Yoane 13

Yesu wafula alondezi yakwe ingazo

1Kwasile sile uwanda onga kufika ku kuzevya kwa Cimulo ca Ucilo. Yesu wamanyile vino kasita kati kafika ka kufuma mu nsi kuya kuli Isi. Pano insita zyonsi watemilwe akwakwe yano ali mu nsi. Wene wayatemilwe cuze.

2Lyene lino yatali yalye cakulya ca manguzi, Ciwa aingila mu mwenzo wakwe Yuda Iskalyoti, mwana wakwe Simoni, amutunka kuti akoope Yesu. 3Yesu, wamanyile vino Isi wamupeela maka yonsi, na vino wafumile kuli Leza nga nupya ali nu kuswilila kuli Leza. 4Caleka akatuka pa cakulya, azula ikoti lyakwe alika pa mbali, atoola cikutulo anyepa mu musana. 5Lyene aitila manzi mu lweso lwa kufulalilamo nga atandika kufula ingazo zya alondezi, nu kuzikumbula ni cikutulo cino wanyefile mu musana. 6Alino aiiza kuli Simoni Petulo nga nawe amunena ati, “Mwene, uzye wewe umafula ingazo zyane?”

7Yesu amwaasuka ati, “Cino nkucita ndakai utacimanyile, lelo ulacimanya pacisila.”

8Petulo avwanga ati, “Utalinzile kufula ingazo zyane.” Yesu amunena ati, “Ndi ntafuzile ingazo zyako ale mu cumi usi wakwane.”

9Simoni Petulo amunena ati, “Mwene fwandi utafula sile ingazo zyane, lelo umfule minwe nu mutwe kwene!”

10Yesu ati, “Uwataowa mwili onsi wene aswefile konsi, nupya atangalonde koowa suka sile kufulala maulu yakwe. Mwensi kwene mwemwe aswepe, suka sile wenga.” (11Pano wamanyile wino amamukoopa caleka Yesu wavwanzile ati, “Mwensi kwene mwemwe aswepe, suka sile wenga.”)

12 # Luk 22:27 Lyene lino Yesu wamala kufula ingazo zyao, azwala ikoti lyakwe aikala, nga nupya ayauzya ati, “Uzye mwati mumanya cino namucitila?” 13“Mukangama mukuti kasambilizya, nu Mwene. Mukalungika pano avino ndi. 14Nemo, ne Mwene nupya kasambilizya winu nati mfula ingazo zinu. Namwe kwene mulinzile kufulana ingazo. 15Pano nati mupela cilangililo, kuti namwe kwene mwacita ndi vino nali namucitila. 16#Mat 10:24; Luk 6:40; Yoa 15:20 Cumi namunena vino kusi muomvi alusile mwene wakwe, nanti nkombe yaluta wino waituma. 17Ndakai mwati mumanya vintu vii, nga ndi mukuvicita mulaya alongo.

18 # Mas 41:9 “Ntakulanda pamulandu wakwe mwemwe mwensi. Manyile yao yano nasolola. Lelo ilembelo lilinzile lifikiliziwe, lino likati, ‘Umuntu wino akulya pamwi nani watankatukila.’ 19Ndakai namunena cii na lino citali cicitike, kuti lino cilacitika, muce mutaile vino ‘Nene ali Nene kwene.’ 20#Mat 10:40; Mk 9:37; Luk 9:48; 10:16 Cumi namunena vino wino wensi akunzengela, ala wazengela wino uwantuma.”

Yesu wasowela vino umwi amamukoopa

(Mat 26:20-25; Mk 14:17-21; Luk 22:21-23)

21Pacisila lino Yesu wavwanga vii, aaziwa cuze mu mwenzo, nga avwanga paswe ati, “Cumi namunena vino wenga uwa munomuli amankoopa.”

22Alondezi yacecetana, nga yasima mu myenzo pali vino wavwanga. 23Wenga uwamu alondezi, wino Yesu watemilwe, watenzi pipi na Yesu lino yali pa cipango yakulya. 24Lyene Simoni Petulo amukapizya, nga amunena ati, “Muzye atunene umuntu wino akulanda.”

25Caleka mulondezi apalamila pa cifuwa cakwe Yesu, nga amuuzya ati, “Mwene, uzye aweni wino ukulanda?”

26Yesu aasuka ati, “Awiyo wino namatelela cimokolwa ca mukate nga mupele.” Caleka atoola cimokolwa ca mukate, atela mu lweso, acipeela kuli Yuda, mwana wakwe Simoni Iskalyoti. 27Lilyo kwene lino Yuda walya mukate, Ciwa aingila munoli. Lyene Yesu amunena ati, “Kalauka kacite cino uli nu kucita!” 28Lelo patali umuntu nanti umwi pali yao ali pa cipango yakulya, wino wilwike cino Yesu wamunenile vii. 29Pano Yuda wali akasunga wa cipao ca mpiya, alondezi yamwi yelenganya vino Yesu watamunena kuya kala vintu vino yulilwe pa kuzevya cimulo, nanti kuti akapele cimwi ku apina.

30Alino Yuda apokelela mukate, nga lilyo kwene afuma. Wali usiku.

Isunde lipya

31Walanga lino Yuda wafuma, Yesu ayanena ati, “Ndakai lulumbi lwa Mwana wa Muntu lwasokololwa. Na Leza lulumbi lwakwe lwasokololwa mu Mwana wa Muntu. 32Ndu lulumbi lwakwe Leza lwasokololwa mu Mwana, lyene Leza alasokolola lulumbi lwa Mwana wa Muntu munoli umwisikulu. Endi, alacita zuwa. 33#Yoa 7:34 Mwe ana yane, namaya namwe pa kasita kanono sile. Mulandonda, lelo namunena vino nanenyile intunguluzi zya Ciyuda, inti ‘Mutangaya kuno nkuya.’ 34Ndakai namupeela isunde lipya lyakuti mwatemwana. Ndi vino nani namutemwa, avino namwe mulinzile kutemwana. 35Ndi mukutemwana lyene antu yonsi yalamanya vino mwemwe alondezi yane.”

Yesu wasowela vino Petulo amamukana

(Mat 26:31-35; Mk 14:27-31; Luk 22:31-34)

36Simoni Petulo auzya Yesu ati, “Mwene uzye umaya kwi?” Yesu amwaasuka ati, “Ndakai utangandondela kuno nkuya, lelo ulandondela pacisila.”

37Petulo amuuzya ati, “Mwene uzye pacani cino ntangankulondele ndakai? Nemo naiteyanya ukufwa pamulandu wako.”

38Yesu aasuka ati, “Uzye wati uiteyanya ukufwa pamulandu wane? Nakunena vino lino mukolwe atacili alamule wemo umankana maila yatatu ale ukuvwanga vino utamanyile.”

Выбрано:

Yoane 13: MamL13

Выделить

Копировать