Yoane 14
14
Yesu ali nzila ya kuli Tata
1Yesu anena alondezi yakwe ati, “Mutaleka myenzo inu yaaziwa. Tailini Leza, mutaile nani kwene. 2Mu ng'anda yakwe Tata muli miputule iingi, nga nani nkuya kukumuteyanyizizya ncende. Ndi cisi vivyo, nga namunena. 3Lyene ndi napita kukumuteyanyizizya ncende, ndawela kwiza mutola kuti kunondi akuno namwe mukaye. 4Mwemo kuno nkuya mumanyile nzila.”
5Tomasi amunena ati, “Mwene, tutamanyile kuno ukuya, nga tungamanya uli nzila yakuya kuko?”
6Yesu amwaasuka ati, “Nene ndi nzila, ni cumi, nu umi. Pasi umwi angiza kuli Tata suka wizila muli nene. 7Ndi mwamanyile nene, nga mwamanya na Tata kwene. Kufuma ndakai mwati mumumanya nu kumulola.”
8Filipo amunena ati, “Mwene, tulange So pano cico kwene sile acino tukulonda.”
9Yesu amunena ati, “Nati nikala namwe nsita ntali, lelo Filipo wemo utamanyile nene? Wino wandola, walola na Tata kwene. Uzye pacani ukuti, ‘Tulange So?’ 10Filipo, uzye utataile vino Tata nani twaya wenga? Mazwi yano nkamunena, insiivwangila! Lelo Tata, wino akaikala munondi, akacita milimo yakwe. 11Untaile lino nalanda vino Tata nani twaya wenga. Nanti untaile pa milimo ino nkacita. 12Cumi namunena nati, wino akuntaila wene alacita vicitwa vino nkacita, nga ni vikulu kuluta, pano nkuya kuli Tata. 13Na consi cino mulalenga mwi zina lyane, acino ndacita, kuti Tata alumbanyiwe mu Mwana. 14Ndi mwandenga cimwi mwi zina lyane, ndacita.
Yesu walaya kupeela Mupasi Wamuzilo
15“Ndi mwantemwa mwayela masunde yane. 16Nani ndapepa kuli Tata, nawe alamupeela kaazwa muze, kuti aikale namwe manda pe. 17Wene a Mupasi wa cumi, wino akasokolola cumi ca pali Leza. Antu atemwa sile vya nsi yatangamuzengela, pano yatangamulola nanti kumumanya. Lelo mwemo mwamumanya pano akaikala namwe, nupya amaikalanga munomuli.
18“Ntalamusya mwenga wa ana asyale, lelo ndawela kunomuli. 19Pa kasita kanono antu amu nsi yatalandola, lelo mwemo mulandola. Ndi vino nemo ndi nu umi, namwe kwene mulaya nu umi. 20Mu wanda ulya, mulamanya vino nemo na Tata twaya wenga, nga namwe kwene pamwi nani twaya wenga.
21“Wino wensi akapokelela masunde yane nu kuyayela, ala wene uwantemwa. Na wino wensi uwantemwa, wene alatemwikwa na Tata. Nani kwene ndamutemwa nu kuisokolola kunoli.”
22Yuda (asi Yuda Iskalyoti) amuuzya ati, “Mwene, uzye cingaya uli kuti wemo uisokolole kuli sweswe, lelo ku antu amu nsi foo?”
23Yesu amwaasuka ati, “Wino wensi uwantemwa, wene akayela mazwi yane. Wene alatemwikwa na Tata, nga Tata nani tuliza kunoli nu kwikala nawe.”
24Wino wensi atantemwa wene asyayela mazwi yane. Na mazwi yano muvwa yene yatafuma kunondi, lelo yafuma kuli Tata, wino uwantuma.
25“Vintu vii namunena lino ncili namwe. 26Lelo kaazwa, Mupasi Wamuzilo, wino Tata alatuma mwi zina lyane, wene alamusambilizya vintu vyonsi nu kumwiusya vyonsi vino namunena.
27“Namusila mutende, mutende wane auno namupeela. Ntamupile mutende ndi vino amu nsi yakapela. Mutaleka myenzo inu yaaziwa, nanti kuvwa intete. 28Mwali muvwa vino nali nati, ‘Nkupita, lelo ndawela kunomuli.’ Ndi mwantemwa, mungazanga pa kuvwa vino nkuya kuli Tata. Pano Tata andusile. 29Ndakai namunena cii lino citali cicitike, kuti alala cacitika, mukataile. 30Ndakai ntangalanda namwe pa nsita ntali pano kateeka wa nsi ii akwiza. Wene asi na maka munondi. 31Lelo antu amu nsi yalinzile yamanye vino natemwa Tata. Uli mulandu uno nkacita vyonsi vino wampeela ilamulo kuti ncite.
“Katukini, tuini tufume pa ncende ii.”
Выбрано:
Yoane 14: MamL13
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Mambwe-Lungu Bible © The Bible Society of Zambia, 2013
