Luka 18

Ichili icha mukolo umufwilwe nu mulongi

1Po u Yesu akababuzya abamanyili bache ichili pakubamanyizya ukuti biputaye akabalilo kosi nukusita ukulita. 2Akati, “Mukaya kamo mukabamo umulongi yumo, yuyo atakamunyilagha u Chala, pamo ukubachindika abantu. 3Sona mukaya mulamula mukaba umukolo umufwilwe, yuyo akizagha kukwache kabilikabili pakumulambilizya ukuti, ‘Undongeleko inongwa nu mulwani wane!’ 4Akabalilo akatali umulongi yula akakanagha pakulonga inongwa yila, loli pisinda pache akanena mumoyo wache akati, ‘Napapo ntakumunyila u Chala, pamo ukubachindika abantu, 5loli pachifukwa chakuti umufwilwe uyu akuntamya, inkwiza pakumulongela inongwa yache, umwakuti atakanditizye nu kukwiza kwache kabilikabili.’ ”

6Po u Mwene akati, “Teghelezya vivyo umulongi uwamabeko uyu akanena. 7Nkimba u Chala atakwiza pakubalongela akiza abantu bache, babo bakumulilila umusanya nu busiku? Nkimba akwiza pakuzyela-zyela pakubavwa? 8Inkubabuzya ukuti akwiza pakubalongela akiza, sona akwiza pakubomba umwalubilolubilo. Loli bo u Mwana uwa Muntu akwiza, nkimba akwiza pakulwagha ulwitiko pachisu ichapasi?”

Ichili icha mu Falisayi nu musonkezya sonko

9U Yesu akababuzya sona ichili ichinji abantu babo bakituvyanga ukuti bagholosu nukubasula abanji. 10Akati, “Kukabako abantu bamo babili, babo bakabuka pakwiputa mu Nyumba iya Chala. Weka akaba mu Falisayi, uyunji akaba musonkezya sonko.

11“Umu Falisayi akimilila pamwene nukwiputa#18.11 akimilila pamwene nukwiputa: Amasimbo ghamo aghakale ghasimbite ukuti akimilila nukwiputila mwene. ukuti, ‘Chala, inkukupalizya pakuti inte ne mupavu, sona inte ne mubomba mbibi, pamo mulowe ngati bo bantu bamo. Inkukupalizya pakuti intayanite nu musonkezya sonko yula. 12Ane inkutuzya pakulya amasiku mabili mwasabata weka, sona inkubika ichigaba choka pa vigaba 10 ivya vyosi vivyo inkupokela.’ 13Loli umusonkezya sonko akimilila pa butalipo, sona atakalonda ukwennya na kumwanya. Loli akikoma pachifuba nukuti, ‘Wee Chala, umpelele ichisa, ane ne wambibi.’ ”

14 # Mat. 23.12; Luk. 14.11 U Yesu akati, “Inkubabuzya ukuti umusonkezya sonko akabwela kunyumba, bo u Chala amunena pakuba mugholosu pamaso papache, umu Falisayi yula, awe. Pakuti umuntu wesi yuyo akwikwezya mwene akwiza pakwisiwa, sona umuntu wesi yuyo akwiyisya mwene akwiza pakukweziwa.”

U Yesu akubasaya abana

(Mat. 19.13-15; Mlko. 10.13-16)

15Abantu bamo bakiza na bana kwa Yesu ukuti abasaye pakubika inyobe zyache. Loli bo abamanyili bache bennya zinizi, bakabachemela. 16Loli u Yesu akabitizya abana bala nukuti, “Baleke abana bize kukwane, mutakabakanizye pakuti Ubumwene ubwa Chala ubwa bantu babo bali ngati bo aba. 17Naloli inkubabuzya ukuti umuntu wesi yuyo atakupokela Ubumwene ubwa Chala ngati we mwana, ate akinjilemo nalumo.”

Nizya muntu umukabi

(Mat. 19.16-30; Mlko. 10.17-31)

18Umulongozi yumo uwa Chiyuda akamulalusya u Yesu akati, “Wee Mumanyisi umwiza, nkimba imbombe ichoni ukuti impokele ubumi ubwa bwila na bwila?”

19U Yesu akamula akati, “Nkimba choni chicho ukunyitizya ukuti ne mwiza? Nayumo umuntu yuyo mwiza, loli u Chala mwene. 20#Ukf. 20.12-16; Ukk. 5.16-20Ughamenye amalamulo aghakuti: Utakalowaye, utakaghoghaye, utakibaye, utakabanje we kaboni umumyasi, sona chindika ughuso nu nyoko.”

21Umuntu yula akamula akati, “Inkonkite amalamulo ghosi ghanagha ukwandila kubwana bwane.”

22Bo u Yesu ivwa zinizi, akamubuzya akati, “Ukusobelwa ichintu choka bulo: Kaghulizye vyosi vivyo uli navyo nukubapa abapina indalama, po ukwiza pakuba nu bukabi kumwanya, po wize nukunkonka.” 23Loli bo umuntu yula ivwa zinizi, akaba ni chitima pachifukwa chakuti akaba mukabi nkani.

24U Yesu akennya ukuti umuntu yula akaba ni chitima, po akati, “Chipala nkani ukuti abantu abakabi binjile mu Bumwene ubwa Chala. 25Chipala nkani ukuti umuntu umukabi injile mu Bumwene ubwa Chala ukuchila ukuti ingamila yinjile mu kabwazi aka sindano.” 26Po abantu babo bakamwivwa akunena bakalalusya bakati, “Po nkimba we wenu angapokiwa?” 27U Yesu akamula akati, “Zinizi zitangabombiwa nu muntu, loli nu Chala. Pakuti nu Chala ichintu chosi chipepe bulo.”

28U Pitala akati, “Ennya, twavileka vyosi nukukukonka awe.”

29U Yesu akababuzya akati, “Ee, naloli inkubabuzya ukuti umuntu wesi yuyo akalekite akaya, pamo umuchi, pamo abakamu, pamo abapapi, pamo abana pachifukwa icha Bumwene ubwa Chala, 30akwiza pakupokela ivintu ivyinji ukuchilapo akabalilo aka, sona akwiza pakupokela ubumi ubwa bwila na bwila pakabalilo kako kakwiza.”

U Yesu akunena akabutatu nizya bufwe nu kuzyuka kwache

(Mat. 20.17-19; Mlko. 10.32-34)

31U Yesu akabasendela abamanyili bache 12 bala palubazu nukubabuzya ukuti, “Ivwa kuno, tukubuka mu Yelusalemu, mumo vyosi vivyo abalaghuzi bakasimba nizya Mwana uwa Muntu vikwiza pakukwanilisiwa. 32Akwiza pakubikiwa munyobe izya bantu babo bate ba Yuda, babo bakwiza pakumobezya, nukumutuka, sona nukumufwinila amati. 33Bakwiza pakumusyempa nukumughogha, loli bo ghachilapo amasiku matatu, akwiza pakuzyuka kubufwe.”

34Loli abamanyili bache batakivwisya nachimochimo pavyosi vinivi. Iching'anamulo icha mazyu chikafisiwa kukwabo, po batakamanya vivyo u Yesu akanenagha.

U Yesu akumupozya umuntu umufwamaso

(Mat. 20.29-34; Mlko. 10.46-52)

35Bo u Yesu akupalamila ku Yeliko, kukabako umuntu umufwamaso yuyo akikalagha mulubazu ulwa musebo nukulabalaba. 36Bo ivwa ukuti ichilundilo chikudumusannya, akalalusya akati, “Nkimba cho choni chicho chikubombiwa?”

37Bakamubuzya bakati, “U Yesu uwa mu Nazaleti akudumusannya.”

38Akakolomoka nkani akati, “Wee Yesu, u Mwana uwa Devedi, umpelele ichisa.”

39Abantu babo bakaba kuntazi bakamuchemela nukumubuzya ukuti abanje myee. Loli akakolomoka nkani akati, “Mwana uwa Devedi, umpelele ichisa!”

40U Yesu akima nukulamula ukuti bize nawe umufwamaso yula kukwache. Bo biza nawe papipi, u Yesu akamulalusya akati, 41“Nkimba ukulonda inkubombele ichoni?”

Akamula akati, “Wee Mwene, nkulonda pakwennya sona.”

42U Yesu akamubuzya akati, “Ennya! Ulwitiko lwako lwakupozya.”

43Panapo na panapo umuntu yula akanda pakwennya nukumukonka u Yesu, bo akumupalizya u Chala. Bo ichilundilo icha bantu chennya zinizi, chosi chikamupalizya u Chala.

Выбрано:

Luka 18: LMBNT2016

Выделить

Копировать