Yuhanná 7
7
Issá gón brátán
1Randá, Issáyá Jalilá tarr o tába kort. Yahudi áiay kóshay randá atant, paméshká nalótheti Yahudiahá bemánit. 2Anchosh ke Yahudiáni Kápáráni#7:2 Kápár, kápar, kapar. Aid nazzikk but, 3Issáay brátán gón áiá gwasht: “É jáhá yalah kan o Yahudiahá beraw tánke tai morid hamá kárán begendant ke taw kanay. 4Kasé ke námdária lóthit, chérokái kára nakant. Taw ke é kárána kanay, bell ke sajjahén donyá tará begendit.” 5Chéá ke brátán ham áiay sará imán néstat.
6Issáyá gón áyán gwasht: “Mani wahd angat nayátkag, bale pa shomá har wahd sharr ent. 7Donyá cha shomá naprat korta nakant bale cha man naprata kant, chéá ke man donyáay mardománi bárawá gwáhia dayán ke áyáni kár sell ant. 8Shomá é aidá berawét, man é aidá nayáyán, chéá ke mani wahd angat narasetag.” 9Issáyá é habar gón áyán gwasht o Jalilay damagá#7:9 Damag, bezán hand, elákah, ostán, subah. dáshti.
Issá Urshalimá rawt
10Issáay brát ke aidá Urshalimá shotant, randá áiay jend ham hamódá shot, bale mardománi chamdidá nashot, chérokái shot. 11Aiday róchán, Yahudi áiay shóházá atant o jost o porsesha kort ke á kojá ent? 12Áiay bárawá mardománi nyámá bázén gappé chérokái tarragá at. Lahtén gwashagá at: “Á sharrén mardé.” Dega lahtén gwashagá at: “Mardomán gomráha kant.” 13Bale cha Yahudiáni torsá, kassá mardománi démá áiay bárawá heccha nagwasht.
14Aiday nyámi róchán, Issá mazanén parasteshgáhá shot o mardománi tálim dayagá goláésh but. 15Yahudián pa hayráni gwasht: “É mardá nawántag, inchok zántkári cha kojá áwortagi?” 16Issáyá áyáni passawá gwasht: “Mani tálim mani naant, mani dém dayókayg ant. 17Harkas ke Hodáay wáhagán sarjam kanag belóthit, zánt ke mani tálim Hodáayg ant yá man cha wat habara kanán. 18Harkas ke cha wat habara kant, pa wati mazaniay pésh dáragá habara kant. Bale á kas ke wati dém dayókay shán o shawkatay lóthóka bit, tachkén mardomé o áiay hecch chizz nárást naent. 19Mussáyá shomárá Sharyat nadátag? Angat cha shomá hechkas Sharyatá dáragá naent. Parchá maná koshaga lóthét?”
20Mardomán gwasht: “Tará jenné per ent, kay tará koshit?” 21Issáyá áyáni passawá gwasht: “Man tahná yakk káré kortag o shomá sajjahén chó hayrán o habakkah ét. 22Mussáyá sonnat kanagay rasm shomárá dát, paméshká shomá Shabbatay róchá wati mardénchokkán sonnata kanét. Albat é rasm cha Mussáyá bongéj nabutag, cha kawmay pet o pirokán bongéj butag. 23Nun agan pa Mussáay Sharyatay napróshagá shomá Shabbatay róchá mardénchokkán sonnata kanét, chéá mani sará zahr geptagét ke man Shabbatay róchá yakk mardomé sarjamá dráh kortag? 24Záherá machárét o paysalah makanét, wati shawr o hokmán pa ensáp beborrét.”
Issá kay ent?
25Gorhá Urshalimay lahtén mardom gwashagá lagget: “É hamá naent ke eshiay koshagay randá ant? 26Bechárét, mardománi démá habar kanagá ent o kass eshiá heccha nagwashit. Balkén rájay sarók é natijahá rasetagant ke é hamá wádah dátagén Masih ent? 27Má zánén ke é mard cha kojám hand o damagá ent, bale wahdé Masiha kayt, hechkasa nazánt ke cha kojá kayt.” 28Paméshká, wahdé Issá mazanén parasteshgáhá mardomán tálim dayagá at, gón borzén tawáréá gwashti: “Shomá maná pajjáha kárét o zánét ke cha kojá átkagán, bale man cha wati némagá nayátkagán, mani dém dayók hamá rástén Hodá ent o shomá áiá nazánét. 29Man áiá zánán, chéá ke cha áiay kerrá átkagán o hamáiá maná ráh dátag.” 30Hamé wahdá áyán lóthet ke Issáyá dazgir bekanant, bale hechkasá áiay némagá dast nashahárt, parchá ke áiay wahd angat narasetagat. 31Cha mocchiay mardomán bázénéá áiay sará imán ham áwort o gwasht: “Wahdé Masiha kayt, cha é mardá géshter mójezah o ajabbatén nesháni pésha dárit?”
Issáay dazgir kanagay kóshest
32É gapp o habar ke mardomán chérokái Issáay bárawá kortant, Parisián eshkotant. Gorhá Parisi o mazanén dini péshwáyán pa Issáay dazgir kanagá, parasteshgáhay sepáhig rawán dátant. 33Issáyá gwasht: “Man pa kammokén wahdéá shomay kerrá án o randá wati dém dayókay kerrá rawán. 34Shomá mani shóházá gardét, bale maná dar gétka nakanét o á jáhá ke mana rawán, shomá átka nakanét.” 35Gorhá Yahudián gón yakdegará gwasht: “Kojá rawt ke má áiá dar gétka nakanén? Bárén may hamá mardománi kerrá rawt ke Yunániáni nyámá sheng o sháng ant o ódá Yunánián ham tálima dant? 36É habar ke áiá gwasht: ‘Shomá mani shóházá gardét, bale maná dar gétka nakanét’ o ‘á jáhá ke mana rawán, shomá átka nakanét,’ áiay é habaray maksad ché ent?”
Zendáp
37Aiday áheri o masterén róchá, Issá óshtát o pa borztawári gwashti: “Agan kasé tonnig ent, mani kerrá byayt o áp bwárt. 38Hamá dhawlá ke Hodáay Pákén Ketába gwashit, harkas ke mani sará báwara kant, zendápay kawr cha áiay del o daruná rombant o tachant.” 39É habar áiá Pákén Ruhay bárawá gwasht, hamá Pákén Ruh ke áiay báwarmandán rasagi at. Issáyá angat shán o shawkat narasetagat, paméshká angat áyán Pákén Ruh dayag nabutagat.
Mardománi nátepáki
40Gón é habaráni eshkonagá, lahtén mardom gwashagá lagget: “Pa rásti é mard hamá wádah dátagén Nabi ent.” 41Dega lahténá gwasht: “É Masih ent.” Bázénéá chosh ham gwasht: “Masih cha Jalilá kayt? 42Pákén Ketába nagwashit ke Masih cha Dáuday nasl o padréchá#7:42 Padréch, bezán nasl, chokk o óbádag. bit o cha áiay shahr Bayt-Lahemá kayt?”#7:42 Samwél Káziay Domi Ketáb 7:12 o rand; Miká Nabiay Ketáb 5:2. 43É paymá Issáay bárawá mardománi nyámá nátepákié kapt. 44Lahténá lóthet ke áiá dazgir bekanant, bale hechkasá áiay némagá dast nashahárt.
Yahudi sarókáni nábáwari
45Randá, parasteshgáhay sepáhig#7:45 Sepahig, bezán pawji, arteshi, lashkari., Parisi o mazanén dini péshwáyáni kerrá per tarretant. Áyán cha sepáhigán jost kort: “Shomá chéá Issá nayáwortag?” 46Sepáhigán gwasht: “Tán é wahdi hechkasá é marday dhawlá habar nakortag.” 47Parisián gwasht: “Shomá ham gomráh butagét? 48Cha kawmay sarók o Parisián yakkéá áiay sará báwar kortag? 49Bale mardománi hamá romb ke Sharyatay bárawá heccha nazánt, nálatié.” 50Nikudimus ke wat cha Parisián yakké at o pésará Issáay kerrá átkagat, gwashti: 51“Bárén, may Sharyat márá ejázata dant ke kaséay habaráni gósh dárag o káráni zánagá pésar, áiá mayárbár bekanén?” 52Áiay passawá gwashtesh: “Taw ham cha Jalilay mardomán ay? Wat patth o pól kan o bechár, hecch nabié cha Jalilá chesta nabit.”
Выбрано:
Yuhanná 7: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.