Soma Biblia Kila Siku/AGOSTI 2023Sample

Kutokana na ishara za Yesu viongozi wa Wayahudi walifadhaika sana:Tukimwacha hivi, watu wote watamwamini; na Warumi watakuja, watatuondolea mahali petu na taifa letu(m.47-48). Badala ya kunyenyekea na kumkubali Yesu walizidi kushikilia vyeo vyao kwa nguvu. Kwa mfano tunaonamtu mmoja miongoni mwao, Kayafa, aliyekuwa Kuhani Mkuu mwaka ule, akawaambia, Ninyi hamjui neno lo lote; wala hamfikiri ya kwamba yafaa mtu mmoja afe kwa ajili ya watu, wala lisiangamie taifa zima. ...Basi tangu siku ile walifanya shauri la kumwua. ... Na wakuu wa makuhani na Mafarisayo walikuwa wametoa amri ya kwamba mtu akimjua alipo, alete habari, ili wapate kumkamata(m.49-50, 53 na 57). Kwa njia hiyo wao wenyewe walisababisha Warumi kuja kuharibu mji wao na taifa lao, kama tunavyosoma katika Lk 19:41-44: Yesualipofika karibu aliuona mji, akaulilia, akisema, Laiti ungalijua, hata wewe katika siku hii, yapasayo amani! Lakini sasa yamefichwa machoni pako. Kwa kuwa siku zitakuja, adui zako watakapokujengea boma, likuzunguke; watakuzingira na kukuhusuru pande zote; watakuangusha chini wewe na watoto wako ndani yako, wasikuachie jiwe juu ya jiwe, kwa sababu hukutambua majira ya kujiliwa kwako. Unabii huu wa Yesu ulitimizwa baada ya miaka kama 40, yaani mwaka 70 b.K. Zingatia m.52 unaosema,Yesu atakufa kwa ajili ya taifa hilo. Wala si kwa ajili ya taifa hilo tu; lakini pamoja na hayo awakusanye watoto wa Mungu waliotawanyika, ili wawe wamoja. Ni kwa mataifa yote!