LydenstydSample

God Voorsien

Lees: Lukas 12:13–34

SOAP: Lukas 12:29–30

"Julle moet julle ook nie gedurig afvra wat julle gaan eet of drink nie, en julle moenie besorg wees nie. Dit is alles dinge waaroor die ongelowiges in die wêreld begaan is, maar julle het 'n Vader wat weet dat julle dit nodig het."

Oordenking

Liefdadigheid kan 'n moeilike onderwerp wees. Ons is almal sensitief oor geld, want ons het almal geld nodig om te lewe. Voedsel kos geld, blyplek kos geld, klere kos geld. So ook al die dinge wat nie absolute noodsaaklikhede vir oorlewing is nie, kos geld — soos motors, stokperdjies, reis en opvoeding.

Ons versoeking is dikwels om soos die ryk man in Lukas 12 te leef. Hierdie man was baie suksesvol, sodat hy nie genoeg plek gehad het om sy hele oes op te gaar nie. In plaas daarvan om te erken dat alles wat hy gehad het 'n gawe van God is en dat hy sy rykdom met ander kon deel, het hierdie man groter pakhuise vir sy graan gebou. Hy het sy sekuriteit in sy rykdom geplaas en geglo, omdat hy genoeg gehad het, hy vir die res van sy lewe nie bekommerd hoef te wees nie.

Nie een van ons wil bekommerd wees of ons basiese behoeftes bevredig gaan word nie. Dit is maklik om ons sekuriteit in ons finansies te plaas. Dit gee ons nie groter geloof in God nie. Jesus het vir sy dissipels gesê om nie bekommerd te wees oor hulle fisiese behoeftes nie. Dit maak nie saak wat hulle ontbreek nie, God sou voorsien net wat hulle nodig gehad het. Hulle sekuriteit was in Hom, nie in wat hulle gehad het nie. Selfs met 'n oorvloed rykdom, kan ons nie nog dae by ons lewens voeg nie en, soos die ryk man agtergekom het, kan ons nie enige van ons rykdom saamneem wanneer ons sterf nie.

Nadat Jesus sy dissipels verseker het dat Hy altyd vir hulle sou sorg en voorsien, het Hy gesê: "Verkoop julle besittings en gee aan die armes." Hy sou voorsien wat hulle nodig het sodat hulle mildelik aan behoeftiges kon gee.

As ons met liefdadigheid sukkel, is dit nie omdat ons nie genoeg het om aan ander te gee nie. Liefdadigheid is 'n geloofskwessie, nie 'n hulpbronkwessie nie. Liefdadigheid is 'n uitdrukking van ons geloof. Dit wys presies hoeveel ons glo dat God in ons behoeftes sal voorsien. Wanneer ons oortuig is dat Hy altyd vir ons sal gee wat ons nodig het, sal ons meer gewillig wees om vir ander te gee.