BibleProject | ការឆ្លុះបញ្ចាំងលើការយាងមកដល់Sample

អំណរក្នុងព្រះគម្ពីរជាការសម្រេចចិត្តដ៏ជ្រាលជ្រៅនៃជំនឿ និង​ជាសេចក្តីសង្ឃឹមនៅក្នុងអំណាចនៃព្រះជន្ម និងសេចក្តីស្រឡាញ់របស់ព្រះយេស៊ូវផ្ទាល់។ ហើយពេលលោកអ្នកជឿថា សេចក្តីស្រឡាញ់របស់ព្រះយេស៊ូវបានយកឈ្នះសេចក្តីស្លាប់ដោយផ្ទាល់  អំណរនឹងក្លាយជាសមហេតុផលយ៉ាងចម្លែក ទោះបីស្ថិតក្នុងកាលៈទេសៈដ៏ខ្មៅងងឹតបំផុតក៏ដោយ។ សេចក្ដីនេះមិនមានន័យថា លោកអ្នកគួរតែធ្វើព្រងើយ ឬលាក់ទុក្ខព្រួយឡើយ។ ការធ្វើបែបនេះនាំឱ្យមានសុខភាពមិនល្អ ឬមិនចាំបាច់។ លោកប៉ុលតែងតែសម្តែងការសោកស្តាយចំពោះការបាត់បង់មនុស្សជាទីស្រឡាញ់ ឬសេរីភាពផ្ទាល់ខ្លួនរបស់លោក។ លោកបានហៅការនេះថា ពោរពេញដោយទុក្ខសោក តែក៏ពោរពេញដោយភាពរីករាយដែរ។ ស្របពេលដែលលោកទទួលស្គាល់អំពីការឈឺចាប់របស់លោក  លោក​ក៏បានជ្រើសរើសជឿទុក្ខចិត្តលើព្រះយេស៊ូវថា ការបាត់បង់របស់លោកនឹងមិនមែនជាលទ្ធផលចុងក្រោយបង្អស់ឡើយ។ 

សូមអាន៖

២ កូរិនថូស ៦ៈ១០​ 

ឆ្លុះបញ្ចាំង៖

​​​​​​​​​​​​តើលោកអ្នកអាចរំឭកដល់ពេលវេលាមួយ នៅក្នុងជីវិតរបស់លោកអ្នក ដែលលោកអ្នកពោរពេញដោយទុក្ខព្រួយ ប៉ុន្តែនៅតែអាចរីករាយបានទេ? បើដូច្នេះមែន តើលោកអ្នកនឹងពណ៌នាពីបទពិសោធន៍នោះដូចម្តេច? សូមចំណាយពេលបន្តិច ដើម្បីអធិស្ឋានទៅព្រះជាម្ចាស់។ អរគុណព្រះអង្គចំពោះអំណររបស់ទ្រង់​ ដែលឱ្យលោកអ្នកឆ្លងផុតការឈឺចាប់ដ៏សាហាវបំផុត។ សូមយាង​ព្រះអង្គឱ្យបង្រៀនលោកអ្នកពីរបៀប ដែលអាចរីករាយក្នុងពេលមានទុក្ខលំបាក។ សូមស្មោះត្រង់ចំពោះព្រះអង្គអំពីរឿង ដែលលោកអ្នកជួបការលំបាក ហើយទូលសូមព្រះអង្គពីអ្វី ដែលលោកអ្នកត្រូវការ។