Die Grootste GeskenkSample

Die Resultaat van Geloof

Lees: Matteus 15:21–28; Lukas 8:42–48

SOAP: Matteus 15:28; Lukas 8:48

“Mevrou,” sê Jesus vir haar, “jou geloof is groot. Jou wens word vervul.” Van daardie oomblik af was die dogter gesond.

Toe sê Hy: “Dogter, jou geloof het jou gered. Gaan in vrede!”

Oordenking

Hoe meer ons leer oor God en die gawes wat Hy ons gegee het, hoe meer voel dit asof ons 'n pragtige matrjosjka-pop uitpak. As jy al ooit met een gespeel het, weet jy dat hierdie Russiese nespoppe oopmaak om nog 'n pop te onthul, en dan nog een, totdat jy by die kleinste pop kom.

Ons het geleer oor God se karakter en goedheid en daarna 'n ander laag oopgemaak om die gawe van dankbaarheid te ontdek, wat dan die gawe van hoop, en nou die gawe van geloof, geopenbaar het. Elke nuwe ontdekking leer ons iets oor God, sy Seun en ons geloof. Die les van vandag beweeg ons van "wat geloof is" na "wat geloof doen".

Ons geloof in Jesus en die krag van die Heilige Gees gee ons die vrymoedigheid om God te nader met die begeertes van ons hart, met die vertroue dat sy wil die regte antwoord is op wat ons nodig het. Die gevolg van daardie geloof is vrede. Wanneer ons in God glo — glo dat Hy die skepper en heerser oor alles is — kan ons vrede hê, ongeag van ons omstandighede of hoe ingewikkeld die lewe vir ons voel. 

Vrede is nie 'n gevoel of 'n ervaring wat slegs tydens Kersfees gebeur wanneer ons versierings opsit wat sê: "Vrede op Aarde" nie. Vrede is die gevolg van die gawe van geloof wat God ons gegee het, en dit is 'n geskenk wat ons met ander kan deel terwyl ons vir hulle vertel waarom ons Jesus vier en opgewonde wag op sy beloofde koms.

Gebed

Here, dankie dat U my so mildelik elke goeie en volmaakte geskenk gegee het wat ek nodig het om in my geloof te groei en ander aan te moedig. Hoe meer ek oor U leer, hoe meer ontsag kry ek oor die diepte van u liefde vir my. Gee my die geleentheid om die rede vir my vrede hierdie Kersfees met ander te deel. Amen.