21 dae oor die krag van gebed deur Angus Buchan™Sample

“Bid voortdurend”

Die Bybel sê Elia het dieselfde emosies gehad as ek en jy. Met ander woorde, hy het dieselfde swakhede as ons gehad. Hy het voor dieselfde versoekings te staan gekom. Hy was deur dieselfde vrese en twyfel geteister, maar hy was ’n man van geloof … en van gebed.

Daar was iemand anders wat net soveel vir my beteken het, ’n Suid-Afrikaner met die naam William Duma. Hy was iemand wat niks gedoen het sonder om te bid nie. Hy het meer tyd in gebed deurgebring as in enigiets anders.

’n Ander man wat in my gedagtes opkom, is Smith Wigglesworth, ’n nederige man, maar ook ’n man van gebed. Daar is meer as tien gedokumenteerde gevalle van mense wat uit die dood opgewek is deur sy bediening. Hy het gesê: “Ek bid nooit langer as 30 minute nie, maar ek laat nooit 30 minute verbygaan sonder om te bid nie.”

Jy sien, dit is die verskil. Sommige mense wil heeltyd praat. Kom ons hou op praat en kyk wat God oor die saak te sê het.

GEBED: Vader God, dankie vir die herinnering dat ek altyd moet bid. Ek weet my gebede het soms oortuiging nodig. Help my om positief te praat oor sake waaroor ek gebid het. Help my om te bid en te glo dat U my volgens u wil sal antwoord. Amen.

Geneem uit IN DIE VREDE VAN SY TEENWOORDIGHEID deur Angus Buchan © Christelike Uitgewersmaatskappy.