Yuhanná 6
6
Panch hazár mardomá warák dayag
(Mattá 14:13–21; Markás 6:32–44; Luká 9:10–17)
1Randá, Issá Jalilay Mazangwarm#6:1 Mazangwarm, bezán daryáchah. bezán Teberiahay Mazangwarmay á dastá shot. 2Mardománi mazanén rombé#6:2 Romb, bezán gróh, thóli. áiay randá kapt, chéá ke áyán é mójezah o ajabbatén nesháni distagatant ke Issá nádráhán dráha kant. 3Gorhá Issá kóhéay sará sar kapt o gón wati moridán hamódá nesht. 4Yahudiáni Sargwazay Aid nazzikk at.
5Wahdé Issáyá chamm chest kortant o dist ke mardománi mocchié dém pa áiá pédák ent, gón Piliposá gwashti: “Nán cha kojá bezurén ke é mardom warák bwarant?” 6Issáyá é habar pa áiay ázmáesh kanag o chakkásagá#6:6 Chakkásag, bezán ázmáesh kanag, emtehán kanag. gwasht, chéá ke wat zánti maná ché kanagi ent. 7Piliposá gwasht: “Do sad dináray#6:7 Yakk dinár, yakk róchay mozz at. nán ham bassa nabit, toré harkas kammok kammok bwárt.” 8Cha áiay moridán yakké ke námi Andriás at o Shamun-Petrosay brát at, gwashti: 9“Bachakké hamedá ent ke panch jawén nagan o do máhigi gón, bale pa inchok mardomá ché bant?” 10Issáyá gwasht: “Mardomán benendárénét.” Á jágahá bázén káh o sabzagé#6:10 Sabzag, bezán káh. rostagat. Mardom hamódá neshtant. Cha áyán kesás panch hazár mardén atant. 11Issáyá nagan zortant, Hodáay shogri gept o neshtagén mardománi sará bahri kortant, máhig ham anchosh. Harkasá haminchok ke lóthet, dáti.
12Wahdé sajjahénán sér kort, gón moridán gwashti: “Sar átkagén thokkorán bechenet o yakjáh kanét ke zawál mabant.” 13Gorhá thokkoresh chet o yakjáh kortant. Á panchén jawén nagan ke mardomán wártagatant, cha áyáni sar átkagén thokkorán dwázdah sapt#6:13 Sapt, bezán sabad, mazanén challi, sáchi. porr but. 14Mardomán ke Issáay é mójezah o ajabbatén nesháni dist, gwashtesh: “Pa rásti, é hamá wádah dátagén Nabi ent ke jaháná áyagi at.” 15Issáyá zánt ke mardom maná pa zór barag o bádsháh kanaga lóthant, paméshká padá cha mardomán dur but o tahná kóhá shot.
Issá ápay sará gáma jant
(Mattá 14:22–33; Markás 6:45–51)
16Bégáhá morid dém pa gwarmá shotant. 17Bójigéá#6:17 Bójig, bezán lánch, kashti. neshtant o gwarmay á dastá, dém pa Kaparnáhumá ráh geptant. Nun tahár butagat o Issá angat áyáni kerrá nayátkagat. 18Trondén gwáté kasshagá at o chawl o mawj chest butant. 19Wahdé kesás panch tán shash kilumitar#6:19 Asligén Yunáni nebeshtánka gwashit: “bist o panch yá si estádi”. Yakk estádié kesás 180 mitar butag. hólig#6:19 Hólig, bezán páru. janáná démá shotant, Issáesh dist ke ápay sará gám janán, dém pa bójigá pédák ent. Torsetesh. 20Bale Issáyá gwasht: “Matorsét, é man án.” 21Anchó ke moridán lóthet áiá bójigá swár bekanant, bójig menzelá sar but.
22É dega róchá, hamá mardom ke gwarmay á dastá mantagatant sarpad butant ke cha hamá bójigá abéd ke morid swár butagatant, dega bójig ódá nabutag. Issá á bójigá swár nabutagat o morid bé áiá shotagatant. 23Randá, dega lahtén bójig cha Teberiahá hamá jágahá átk o raset ke ódá Hodáwandén Issáyá Hodáay shogr geptagat o mardomán nán wártagat. 24Wahdé mardomán dist ke na Issá ódá ent o na áiay morid, Issáay shóházá bójigán swár butant o dém pa Kaparnáhumá shotant.
Issá zenday nán ent
25Wahdé Issáesh gwarmay á dastá dist, gwashtesh: “Ostád! Taw kadi edá átkagay?” 26Issáyá áyáni passawá gwasht: “Shomárá rásténa gwashán, é háterá maná shóház nakanagá ét ke shomá mani mójezah o ajabbatén nesháni distagant, paméshká maná shóház kanagá ét ke shomá nán wárt o sér kort. 27Bale pa é zawál bayókén waráká johd makanét, pa hamá waráká johd bekanét ke abadmánén zenda bakshit, pa hamá waráká ke Ensánay Chokk shomárá danti. Chéá ke Hodáén Petá áiay sará wati razámandiay mohr jatag.” 28Gorhá jostesh kort: “Má chón hamá kárán sarjam bekanén ke Hodáesh cha má lóthit?” 29Issáyá passaw dát: “Á kárá ke Hodá cha shomá lóthit, á kár esh ent: Hamá kasay sará imán byárét ke Hodáyá ráh dátag.” 30Áyán gwasht: “Taw chónén ajabbatén nesháni pésha dáray ke má begendén o tai sará imán byárén? Ché kanay? 31May pet o pirokán gyábáná mann#6:31 Mann hamá nagan ent ke Mussáay zamánagá, Hodáyá gyábáná pa Esráilián éra gétk. wárt, anchosh ke Pákén Ketába gwashit: ‘Áiá cha ásmáná nagan rawán dát ke bwarant.’”#6:31 Darraw 16:4 o rand; Zabur 78:24–25.
32Gorhá Issáyá gwasht: “Shomárá rásténa gwashán, é Mussá naat ke shomárá cha ásmáná ér átkagén nagania dát. É mani Pet ent ke cha ásmáná asligén náná shomárá bakshit. 33Chéá ke Hodáay nán hamá ent ke cha ásmáná éra kayt o jaháná zenda dant.” 34Nun gón áiá gwashtesh: “Oo wájah! É náná modám márá beday.”
35Issáyá gwasht: “Zenday nán man án. Harkas ke mani kerrá kayt, hechbar shodiga nabit. Harkas ke mani sará báwara kant, hechbar tonniga nabit. 36Bale hamá dhawlá ke gwashton, shomá maná distag o angat báwara nakanét. 37Á sajjahénán ke Pet maná dant, á mani kerrá káyant. Harkas ke mani kerrá kayt, man áiá hechbar cha wat dura nakanán. 38Man pa wati jenday wáhagáni sarjam kanagá cha ásmáná ér nayátkagán, átkagán ke wati dém dayókay wáhagán sarjam bekanán. 39Mani dém dayókay wáhag ent ke hamá mardom ke áiá maná dátagant, cha áyán yakké ham cha mani dastá marawt o áheratay róchá áyán padá zendag bekanán. 40Chéá ke mani Petay wáhag hamesh ent ke harkas ke Chokkay némagá delgósha kant o áiay sará imána kárit, abadmánén zenday wáhond bebit o man á mardomá áheratay róchá zendaga kanán.”
41Gorhá Yahudián áiay sará irád gerag o norondhag bendát kort, chéá ke áiá gwashtagat: “Man hamá nán án ke cha ásmáná ér átkag.” 42Áyán gwasht: “É mard Issopay chokk Issá naent? Má wa eshiay pet o mátá zánén. Gorhá chóna gwashit ke man cha ásmáná ér átkagán?” 43Issáyá áyáni passawá gwasht: “Watmánwatá irád gerag o norondhagá band kanét. 44Kass tán hamá wahdá mani kerrá átka nakant ke Pet, bezán mani dém dayók áiá mani némagá mayárit. Harkas ke kayt, man áiá áheratay róchá zendaga kanán. 45Nabiáni Ketábán nebisag butag: ‘Sajjahén cha Hodáyá tálima gerant.’#6:45 Eshayá Nabiay Ketáb 54:13; Eremyá Nabiay Ketáb 31:33 o rand. Harkas ke Petay habarán beshkont o cha áiá tálim begipt, mani kerrá kayt. 46Kassá Pet nadistag abéd cha hamáiá ke cha Hodáay kerrá átkag. Tahná hamáiá Pet distag. 47Shomárá rásténa gwashán, á ke imána kárit abadmánén zenday wáhonda bit. 48Zenday nán man án. 49Shomay pet o pirokán gyábáná mann wárt, bale angat mortant. 50Cha ásmáná ér átkagén nán esh ent, shomay démá ent. Harkas ke eshiá bwárt, namerit. 51Man hamá zend bakshókén nán án ke cha ásmáná ér átkag. Harkas ke é náná bwárt, tán abad zendaga mánit. É náná ke mana dayán, mani jenday jesm o ján ent ke pa jahánay mardománi zendá nadria kanán.”
52Nun Yahudián pa jérhah o dapják watmánwatá gwasht: “É mard chón wati jesm o jáná dant ke má bwaréni?” 53Issáyá gwasht: “Shomárá rásténa gwashán, agan shomá Ensánay Chokkay jesm o jáná mawarét o áiay hóná manóshét,#6:53 Edá, jánay warag o hónay nóshagá yakk ruhánién mánáé hast. abadmánén zendá sara nabét. 54Harkas ke mani jesm o jáná bwárt o mani hóná benóshit, abadmánén zenday wáhonda bit o áheratay róchá man áiá zendaga kanán. 55Chéá ke mani jesm o ján asligén warák o mani hón asligén nósháp#6:55 Nósháp, bezán tengag o nóshagi chizz. ent. 56Harkas ke mani jesm o jáná bwárt o mani hóná benóshit, á mani del o daruná mánit o man áiay del o daruná.
57Anchó ke namiránén#6:57 Namirán, bezán hamá ke hechbara namerit. Petá maná rawán dát o man áiay barkatá zendag án, hamé paymá harkas ke mani jesm o jáná bwárt, mani barkatá zendaga mánit. 58É nán ke cha ásmáná ér átkag, á naganay paymá naent ke shomay pet o pirokán wárt o angat mortant, chéá ke harkas ke é náná bwárt, tán abad zendaga mánit.” 59Issáyá é chizz hamá wahdá gwashtant ke Kaparnáhumay kanisahá#6:59 Kanisah, bezán Yahudiáni parasteshgáh. tálim dayagá at.
Petrosay mannag o gwáhi
60É habaráni eshkonagá rand áiay bázén moridéá gwasht: “É gránén habaré, eshiá kay manneta kant?” 61Wahdé Issáyá dist ke morid é habaray sará norondhagá ant, gwashti: “Shomárá é habara tawrénit? 62Agan Ensánay Chokká begendét ke wati pésarigén jágahá borzáda rawt, gorhá ché kanét? 63Ruh ent ke zenda dant, haddh o góshtá páedagé nést. É habar ke man gón shomá kortant, Ruh o zend ant. 64Bale cha shomá lahténá imán nést.” Chéá ke á mardom ke imánesh néstat, Issáyá cha bendátá pajjáh áwortant o zánti ke kay maná dróhit#6:64 Dróhag, bezán hamráhdári nakanag, helápá rawag. o dozhmenáni dastá dant. 65Gorhá gwashti: “Paméshká man gwasht ke kass mani kerrá átka nakant, tán wahdé ke mani Pet áiá imán mabakshit.”
66Cha ed o rand, bázén moridéá Issá yalah dát o nun áiay hamráh nabutant. 67Gorhá Issáyá cha wati dwázdahén kásedán#6:67 Issáyá cha wati moridán dwázdah kas gechén kort o wati kásed náméntant ke berawant o wasshén mestágá á dega mardomán sar bekanant. Bechár Mattáay Enjil, dar 10, band 1-2. jost kort: “Bárén, shomá ham maná yalah dayaga lóthét?” 68Shamun-Petrosá passaw dát: “Oo Hodáwand! Kai kerrá berawén? Abadmánén zenday gál o habar tai kerrá ant o 69márá báwar ent o zánén ke taw hamá Pákén ay ke Hodáyá dar chetag.” 70Issáyá gwasht: “Man shomárá gechén kort, dwázdahénon gechén kortant, bale padá ham cha shomá yakké eblisé.” 71Áiay maksad Shamun Eskaryutiay chokk Yahudá at. Bell toré á cha dwázdahénán yakké at, bale áiá randá Issá dróhet o dozhmenáni dastá dát.
Выбрано:
Yuhanná 6: HPKB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2015-2022, Wycliffe Bible Translators, Inc. and the Balochi Bible Translation Team. All rights reserved.