghɨ̀rə̀ a tɨ̀pòŋə̀, wə̀ lə̂ a zèrə ngwaʼà. A pòŋə̀ ambo ghò a nɨ pî a taʼà àpô kə̀ a taʼà àkwùə̀ ntsàarə̀ a nɨ pə nɨ mbô mɨ̀tsùmə̀ pobə mɨ̀kwùə̀ mɨ̀tsùmə̀ pɨ̀ màʼà o amwuə àkɨɨnə̀ ɨ̀mǔ tɨ pyaatə̀. 9Nɨ̀lyə̂ ɨ̀tsô tə mbə la ngɨ̀rə̀ lo wə̀ ghɨ̀rə̀ a tɨ̀pòŋə̀, wə̀ tsoʼò a tserə̀ ngwaʼà. A pòŋə̀ lo wə̀ kwuunə̀ amwuə nɨ̀chyə̂mbyə̂ nɨ taʼà nɨ̀lyə̂ ntsàarə̀ a nɨ pə nɨ ɨ̀myə̂ mɨ̀tsùmə̀ la pɨ̀ màʼà o amwuə àkɨɨnə̀ ɨ̀mǔ tɨ pyaatə̀.
Àshwəŋnə̀ nàanə nàanə mbə̀ʼə mbyə̂ ndzìrə̀ nɨ ɨ̀ lə̀ pînə
10“Nɨ̀ zəənə̀ lo kò nɨ̀ waʼà a wɨghə a mɨlyiʼə mɨnkɨ̂ wə̀ ɨ̀tse. Ǹshwəŋə̀ tyìʼə̀ nkǔŋə nkuŋə ambo pɨghə lo pəngèrə̀ ɨ̀pobə a nɨ̀pwuurə̀ pa mbə pobə pɨ Tǎ ɨwəə nkwùə̀ ɨ̀tsùmə̀. 11[Mbə̀ʼnə Moonə̀ Ŋwùə̀ à lə̀ tô la a nɨ chwarə̀ pànə̀ pa nɨ pɨ lə̀ pînə la.] 12Nɨ̀ kwàŋə̀ lo àkə? Mbə̀ʼə ŋwùə̀ a tə mbə la ntwuʼtə̀ mbyə̂ ndzìrə̀ ɨ̀ze nkɨrə, taʼà a furə̀ amwuə àpùŋə̀ ghu mbî, a ka myàʼtə̀ e a myə̀ mɨ̀ghumə̀ nɨ̀pwùʼə ntsòbə̀ nɨ̀pwùʼə a kòŋə̀ ndèrə̀ ngə̀ ntàʼà a zhyə̀ nɨ ɨ̀ pînə la? 13Ǹshwəŋə̀ tyìʼə̀ nkǔŋə nkuŋə ambo pɨghə lo, à tə ndzəənə̀ a pə nɨ nɨ̀ghaʼà yɨ̀noʼnə aŋunə taʼà mbyə̂ wa ntsàarə̀ aŋunə zhyə̀ za mɨ̀ghumə̀ nɨ̀pwùʼə ntsòbə̀ nɨ̀pwùʼə nɨ ka zèrə lə̀ pî e la. 14A kɨ mbə tyìʼə̀ ndəŋə ndəŋə lo, ka Tǎ ɨwɨghə a nɨ̀pwuurə̀ a pə ntàʼà e lo taʼà mɨlyiʼə mɨnkɨ̂ wə̀ ɨ̀tse â pî.
Ndyimə nɨ à fàntə̀nə ànwùə̀
15“Ndyimə o à tə mbəla nfàntə̀ ànwùə̀ ambo ghò, wə̀ ghə̀ ntsirə̀ e pɨghə ze pɨpaa ndàʼà nwuunə̀, wə̀ nèrə̀ àwɨ̀ghə̀ ànwùə̀ e ambo ze. À tə nzhwiʼtə̀ ànwùə̀ nɨ wə̀ shwəŋə̀nə, yi wə̀ kẅirə̀ mə nkẅiirə̀ a ndyimə o wa. 16A pə la ka zhwiʼtə̀ e, wə̀ lòo a taʼà ŋwùə̀ kə̀ pànə̀ pɨpaa pɨghə pɨ pobə ghə̀ ntsirə̀ e mbə̀ʼə ànwùə̀ àtsùmə̀ za nɨ pɨ shwəŋə̀nə â pə nɨ pɨ̀ndzəənə̀ zəənə̀nə pɨpaa kə̀ pɨtarə nɨ pɨ ghǎ tiitə̀. 17A pə la ntwuunə̀ e a nɨ zhwiʼtə̀ ambo pobə, nɨ̀ lòo e ndèrə̀ ambo àshwatə̀ ɨ̀poonə̀ pɨ Kristù. A kɨ nchi ntwuunə̀ e a nɨ zhwiʼtə̀ ànwùə̀ nɨ pobə shwəŋə̀nə, nɨ̀ lòo e tsaʼa tɨzhyə̂ a Nẅùə̀ kə̀ ɨ̀nkẅiirə̀ pɨ̀taghə̀.
Ànwùə̀ nɨ pɨ twuunə̀nə ghobə zhyə̀ nɨ pɨ pyiimə̀nə
18“Ǹshwəŋə̀ tyìʼə̀ nkǔŋə nkuŋə ambo pɨghə lo ànwùə̀ nɨ nɨ̀ korə̀nə àtwuə̀ ɨ̀shyə̂ ghə pɨ̌ kɨ korə̀ a zèrə a nɨ̀pwuurə̀, zhyə̂ za nɨ nɨ̀ kyàatə̀nə àtwuə̀ ɨ̀shyə̂ ghə, pɨ̌ kɨ kyàatə̀ a nɨ̀pwuurə̀. 19Ǹchi nkẅìʼnə̀ nshwəŋə̀ ambo pɨghə lo, pɨghə pɨpaa tə pyiimə̀ àtwuə̀ ɨ̀shyə̂ ghə a nɨ loonə̀ àzwuumə̀ àtsùmə̀ nɨ nɨ̀ pyiitə̀nə, yi Tǎ ɨwəə a nɨ̀pwuurə̀ à pɨ ŋâ a zèrə ambo pɨghə. 20Mbə̀ʼnə alyiʼə nɨ pànə̀ pɨpaa kə̀ pɨtarə shwatə̀nə aŋunə nɨ̀linə̀ ɨ̀tsâ, ngwa alyiʼə ghu pəə pɨ pobə.”
Àshwəŋnə̀ nàanə nàanə mbə̀ʼə ngàŋə̀ àfàʼà tɨ lə̀ənə̀ àfàntə̀ ànwùə̀
21Pità à lə̀ tô ambo Yěsû mbyiitə̀ e lo, “Ndòʼnə̀mbyə̂, a nkwùə̀ ɨshiʼə nɨ mbə̀ʼə ndyimə mə̀ a fàntə̀ ànwùə̀ ambo mɨ̀ŋə̀ ǹdə̀ənə̀ e? Mbə̀ʼə a pə nkwùə̀ sàmbaa?”
22Yěsû a kẅùə̀ lo, “Mbə̀ʼə a pə e pə ndàʼà nkwùə̀ sàmbaa apə̀, la nkwùə̀ mɨ̀ghumə̀ sàmbaa nkwùə̀ sàmbaa. 23Nɨ ndwuumə̀ wə̀, mbə̀ʼə pɨ lòo ànwùə̀ Nɨ̀fò nɨ̀pwuurə̀ aŋunə ɨ̀fò ɨ̀tse nɨ à lə̀ tàʼnə a nɨ shankə̀ ɨ̀nwùə̀ nkabə̀ ɨ̀pe pobə ngàŋə àfàʼà ɨ̀ze. 24Tsaʼnə à lə̀ pìʼnə̀nə a nɨ shankə̀ a pèrə, pɨ lə̀ lòo a taʼà ŋònə̀ ɨ̀tse nɨ à lə̀ ẅìimə̀nə e nɨ pɨ̀talent ntswùʼə̀ nkaamə̀ mɨnkɨrə ntô ambo ze. 25Tsaʼnə ka à lə̀ pə e nɨ nkabə̀ a nɨ twuə̀ nkabə̀ ghu la, ɨ̀fò wa a shwəŋə̀ lo, pɨ̀ kô e nshwùunə̀ tsaʼa àpùʼù pobə ngẅùə e nɨ ɨ̀poonə̀ ɨ̀pe farə ɨ̀pwuumə̀ ɨ̀pe ndòo ntwuə̀ ndzǒ e ghu. 26Ngàŋə̀ àfàʼà wa a kunə̀ aŋunə mɨ̀kẅìʼtə ɨ̀me a mbyə̀ ze mbuʼù mbô ambo ze nshwəŋə̀ lo, ‘Tǎ, ẅìimə̀ ntɨŋmə̀ o, mbɨ twuə̀ àzwuumə̀ àtsùmə̀ ambo ghò.’ 27Ɨ̀fò wa à lə̀ pə nɨ mɨ̀lɨŋə̀ aŋunə ze, ndə̀ənə̀ ndzǒ ghu mmyàʼtə̀ e a lèrə̀.
28“La nkwùə̀ nɨ ngàŋə̀ àfàʼà wa à lə̀ furə̀nə àpyìinə, ndzəənə̀ a taʼà ngàŋə̀ àfàʼà wa ɨ̀tse nɨ à lə̀ ẅìimə̀nə e nɨ nkabə̀ nkaamə̀ nɨ̀ghumə̀, à lə̀ zùŋə̀ nkô a loŋə e nshwəŋə̀ lo, ‘Twuə̀ nkabə̀ nɨ wə̀ ẅìimə̀nə mə̀ nɨ zèrə̀!’ 29Ngàŋə̀ àfàʼà wa a kunə̀ aŋunə mɨ̀kẅìʼtə ɨ̀me mbuʼù mbô nshwəŋə̀ lo, ‘Ẅìimə̀ ntɨŋmə̀ o, mbɨ twuə̀ nkabə̀ o za.’ 30La a twuunə̀ e nsùŋə̀ a ngàŋə̀ àfàʼà wa ngə̀ nchyâ a ɨ̀tsaŋə̀ tə mbyàa nkwùə̀ nɨ à ghǎ twuə̀ ndzǒ e ntsùmə̀. 31Nkwùə̀ nɨ zhyə̀ ngàŋə àfàʼà lə̀ zəənə̀nə ànwùə̀ nɨ a lòonə alyiʼə, mɨ̀ntɨŋmə̀ ɨ̀mobə lə̀ zaŋə̀, pobə lèrə̀ ngə̀ nshwəŋə̀ ànwùə̀ àtsùmə̀ nɨ a lòonə alyiʼə ambo ɨ̀fò wa. 32Lenəla, ɨ̀fò wa a fuŋə̀ a ngàŋə̀ àfàʼà wa, nshwəŋə̀ lo, ‘Ghǒ ngàŋə̀ àfàʼà tɨ̀pòŋə̀, ndə̀ kàa mɨ̀ndzǒ ɨ̀mô mɨ̀tsùmə̀ ntiinə wə̀ lə̀ puʼnə mbô ambo mɨ̀ŋə̀. 33Mbə̀ʼə wə̀ ka kɨ koorə̀ o mɨ̀lɨŋə̀ mɨ ndyimə o ngàŋə̀ àfàʼà tsaʼnə ndə̀ kɨnə nkoorə̀ mɨ̀lɨŋə̀ ɨ̀mô la?’ 34Ɨ̀fò wa à lə̀ zaŋə̀ a loŋə ka mɨ̀zùŋə, nchyâ e a ɨ̀tsaŋə̀ lo pɨ̀ tòmnə̀ e tə mbyàa nkwùə̀ nɨ à ghǎ myàanə̀ nkabə̀ ghu ntsùmə̀ twuə̀.”
35Yěsû a tyiʼə̀ ndẅùutə̀ lo, “Lə̌ tsaʼnə tǎ ɨwəə a nɨ̀pwuurə̀ à ghǎ ghɨ̀rə̀ aŋunə pɨghə moʼo moʼo mbə̀ʼə nɨ ka pə lə̀ənə̀ a wɨghə ɨ̀fàntə̀ ɨ̀nwùə̀ pɨlyimə ɨ̀pɨghə amwuə mɨ̀ntɨŋmə̀ ɨ̀mɨghə.”
Выбрано:
Matyù 18: pny
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Cameroon Association for Bible Translation and Literacy
