Wanneer Alles Blou IsSample

Alles is blou

Depressie word wêreldwyd beskou as een van die vernaamste oorsake van mediese ongeskiktheid en raak ’n geskatte 300 miljoen mense. Wanneer iets soos diabetes gediagnoseer word, huiwer mense nie om vir ander te vertel dat hulle siek is en behandeling daarvoor ontvang nie. Maar wanneer iemand met ’n gemoedstoornis gediagnoseer word, is mense meer geneig om dit vir hulleself te hou. Niemand wil “mal” genoem word, of aangesê word om hulleself net reg te ruk nie.

Jona is nie die enigste depressiewe karakter wat ons in die Bybel teëkom nie. Dawid, Elia, Job, Naomi, Salomo, Moses en Jeremia het almal gestoei met angstigheid en gevoelens van hooploosheid. Selfs Jesus word deur Jesaja beskryf as “iemand wat leed en pyn geken het” (Jesaja 53:3).

Wat ons by Jona en ander soos hy kan leer, is dat hulle by die Here aangeklop het met hulle woede, skaamte of dreigende gevoelens van onheil. Hulle was nie bang om te erken hulle het hulp nodig nie — en het nie toegelaat dat stigma hulle vaskeer nie.

DEURBREEK DIE STIGMA

Algemene mites oor geestesversteurings wil graag vertel dat dit ’n teken is van swakheid of net ’n verskoning vir swak gedrag. Mense wat aan geestesversteurings ly, tree weliswaar dalk vreemd of op onverwagse maniere op. Maar dis die siekte se skuld. Ja, ook mense met geestesversteurings maak soms swak keuses wat nie verband hou met die simptome van hulle siekte nie — maar ’n mens moet nogtans versigtig wees om te oordeel sonder volle inagneming van die hele gesondheidsprentjie.