Yoane 15

Yesu ali mutingi wa cumi

1“Nene mutingi wa cumi na Tata ali mulimi. 2Tata akasisya misambo yonsi muli nene ino isyaseeka vizao, nga yonsi ino ikaseeka, yene akaitungwila kuti izifiwe nu kuseeka vizao vingi. 3Ndakai mwaswefiwa pamulandu wa mazwi yane. 4Ikalini munondi nani munomuli. Musambo utangaseeka vizao onga ndi utailundinye ku mutingi. Mu musango uli onga namwe kwene mutangaseeka vizao suka ndi mwikala munondi.

5“Nene mutingi namwe mwemwe misambo. Wino wensi wikala munondi, nga nani munoli, wene akaseeka vizao vingi. Pano mutangacita cimwi kwaula nene. 6Wino wensi asyaikala munondi wene alasumbwa wa musambo nu kunyala. Antu yakakolonganika misambo ndi vino uu, yaisumba mu moto, muno ikapya. 7Ndi mwikala munondi nga na mazwi yane ikala munomuli, lyene mulalenga consi cino mukulonda nga naco cilapelwa kunomuli. 8Tata akalumbanyiwa ndi mukuseeka vizao vingi. Mu musango ndi uu, mulaya alondezi yane mu cumi. 9Nemo namutemwa ndi vino Tata wantemwa. Ikalini mu kutemwa kwane. 10Ndi mwayela masunde yane, ale lyonsi mumaikala mu kutemwa kwane, ndi vino nani nkayela masunde yakwe Tata nu kwikala mu kutemwa kwakwe.

11“Nati munena vintu vii kuti muye mu luzango ndi luno nkweti, na kuti luzango lwinu luye lufumaluke. 12Lii lili sunde lyane lyakuti mutemwane ndi vino nemo namutemwa. 13Pasi kutemwa kwa muntu ukwaluta kuu, ukuti umuntu aipeele kufwila yacuza yakwe. 14Mwemwe yacuza yane ndi mukucita vintu vino namunena. 15Ntalamwama wa yaomvi nupya pano muomvi asimanya cino mwene wakwe akucita. Lelo nkamwama yacuza, pano nati munena vintu vyonsi vino nuvwile kuli Tata. 16Asi mwemwe mwansolwile, lelo nene namusolwile nu kumutuma kuti mukaseeka vizao vingi, vino vikaikalilila. Caleka Tata alamupeela consi cino mulamulenga mwi zina lyane. 17Lyene, lii lili sunde lino namupeela ilyakuti mutemwane.

Ulupato lwa amu nsi pa ina Klistu

18“Antu amu nsi ndi yamupata, iusyini vino nene yatandike kupata. 19Ndi mwemo muya amu nsi, nga amu nsi yamutemwa wa antu yao. Lelo mwemo namusolwile kufuma mu nsi ii. Mwemo musi amu nsi, caleka amu nsi yamupata. 20#Mat 10:24; Luk 6:40; Yoa 13:16 Iusyini vino namunenyile inti, ‘Kusi muomvi alusile mwene wakwe.’ Ndi yanzunyizye, namwe kwene yalamuzunya. Ndi yayelanga mazwi yane, yalayela na mazwi inu kwene. 21Lelo yalacita vintu vii vyonsi kunomuli pamulandu wakuti mwemwe yakwane, pano yatamanya uwantuma. 22Ndi ntizile mvwange kunoyali, nga yasi nu mulandu wa kwifya. Lelo ndakai kusi kuno yangaleukila pa maifyo yao. 23Wino wensi uwampata ala wapata na Tata kwene. 24Ndi pakasi kao ntizile ncita vintu vino umuntu nanti wenga atatala wacita, nga yasi nu mulandu wa kwifya. Lelo yalola vino nacita, nga yapata Tata pamwi nani kwene. 25#Mas 35:19; 69:4 Lelo cii cayako kuti icalembwa mu masunde yao cifikiliziwe, cino cikati, ‘Yampata pasi nanti mulandu.’

26“Lelo kaazwa aliza, ali Mupasi, wino akasokolola cumi ca pali Tata, nupya akafuma kuli Tata. Ndamutumila wii kwene kufuma kuli Tata, nga nawe alapeela umboni pamulandu wane. 27Namwe kwene mulapela umboni pamulandu wane, pano mwaya nani kufuma lino natandike kuomba.

Выбрано:

Yoane 15: MamL13

Выделить

Копировать