Oorwinning oor Beproewings - 'n Studie van 1 & 2 PetrusSample

Soek Vrede Te Midde Van Opposisie

Lees: 1 Petrus 3:8-14

SOAP: 1 Petrus 3:10-12

Daar staan geskrywe: “As iemand die lewe liefhet en 'n lang lewe begeer om die goeie te geniet, moet hy sy tong weerhou van kwaadpraat en sy lippe van leuens. Bly weg van die kwaad af en doen wat goed is, soek vrede en jaag dit na! Die Here sorg vir die opregtes en luister na hulle hulpgeroep, maar Hy tree op teen dié wat kwaad doen.”

Oordenking

Om te kies om gelukkig te wees met ons lewens en goeie dae in die voortuitsig te sien, is nie 'n vreemde idee nie; dit is 'n doelbewuste houding van geloof. Dit is gewortel in die feit dat God soewerein is oor ons wêreld. Te midde van die chaos en uitdagings wat ons almal in die gesig staar, hou ons vas aan die belofte dat beter dae voorlê vir diegene wat God ken en liefhet.

Om so te leef is nie 'n passiewe houding nie. Dit behels dat ons aktief waak oor die woorde wat ons met ander en met onsself spreek. Dit behels om seker te maak ons praat met groot sorg. Ons woorde is in staat om op te bou of af te breek (Jakobus 3:1-12). Ons word in hierdie verse herinner om woorde te kies wat waar en lewegewend is, nie bedrieglik of vernietigend nie. Ons tonge kan ons grootste bate of ons felste vyand wees. Beide lewe en dood kan gevind word in die woorde wat ons spreek (Spreuke 18:21).

Verder, as Christus se volgelinge, word ons geroep om met vasberadenheid weg te draai van die bose en om vurig na die goeie te soek. Ons het die opdrag om vrede na te streef — 'n vrede wat nie sinoniem is met selfvoldaanheid of stilte nie, maar vrede wat harmonie en eenheid soek sover dit van ons afhang (Romeine 12:18). Ons erken dat, in hierdie gebroke wêreld, volmaakte vrede met almal dalk nie realisties is nie (Romeine 14:19), maar ons streef nietemin daarna.

Om te weet dat God alles sien waardeur ons gaan, is een van die grootste gerusstellings wanneer ons vervolg word of deur 'n moeilike tyd gaan. Niks is vir Hom verborge nie. Sy liefdevolle oë is op ons en Hy hoor ons gebede. Op sy tyd en op sy manier sal geregtigheid seëvier. Intussen word ons daaraan herinner om te bid vir diegene wat aan ons verkeerd doen. Geregtigheid moet in God se hande geplaas word en nie in ons eie hande geneem word nie. Met die wete dat God dit alles sien, kan ons Hom vertrou met die uitkoms. Die wat kwaad doen, sal nie ongestraf bly nie.

In hierdie vertroue vind ons ons vryheid. Wetende dat God in beheer is, kan ons gelukkig wees met ons lewens, goeie dae verwag en ons pyne en slegte dinge aan sy liefdevolle, bekwame hande toevertrou.

Gebed

Liewe Here Jesus, help my om my tong te beheer en om lewe te spreek en nie skade te berokken nie. Help my om weg te draai van die bose en aktief te streef na die goeie en vrede in my lewe. In tye van vervolging of swaarkry, herinner my dat U dit alles sien en dat u geregtigheid volmaak is. Help my om U te vertrou met die uitkoms en om lief te hê en te bid vir diegene wat my te na kom. Amen.