Oorwinning oor Beproewings - 'n Studie van 1 & 2 PetrusSample

In Christus Uitverkies

Lees: 1 Petrus 2:4-10

SOAP: 1 Petrus 2:9

Julle, daarenteen, is 'n uitverkore volk, 'n koninklike priesterdom, 'n nasie wat vir God afgesonder is, die eiendomsvolk van God, die volk wat die verlossingsdade moet verkondig van Hom wat julle uit die duisternis geroep het na sy wonderbare lig.

Oordenking

Jy is nie wat die wêreld van jou sê nie. Jy is wie God sê jy is. In ‘n wêreld wat ons probeer etiketteer en definieer, spreek die Woord van God die diep waarheid oor ons identiteit uit. Volgens 1 Petrus 2:9 is jy uitverkies, koninklik, heilig en Syne.

Jou lewensdoel is om aan die wêreld te verklaar wat Christus vir jou en vir hulle gedoen het (Matteus 28:19-20) — hoe jy vroeër in die duisternis was en nou in sy wonderbaarlike lig lewe. Jy is soos ‘n wandelende, lewende advertensie van die liefde van God. Soos jy groei in jou geloof en die Woord van God in jou lewe uitleef, wys jy die waarde daarvan om vir God te leef en die seëninge wat daaruit voortspruit om Jesus te volg.

Jou waarde lê nie in wat jy doen of besit nie, maar aan Wie jy behoort (Efesiërs 2:10). Jou verhouding met Christus is belangriker as enige titel wat jy het. Titels word dikwels aan ons toegeken op grond van prestasies, maar om te behoort aan God se “uitverkore volk”, “koninklike priesterdom” en “heilige volk”, word deur genade aan ons gegee. Dit is ons verantwoordelikheid om in eensgesindheid Christus in die wêreld te verteenwoordig (Efesiërs 4:3).

Ons moet besef dat “uitverkore volk”, “koninklike priesterdom”, “heilige nasie”, en “eiendomsvolk” alles dui op eenheid, een familie. As Christene behoort ons aan een familie, een liggaam van Christus (Romeine 12:4-5). Ons is elkeen uniek, en tog pas ons as lede van die liggaam van Christus in harmonie bymekaar. Wanneer een van ons ly, voel ons almal die pyn (1 Korintiërs 12:12-26). Wanneer ons in harmonie saam is, komponeer ons lewens ‘n manjifieke loflied, soos ‘n pragtig afgerigte koor.

Wanneer ons nie vir onsself dien, sing en leef nie, maar vir Christus, verkondig ons sy deugde hard en duidelik. Sing daarom jou deel onbeskaamd, liewe Christen. Leef jou lewe as God se geliefde, uitverkore en kosbare kind. Die wêreld moet die pragtige lied van jou lewe wat in lof uitgeleef word, hoor.

Gebed

Dierbare Here Jesus, dankie dat U my uitverkore, koninklik en heilig verklaar. Help my om in eenheid en harmonie saam met my medegelowiges te leef en u genade en liefde met vrymoedigheid te verkondig. Amen.