Matyù 17
17
Ndwuumə̀ nɨ Yěsû à lə̀ kẅebə̀nə mbɨ̀ŋmə̀ e
1Njyə̂ ntuurə̀ lə̀ làŋə̀ Yěsû a lòo Pità nɨ Jemə̀ pobə momaa e Jònə pobə pɨ pobə koʼò ndèrə̀ àtwuə̀ mbarə̀ sàa ɨ̀tse mbə ghu tyìʼə̀ pobə nɨ pobə. 2Mbɨ̀ŋmə̀ e ɨ̀ kẅebə̀ a mbyə̀ pobə, ɨ̀sɨghə̀ e ɨ tyiʼə̀ mmə ntsìinə̀ tsaʼa nẅùumə̀, ɨtsəʼə ɨ̀pe fuə̀ ntsèntə̀. 3Pobə kɨ wùutə̀ ndzəənə̀ a Mǔsî pobə Elijah pobə furə̀ mmə nshwəŋnə̀ pobə pɨ Yěsû. 4Pità a tyiʼə̀ nshwəŋə̀ ambo Yěsû lo, “Ndòʼnə̀mbyə̂, a pòŋə̀ tsaʼnə pə̀ənə̀ pə̀ a nɨ̀ghə̂. Wə̀ pəla nkòŋə̀, mbɨ korə̀ ɨ̀zuŋə̀ ɨtarə, taʼà a pə ambo ghò, taʼà a pə ambo Mǔsî, taʼà a pə ambo Elijah.” 5Tsaʼnə à lə̀ pirə̀nə mmə nshwəŋnə̀ la, mbàʼà yɨ̀ fuə nɨ pubə ɨ̀ wùutə̀ nkẅupə̀ a ghobə, ngyə̀ ɨ̀ furə̀ amwuə mbàʼà ghu nshwəŋə̀ lo, “Lə̌ moonə̀ mə̀ ghu mbyàŋnə̀ wa nɨ ǹkòŋə̀nə la, m̀mə ngaʼà mbə̀ʼə e. Nɨ̀ tsùŋə̀ nzhwiʼtə̀ ànwùə̀ nɨ à wə̀ nshwəŋə̀.” 6Nkwùə̀ nɨ ɨ̀zùŋə̀ ndzùmə̀ ɨ̀pe lə̀ zuʼnə a lenə la, pobə lə̀ kunə̀ a ɨ̀shyə̂ àkùbəkubə̀, àkẅàrə̀ a kwuunə̀ a ghobə. 7La Yěsû a tô mbètə̀ a ghobə nshwəŋə̀ lo, “Nɨ̀ lòo a ɨ̀shyə̂, kò nɨ̀ pô.” 8Pobə ŋaŋə̀ ɨ̀myə̂ ɨ̀mobə àtɨ̀ghə ka zəənə̀ a ghobə a ŋònə̀ ɨ̀tse ndàŋə̀ e Yěsû.
9Tsaʼnə pobə lə̀ furə̀nə àtwuə̀ mbarə̀ gha mmə nshwuʼə̀ la, Yěsû à lə̀ kwàtə̀ a ghobə lo, “Kò nɨ̀ shwəŋə̀ a wɨghə ànwùə̀ mbə̀ʼə ànǐ zə̀ ambo ŋònə̀ ɨ̀tse tə mbyàa nkwùə̀ nɨ Moonə̀ Ŋwùə̀ à ghǎ zhwuumə̀ a nɨ̀wɨghə̀.”
10Ɨ̀zùŋə̀ ndzùmə̀ ɨ̀pe pa pyiitə̀ e lo, “Pɨ̀nèrə̀ mbòomə shwəŋə̀ lo Elijah a chyə̂ a nɨ pyə̀ ntô la ntii àkə?”
11Yěsû kẅùə̀ ambo pobə lo, “Elijah à chyə̂ a nɨ tô nkɨ shìitə̀ ɨ̀nwùə̀ ɨ̀tsùmə̀ kẅuə̀ tsaʼnə ɨ lə̀ pyə̀nə mbə la. 12La ngwə̀ nshwəŋə̀ a wɨghə lo, Elijah à pyə̀ mə ntô ka pɨ̀ zhyə̂ e la ngɨ̀rə̀ mɨ̀nwùə̀ nɨ pɨ kòŋə̀nə aŋunə ze. A kɨ mbə tyìʼə̀ ndəŋə ndəŋə tsaʼnə Moonə̀ Ŋwùə̀ à ghǎ zəənə̀ ngəʼə̀ ambo pobə.”
13Ɨ̀zùŋə̀ ndzùmə̀ ɨ̀pe pa tyiʼə̀ ndzuʼù ànwùə̀ ghu a laanə̀ àtwuə̀ pobə nkwùə̀ ghu lo à shwəŋə̀ la ànwùə̀ mbə̀ʼə Jònə ngàŋə̀ àŋâ àkẅiirə̀ nchyə.
Yěsû a parə̀ a mômbyàŋnə̀ nɨ à lə̀ pənə nɨ àzhyə̂
(Mrk 9.14-29; Luk 9.37-43)
14Nkwùə̀ nɨ pobə lə̀ kẅirə̀nə nkwə̂ ntsirə̀ àpùŋə̀ pànə̀ za, ŋònə̀ mbyàŋnə̀ ɨ̀tse à lə̀ tô nkẅiʼtə̀ a mbyə̀ Yěsû nshwəŋə̀ lo, 15“Ndòʼnə̀mbyə̂, koorə̀ mɨ̀lɨŋə̀ aŋunə moonə̀ mə̀ wə̀ ntiinə à wə̀ nkunə̀ àkɨ̀pwùrə̀ ndzəənə̀ ngəʼə̀ tɨsɨŋnə. A pə nkwùə̀ ɨ̀tse, a kunə̀ amwuə ɨ̀mǔ, mbə nkwùə̀ ɨ̀tse a kunə̀ amwuə nchyə. 16Ndə̀ lòo e ntô ambo ɨ̀zùŋə̀ ndzùmə̀ ɨ̀pô lo pobə̂ parə̀ e la ka pobə zhyə̂ a ghobə ndwuumə̀ nɨ mbə̀ʼə pobə parə̀ e.”
17Yěsû a shwəŋə̀ lo, “Pànə̀ pɨ tɨ̀tsòŋə̀, nɨ ka nɨ̀ mə nnùŋə̀ a wɨghə ntɨŋmə̀ aŋunə Nẅùə̀ ka kɨ mə ghɨ̀rə̀ a wɨghə mɨ̀nwùə̀ mɨ təəmə̀nə! Ngǎ chyə̂ pə̀ənə̀ tə pyàa lə nkwùə̀ àkə? Mbɨ ẅìimə̀ ntɨŋmə̀ mə̀ mbə̀ʼə wɨghə tə pyàa lə nkwùə̀ àkə? Nɨ̀ lòo e ntô a ɨ̀shyə̂ nɨ̀ghə̂!” 18Yěsû à lə̀ saʼà àzhyə̂ za, a zùŋə̀ nfurə̀, moonə̀ wa a zùŋə̀ ntɨ̀ŋnə̀.
19Ɨ̀zùŋə̀ ndzùmə̀ Yěsû lə̀ tyiʼə̀ ntô mbyiitə̀ e a ndzùmə̀ ndzùmə̀ lo, “A ghɨ̀rə̀ àkə ka pəə tô nzhyə̂ fuukə̀ a wəə àzhyə̂ zə̀?”
20A kẅùə̀ ambo pobə lo, “Ntiinə àpyiimə̀ ntɨŋmə̀ àzɨghə a pirə̀nə nkɨ̂. Ngwə̀ nshwəŋə̀ a wɨghə lo nɨ̀ tə mbə nɨ àpyiimə̀ ntɨŋmə̀ a kɨ̂ mbə tsaʼa mbyə àloonə̀ yi mbə̀ʼə nɨ̀ shwəŋə̀ ambo mbarə̀ zə̀ lo, ‘lòo a nɨ̀ghə̂ ngə̀ ntəəmə̀ a nɨ̀yî!’ ɨ̀ kɨ ndòo. Nɨ ndwuumə̀ wanə, ànwùə̀ àtse a chyə̂ ntsàarə̀ a wɨghə apə̀.” 21Mbuurə̀ àzhyə̂ zə̀ a tàʼà la lo nɨ̀ nwuunə̀ tɨ zɨghə̀ amwuə àchàʼtə̀ Nẅùə̀ zaʼà mbòŋə̀ fuukə̀.
Yěsû a chi nshwəŋnə̀ mbə̀ʼə ànwùə̀ nɨ̀wɨghə̀ e
22Nkwùə̀ nɨ ɨ̀zùŋə̀ ndzùmə̀ ɨ̀pe lə̀ shwatə̀nə a Galìlyə̂ la, Yěsû à lə̀ shwəŋə̀ ambo pobə lo, “Pɨ̌ ŋâ a Moonə̀ Ŋwùə̀ ambo pə̀ənə̀, 23pɨ̀ zhwuutə̀ e a kɨ pə aŋunə njyə̂ ɨtarə pɨ chi mbə̀ʼkə̀ e aŋunə nɨ̀wɨghə̀.” Mbɨ̀ŋmə̀ ɨ̀zùŋə̀ ndzùmə̀ ɨ̀pe pa lə̀ pɨ̂ ka mɨ̀zùŋə.
Tsaʼnə Yěsû à lə̀ twuə̀nə a taghə̀ Ndâ Mɨ̀shwàʼà Nẅùə̀ a Yèrusalèmə̀
(Mrk 9.30-32; Luk 9.43b-45)
24Nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ tônə nkwuunə̀ a Kàpenòmə̀, pɨ̀nkẅiirə̀ pɨ̀taghə̀ a Ndâ Mɨ̀shwàʼà Nẅùə̀ a Yèrusalèmə̀ tô ambo Pità mbyiitə̀ e lo, “Ka ɨ̀nèrə̀ ɨwɨghə â twuə̀ e a taghə̀ a Ndâ Mɨ̀shwàʼà Nẅùə̀ a Yèrusalèmə̀?”
25Pità a kẅùə̀ lo, “À wa ntwuə̀.”
Nkwùə̀ nɨ Pità à lə̀ kwuunə̀nə a ndâ la, Yěsû à lə̀ pyiitə̀ e lo, “Shimùnə̀, àkwàŋə̀ o a chyə̂ lə lo àkə? Pɨ̀fò pɨ àtwuə̀ ɨ̀shyə̂ pa ngə̀ nkẅiirə̀ pɨ̀taghə̀ la ambo pɨ̀wə̌? Pobə pa ngə̀ nkẅiirə̀ la ambo ngàŋə àlaʼà kə̀ ambo ngàŋə nɨ̀ghaanə̀?”
26Pità kẅùə̀ lo, “Ambo ngàŋə nɨ̀ghaanə̀.”
Yěsû a tyiʼə̀ nshwəŋə̀ lo, “Mbə a lenə yi ka ngàŋə àlaʼà àzobə pə e a nɨ twuə̀. 27La ka pə̀ənə̀ pə ntàʼà wəənə̀ a nɨ ghɨ̀rə̀ mɨ̀ntɨŋmə̀ ɨ̀mobə zaŋə̀. Tsaʼnə a pənə lə la, ghə̀ amwuə atəŋə mmàʼà àlàʼà o. Ntsàambyə̀ ɨ̀swuə̀ nɨ wə̀ kônə, nyaʼkə̀ ntswùə̀ e, wə̌ zəənə̀ nkabə̀. Lòo a zèrə ŋŋâ ambo pobə àtwuə̀ nɨ pùu.”
Выбрано:
Matyù 17: pny
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Cameroon Association for Bible Translation and Literacy
