Luk 15

’Bla sanle ma gɔné vɔle

(Mt 18:10–14)

1Vagɔɔlisimunu faa valé wenyanékɛlɛmunu bié Jézu ma alé we ’male we gi. 2Yé Farizimunu valé sɛbɛgifemunu gun gyɛ a ma yé wo léé: Mi ’ko éé wenyanékɛlɛzannu sié ’té éé fɛ blé wo va.

3Naa, Jézu gɔné do vɔ wo lɛ yé é léé: 4Ka va mi kyɛn lé, dé ’bla yɔ soru a a lee yé a do san a lee, é ’ka a yɔ ziɛn wɔlɛ vu ta sɔraziɛn voo bwi gi yé yee lé é san, yé é go a nagini fɔɔ yé é a ye loo? 5Yé dé é a ye, éé a vɔa é bɔrɔ zi gi nanale nya; 6yé dé é bɔ kɔn ’léé, yé é é béénu valé é punma munu laan yé é lé wo lɛ léé: Anlé ’bla lé é san an lee, maa a ye, amalé ka gi ’é nana an va ma. É ’ka yee ɛ zo loo? 7A zo duo lé, maa lé ka lɛ léé, wenyanékɛlɛzan do kpen lé é bli nɔla, a ma gi nanale a blɛn la gi é mini mi tegele yɔ ziɛn wɔlɛ vu ta sɔraziɛn lé wo ma we ’ka ’wo bli nɔlale gi lo, wozé ta.

Gɔɔli sanle ma gɔné vɔle

8Taa, le kyɛn lé, dé tanma vu a a lee yé a do san a lee, é ’ka kyɛbɔ bié ’té éé kɔn gi sian yé é vo a ginian yɛrɛlɛɛ, fɔɔ yé é a ye loo? 9Dé é a ye, é é bwɛnénu valé é punma lomu laan, yé é léé: Tanma lé é san an lee, maa a ye, bɛwemalé ka gi ’é nana an va ma. 10A zo duo lé, maa fe ka lɛ, dé wenyanékɛlɛzan do kpen é bli nɔla, la gi munu faa gi é dan nana lɛ Kazambale lé lanjenu va, alé we ma.

Mi be sanle ma gɔné vɔle

(Mis 7:7–8; Ozé 14)

11É lé é ziin wo lɛ léé: Mi do be a fié. 12A voélazan lé é ti lɛ léé: An ti, i zara lé maa dan a ble lɛ, ’bé nɔ an lɛ é nya do. Yé a ti ’é zarafɛnu guli wo ma. 13’Bɛ zuo yi sɛ nya yé a voélazan élé fɛnu faa sia yé é go tɛrɛ baa la. ’Bɛna mi, é élé gɔɔli sɛrɛ wevɔnle kɛlɛle ma. 14É nyaa élé gɔɔli faa sɛrɛle nya, yé lɔrɔ blɛn dɔ ’bɛ tɛrɛ la. É sia ’bɛ bléyi va, é nyané lé we dɔɔ. 15É go nyanama gini lɛ flazan do va, yé ’bɛ a pa zia léé, ’é go suru tabin élé féi. 16Mi do kpen ’ka fɛ no a lɛ lo, amale fɛ kɔlɛnu lé surunu a blé bɛ, é a a va léé, ’é ’bɛ ble yé ’é kan. 17Sin, a ’wuo dɔ a ta yé é léé: An ti va nyanamapamunu a kiɛre; yé wolé fɛblele a di. Maa ’ko, ’té maa gaan lɔrɔ nya. 18An dan nwa lɛ yé an go an ti va, yé maa dan a fe lɛ a lɛ léé: An ti, an wenyané kɛlɛ Bale valé bii lɛ. 19A yara ’ka an yara léé, wo an laa i be é dɛrɛ lo. ’I an si ilé nyanamapazan do nya. 20Yé é nwa yé é ti va zi sia. Bléyian va lé é ke baa mi, a ti a ye, yé ’bɛ nyanai zén a ta, yé ’bɛ vlan si yé ’bɛ vɔ a bɔrɔ ma yé ’bɛ a tuu gyɛ. 21A be lé a lɛ léé: An ti, an wenyané kɛlɛ Bale valé bii lɛ. A yara ’ka an yara léé, wo an laa i be é dɛrɛ lo. 22Naa, a ti lé é wuozannu lɛ léé: Varɔ lé é ke é zima é mini varɔ faa ta, ’ka da a nya fiéfié, yé ’ka a nɔ a lɛ. Yé ’ka bɛmafɛ nɔ a lɛ, yé ’ka sawala nɔ a lɛ. 23Diriné bualeo, ’ka da a nya, ’ka a gyɛ. Kaa fɛ ble, kaa gi é nana. 24Naa, an be ’ko, é ga, yé é vuo; é san, yé é bɔra a gi. Yé wo kun zana gyɛle ma. 25’Té a be vininzan a féi. ’Bɛ si féi aan wo, yé ’bɛ bɔ kɔn sɔnɔ, ’bɛ lɛrɛvɔle valé flin vun ma. 26É leezan do laa, yé é a gi laa ’bɛ lee léé, mɛ ɛ kɛlɛɛ? 27Yé nyanamapazan ’ko lé a lɛ léé: I zuané da é ziin, yé i ti a ye aan wo léé, a fuu a a ta, amalé é diriné bualeo gyɛ. 28Gɔnézan bli fli yé é ’ka a va léé, é wɔra kɔn gi lo. A ti bɔra yé ’bɛ zanté vɔ a lɛ léé, ’é wɔra. 29Naa, é lé é ti lɛ léé: Bé ye do, é bɔ lɛɛ kiɛre ma ’té an nyanama paan i lɛ, yé an ’ka sɔn vɔ lɛ i dére do kpen ma lo. Yé i ’ka tan boliné vinin do nɔ lɛ an lɛ yé an fɛti kɛlɛ a nya an béénu va monomono lo. 30Paka! Yé i be lé ke bɛ, é i zarafɛnu sia yé é wo sɛrɛ gɔnéginilomu ma, yé dé é da tɔɔn, yé i diriné bualeo gyɛ a lɛ. 31A ti lé a lɛ léé: Anlé né, bii a yifaama an va, yé fɛ faa lé ke an lee, izé lé. 32Naa, i zuané ’ko, é ga yé é vuo, é san, yé é bɔra a gi; amalé é a lé ko gi é nana a we ma yé ko fɛti kɛlɛ webozen nya.

Atualmente Selecionado:

Luk 15: GOURU

Destaque

Copiar