Matayo 10
10
Amaziina g'abeegi ikumi na babiri
1 #
Luk 9:1-5; Mak 6:7-13. Yaayeta abeegi be ikumi na babiri, yaabaha obushoboorozi bw'okubinga baadaimoni, n'okukiza endwara zoona n'obumuga bwona. 2#Yoh 1:40, 49. Amaziina g'abeegi ikumi na babiri nigo aga: ow'okubanza ni Simooni orikwetwa Petero, na Anderea omurumuna; na Yakobo mwene Zebedaayo, na Yohaana omurumuna; 3Filipo na Batolomaayo; Tomasi na Matayo omuhooza; Yakobo mwene Alufaayo na Tadaayo, 4Simooni Omukananaayo na Yuda Iskaryota owaamureebize.
Yesu okutuma abeegi be
5Abo ikumi na babiri Yesu akabatuma, yaabaragiira ati: Mutariza omu banyamahanga n'obu kwakuba okutaaha omuri tauni yoona ey'Abasamaria; 6#Byak 13:46; Yer 50:6. kureka mugyende omu ntaama ezaabuzire ez'omu ruganda rw'Abaisraeli. 7Omu kugyenda mugyende nimugamba muti: obukama bw'omu iguru bwiriire haihi. 8#Byak 20:33. Mukize abarwaire, muzoore abafiire, mushemeze ababembe, mubingye baadaimoni. Mukaheerwa busha, naimwe muheere busha. 9Mutaritwara ezaabu nari efeeza nari emiringa omu nshaho zaanyu; 10#Luk 10:4; 1 Tim 5:18. omurugyendo rwanyu mutaritwara efurebe, nari amakanzu abiri, nari enkaito, n'obu yaakuba enkoni; ahabw'okuba omukozi ashemereire kuheebwa eby'okumutunga. 11Tauni yoona nari ekirorero kyona, omu muritaaha, mubanze musherure omuntu waamwo oshemereire, mube niwe mwaraarira okuhitsya obu murirugayo. 12Ku muriba nimukitaaha omu nju egyo, mugiramutsye. 13Enju ku eribashemerera, etungye obusingye bwanyu; ku eriba etabashemereire, obusingye bwanyu bubagarukire. 14#Byak 13:51; 18:6. Omuntu weena ku aryanga kubakunira nari okuhurira ebigambo byanyu, ku muriba nimuruga omu nju egyo nari omu tauni egyo, mukunkumure omucuucu gw'omu bigyere byanyu. 15Nimbagambira amazima nti; Aha kiro ky'okucwa orubanja, ekifubiro ky'ensi ya Sodoma na Gomora kiryaba ekirikubaasa kwemerwa okukira ekya tauni egyo.
Okuhiigwa kw'abeegi be
16 #
Yoh 10:12; Byak 20:29; Efe 5:15. Reeba, nimbatuma nk'orukutuma entaama omu mishega; n'ahabw'ekyo mugire obwengye nk'enjoka, kandi mube nk'enkombe ezitaine buryarya. 17#Luk 21:12-17; Mak 13:9-13. Mwerinde abantu, ahabw'okuba baryabatwara omu mashengyero, baryabateerera omuri sinagogi, 18#Byak 25:23; 27:24. kandi baryabatwara omu maisho g'abategyeki n'abagabe nibabantura, ahabw'okuba baakareebi b'okumpamya omu maisho gaabo n'ag'abanyamahanga. 19Ku baribatwarayo, mutaryemereza emitima oku murigamba nari aha bi murigamba; ahakuba ebi murigamba, muryabiheebwa omu mwanya ogwo; 20mumanye ngu tiimwe murigamba, kureka Omwoyo wa Shoimwe niwe aribagambisa. 21#Mik 7:6. Mukuru w'omuntu aryahayo omurumuna kwitwa, na ishe w'omwana aryahayo omwana we; abaana baryagomera abazaire baabo babaitise; 22#Yoh 15:21. kandi muryayangwa abantu boona nibabatura eiziina ryangye. Kwonka orugumisiriza okuhitsya aha muheru, niwe arijunwa. 23Ku baribahiiga omuri tauni emwe, muhungire omu ndijo; buzimazima nimbagambira nti: Timuribuga tauni za Israeli zoona, Omwana w'omuntu atakaizire.
24 #
Yoh 13:16. Omwegi takira mwegyesa we; kandi omuhuuku takira mukama we; 25ekyakubaire gye aha mwegi n'okuba nk'omwegyesa we n'omuhuuku akaba nka mukama we. Ku baraabe beetsire nyineeka #10:25 Belezebuli: n'eiziina ry'orikwetwa “Omutegyeki w'ensi egi,” niwe Sitaane. Belezebuli, kaashwa ab'omu ka ye. 26#Luk 12:2-9. N'ahabw'ekyo mutaribatiina; ahabw'okuba tihariho ekyashwekirwe ekitarishuuruurwa, n'obu kyakuba ekyasherekirwe ekitarimanywa.#Mak 4:22. 27Eki mbagambirira omu mwirima, mugume mukigambire omu mushana; eki murihurira ikgambiirwe omu kutu, mukigambire aha mutwe gw'enju. 28Kandi mutaritiina abarikwita omubiri, kwonka tibarikubaasa kwita magara; kureka mutiine Orikubaasa kuhwerekyereza byombi, amagara n'omubiri, omuri Gehena.
29Ebiteera-nkumba bibiri tibigura sente emwe? Kwonka tihariho na kimwe ekigwa ahansi Shoimwe atakimanyire. 30Nangwa n'eishokye ery'aha mitwe yaanyu ribazirwe ryona. 31#Mat 12:12. N'ahabw'ekyo mutaritiina; ahabw'okuba nimukira ebiteera-nkumba bingi. 32Kandi buri munta orimpamya omu maisho g'abantu, naanye ndyamuhamya omu maisho ga Tata ori omu iguru. 33#Luk 9:26. Kwonka weena oriinyehakana omu maisho g'abantu, naanye ndyamwehakana omu maisho ga Tata ori omu iguru.
34 #
Luk 12:51-53. Mutateekateeka ngu nkaija kureeta obusingye omu nsi; tindaizire kureeta busingye, kureka rurara. 35Ahabw'okuba nkaija kutaanisa omwojo na ishe, omwishiki na nyina, omukazi na nyinazaara; 36abazigu b'omuntu baryaba ab'omu ka ye. 37#Luk 14:26, 27. Orikukunda ishe nari nyina okubankiza, tashemereire kuba owangye; kandi orikukunda omutabani nari muhara we okubankiza, tashemereire kuba owangye. 38#Mat 16:24, 25. Kandi oteekorera musharaba gwe, akankuratira, tashemereire kuba owangye. 39#Yoh 12:25. Orikukiza amagara ge, aryagabuza; kandi orikubuza amagara ge ahabwangye, aryagakiza.
40 #
Yoh 13:20. Orikubaikiriza, biri aikiriize nyowe; n'orikwikiriza nyowe, biri aikiriize Owantumire. 41Orikwikiriza nabi ahabw'okuba nabi, aryatunga ebihembo bya nabi; kandi orikwikiriza ohikiriire ahabw'okuba ohikiriire. 42#Mat 25:40. Kandi orikunywaisa omwe ahari aba bato enkyeka y'amaizi agarikufuka ahabw'okuba omwegi wangye, nimbagambira amazima nti: Taribura bihembo bye.
Выбрано:
Matayo 10: RR64
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
The Bible in Runyankore-Rukiga © United Bible Societies, 1964
