Matyù 16
16
Pɨ tàʼà a nɨ zəənə̀ àlènə̀
1Pɨ̀Farìsî pobə pɨ̀Sadducee pɨ̀tse lə̀ tô ambo Yěsû a nɨ kwàʼnə̀ e, ntyiʼə̀ mbyiitə̀ e lo â nèrə̀ ghobə nɨ àlènə̀ nɨ a furə̀nə a nɨ̀pwuurə̀.
2A kẅùə̀ lo, “Nkwùə̀ nɨ nkwə̌ ɨ̀ kùʼnə, nɨ̀ shwəŋə̀ lo ɨlyiʼə pə mbòŋə̀, ntiinə nɨ̀pwuurə̀ tsə̀ mbàŋə̀, 3lenəla, a ngẅùʼə ngẅùʼə nɨ̀ shwəŋə̀ lo, mbə̀ŋə̀ àghə̀ʼtə̀ ɨ̌ lòo ntiinə nɨ̀pwuurə̀ tsə̀ mbàŋə̀ nkɨ mmə nsinə̀. Nɨ̀ zhyə̂ naŋə̀ nɨ̀pwuurə̀ tiitə̀ tsaʼnə njyə̂ ɨ̌ pə, la ka pə tiitə̀ a wɨghə ɨ̀lènə̀ mbə̀ʼə mɨ̀nkwùə̀ mə! 4Pɨghə pànə̀ pɨ sìnə̀ wə̀, nɨ nɨ̀ pa ngɨ̀rə̀ mɨ̀nwùə̀ mɨ tɨ̀pòŋə̀, ka pyiimə̀ a wɨghə a Nẅùə̀! Nɨ̀ pyiitə̀ mə̀ nɨ àlènə̀? Ngaŋə! Ndàʼà àlènə̀ nɨ mbɨ ŋ̀ŋâ a àlènə̀ Jonà.”
Yěsû a shwəŋə̀ a lenə la mmyàʼtə̀ a ghobə ndèrə̀ e.
Mbyə̌ àpaanə̀ pɨ̀Farìsî pobə pɨ̀Sadducee
5Nkwùə̀ nɨ pobə lə̀ pənə ntwuumə̀ atəŋə, ɨ̀zùŋə̀ ndzùmə̀ ɨ̀pe lə̀ lə̀ənə̀ a nɨ lòo àpaanə̀. 6Yěsû a shwəŋə̀ ambo pobə lo, “Nɨ̀ zhìʼtə̀, ntəəmə̀ ɨ̀shìʼnə̀ mbə̀ʼə mbyə̌ àpaanə̀ pɨ̀Farìsî pobə pɨ̀Sadducee.”
7Pobə shwəŋə̀ a zə̀ pobə nɨ pobə, nshwəŋə̀ lo, “A chyə̂ lə ntiinə ka pə̀ənə̀ lòo a wəənə̀ àpaanə̀ àtse.”
8Yěsû a zhyə̂ ànwùə̀ nɨ pobə pənə nshwəŋə̀, mbyiitə̀ a ghobə lo, “A ghɨ̀rə̀ àkə nɨ̀ shwəŋnə̀ pɨghə nɨ pɨghə mbə̀ʼə àpaanə̀ nɨ ka nɨ̀ twuʼtə̀ a wɨghə? Àpyiimə̀ àzɨghə a kɨ̂! 9Ka nɨ̀ chi nzhyə̂ a wɨghə? Ka nɨ̀ kẅuumə̀ a wɨghə ntsɨŋə̀ àpaanə̀ ɨtaanə̀ ambo pànə̀ nkaamə̀ ɨtaanə̀, ka kɨ kẅuumə̀ a wɨghə ndùnə̀ mɨnkaamə nɨ nɨ̀ lə̀ shwatə̀nə ndẅenə̀? 10Kə̀ ntsɨŋə̀ za sàmbaa ambo pànə̀ nkaamə̀ nɨ̀kwàa, nɨ̀ ndùnə̀ mɨnkaamə nɨ nɨ̀ lə̀ lyàanə ndẅenə̀? 11A ghɨ̀rə̀ àkə ka nɨ̀ zhyə̂ a wɨghə lo ka ndə̀ pə nshwəŋə̀ mə̀ ambo pɨghə pə mbə̀ʼə àpaanə̀? Nɨ̀ təəmə̀ ɨ̀shìʼnə̀ mbə̀ʼə mbyə̌ àpaanə̀ pɨ̀Farìsî pobə pɨ̀Sadducee.”
12Lenəla pobə lə̀ zhyə̂ lo ka à lə̀ mə nshwəŋə̀ e la mbə̀ʼə mbyə̌ nɨ pɨ chyânə amwuə àpaanə̀ la. A lə̀ pə shwəŋə̀ la mbə̀ʼə a nɨ nèrə̀ mɨ̀nwùə̀ mɨ tɨ̀pòŋə̀ nɨ mèrə lə̀ pənə ambo pɨ̀Farìsî pobə pɨ̀Sadducee.
Pità a tiitə̀ a ŋònə̀ nɨ Yěsû à pənə ẅèrə
13Nkwùə̀ nɨ Yěsû à lə̀ tônə a pàa àlaʼà Kàsaryà Filipì, à lə̀ pyiitə̀ ɨ̀zùŋə̀ ndzùmə̀ ɨ̀pe lo, “Pànə̀ chyə̂ la nshwəŋə̀ lo Moonə̀ Ŋwùə̀ la ɨ̀wə̌?” 14Pobə kẅùə̀ lo, “Pɨ̀tse pa nfuŋə̀ e nɨ Jònə ngàŋə̀ àŋâ àkẅiirə̀ nchyə, pɨ̀tse fuŋə̀ nɨ Elijah, pɨ̀tse làŋə̀ nɨ mbyə̀ nshwəŋə̀ lo a Yèrə̀myâ kə̀ taʼà ngàŋə̀ ntwuumə̀ Nẅùə̀ ɨ̀tse.”
15A pyiitə̀ ghobə lo, “La nɨ̀ shwəŋə̀ àzɨghə̀ lo mɨ̀ŋə̌ ɨ̀wə̌?”
16Shimùnə̀ Pità a kẅùə̀ lo, “Ghǒ Ghù Ndzoʼnə wa, Moonə̀ Nẅùə̀. Nẅùə̀ nɨ à pənə ghù ntɨ̀ŋnə̀.”
17Yěsû a kẅùə̀ ambo ze lo, “Mborə̀ ɨ̀ chyə̂ ambo ghò, Shimùnə̀ moonə̀ Jonà! Mbə̀ʼnə ka à tiitə̀ e ŋònə̀ ntiitə̀ o, la tiitə̀ Tǎ ɨwəə a nɨ̀pwuurə̀. 18Lenəla ǹshwəŋə̀ ambo ghò Pità lo: ghò la nɨ̀ghòorə, aŋunə nɨ̀ghòorə tsə̀ mbɨ tyiʼə̀ poomə̀ pə̀ənə̀ ɨ̀pâ. Lenəla mɨ̀tɨ̀ŋnə̀ mɨ nɨ̀wɨghə̀ ghǎ tsàarə̀ e a àshwatə̀ ɨ̀poonə̀ pɨ Nẅùə̀ apə̀. 19Mbɨ ŋâ àkòo ntswùə̀ nɨ̀fò nɨ̀pwuurə̀ ambo ghò, àzwuumə̀ àtsùmə̀ nɨ wə̀ korə̀nə a ɨ̀shyə̂, pɨ̌ kɨ korə̀ a nɨ̀pwuurə̀; lenəla zhyə̀ nɨ wə̀ kyàatə̀nə a ɨ̀shyə̂, pɨ̌ kɨ kyàatə̀ a nɨ̀pwuurə̀.” 20Lenəla, Yěsû a kwàtə̀ ɨ̀zùŋə̀ ndzùmə̀ ɨ̀pe lo kò pobə tiitə̀ a ŋònə̀ ɨ̀tse lo à chyə̂ mbə Ghù Ndzoʼnə wa.
Yěsû a tiitə̀ tsaʼnə ǎ kwɨghə̀
21A nɨ furə̀ nkwùə̀ ghu, Yěsû a pìʼnə̀ a nɨ nèrə̀ ambo ɨ̀zùŋə̀ ndzùmə̀ ɨ̀pe lo ǎ lèrə̀ a Yèrusalèmə̀ zəənə̀ ngəʼə̀ yɨ̀noʼnə ambo pɨ̀lɨ̀ŋmə̂ a ndâ Nẅùə̀, farə ambo pɨ̀fò màʼà Nẅùə̀ pobə pɨ̀nèrə̀ mbòomə, pɨ̀ zhwuutə̀ e, njyə̂ kɨ làŋə̀ ɨtarə â zhwuumə̀ a nɨ̀wɨghə̀.
22Pità a lòo e mmìntə̀ a nɨ̀pwùnə mbìʼnə̀ a nɨ saʼà e nshwəŋə̀ lo, “Nẅùə̀ â zòŋə̀, Ndòʼnə̀mbyə̂! Mbə̀ʼə ka zə̀ laʼa ngɨ̀rə̀ e aŋunə ghò.”
23Yěsû a pə̀ŋə̀ nshwəŋə̀ ambo Pità lo, “Lòo o a mbyə̀ mɨ̀ŋə̀, Satàanə̀! Ghò la àtɨ̀ghə nɨ a twaanə̀nə a mbyə̀ mɨ̀ŋə̀; mbə̀ʼnə wə̀ wa ka kwàŋə̀ o mɨ̀nwùə̀ mɨ Nẅùə̀. Wə̀ wa nkwàŋə̀ pə mɨ̀nwùə̀ mɨ pànə̀ pɨ mɨsoŋə.”
24Lenəla Yěsû a shwəŋə̀ ambo ɨ̀zùŋə̀ ndzùmə̀ ɨ̀pe lo, “Ŋònə̀ ɨ̀tse à tə mmə ntàʼà zùŋə̀ mə̀, a pyə̀ ntwuunə̀ mbɨ̀ŋmə̀ e mbìʼì àtɨ̀ghə pànkə̀nə e ndzùŋə̀ mə̀. 25Mbə̀ʼnə ŋònə̀ nɨ à tàʼnə a nɨ chwarə̀ a nɨ̀chyə̂mbyə̂ e ǎ pî a ẅèrə, la ŋònə̀ nɨ à pînə a nɨ̀chyə̂mbyə̂ e mbə̀ʼə mə̀ ǎ ghǎ zəənə̀ a ẅèrə. 26Àpìi ŋònə̀ lə àkə mbə̀ʼə a pìʼì àtwuə̀ ɨ̀shyə̂ zə̀ àtsùmə̀ la mbî a nɨ̀chyə̂mbyə̂ e? Kə̀ mbə̀ʼə ŋwùə̀ a ŋâ lə àkə nkẅebə̀ a nɨ̀chyə̂mbyə̂ e ghu? 27Mbə̀ʼnə Moonə̀ Ŋwùə̀ à ghǎ tô pobə pəngèrə̀ amwuə àghuʼtə̀ Tǎ ɨghobə, lenəla tsoʼò àfàʼà ŋwùə̀ ntsùmə̀ tsaʼnə à fàʼnə. 28Ǹshwəŋə̀ a wɨghə tyìʼə̀ nkǔŋə nkuŋə lo pɨ̀tse pə ntəəmə̀ a nɨ̀ghə̂ pyə̀ nɨ ka pobə pə ghǎ zhwiʼì a ghobə a nɨ̀wɨghə̀ zaʼà pòŋə̀ zəənə̀ a Moonə̀ Ŋwùə̀ a mə ntô tsaʼa ɨ̀fò.”
Выбрано:
Matyù 16: pny
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2017, Cameroon Association for Bible Translation and Literacy
