Luk 16

Mi leezan ple ma gɔné vɔle

(Mt 25:14–30; 1 Tim 6:7–8)

1Jézu lé é ziin é zuomunu lɛ léé: Mi do lé é ke fuablezan nya, a leezan do ana, yé wo ’bɛ tɔ fe a lɛ léé, ’bɛ alé fɛnu sɛra. 2É a laa yé é lé a lɛ léé: Mɛ we lé maa a maan i ma bɛɛ? Anlé fɛnu faa lé é ke i lee, ’ko nɔnɔ; i ’ka dan kɛlɛ lɛ an leezan nya é dɛrɛ lo. 3A leezan lé é bli gi léé: Sin, anzan a an nwana élé fɛnu ta; maa dan a kɛlɛ lɛ kaa? An nyanama pa an bɛ nyaa? An ’ka bɔa ’bɛ lɛ lo. An go doro paa? ’Bɛ an gya yara nya. 4Dé wo anlé nyanama si an lee, we lé maa dan a kɛlɛ lɛ, yé munu é dan nyanana nɔ lɛ an lɛ, maa a gi dɔɔ. 5Yé munu lé azan lé vɛɛn ke wo ma, é wo faa laa do do yé é lé a vininzan lɛ léé: Anzan lé mɛ vɛɛn ɛ ke i maa? 6’Bɛ lé a lɛ léé: Nyɔnɔ ’bali vu ta sɔraa lé. Yé é lé ’bɛ lɛ léé: ’Ilé sɛbɛ si, ’i nyana fiéfié, bé gyɛ sɔraziɛn. 7A zuo é lé a do lɛ léé: Yé bii, alé mɛ fɛ vɛɛn ɛ ke i maa? ’Bɛ léé: Buruwɔlɛ bɔlɔ wuru fié yɔ soru lé. Yé é lé ’bɛ lɛ léé: ’Ilé sɛbɛ si, bé gyɛ wuru fié. 8Kɔnzan é leegɔné ple ’ko tɔ zin fe léé, a gi kini. Naa, tɛrɛ ’ko lamunu gi kini wozé bléyi va é mini munu lé wo va ke é kinile, wo ta.

9Yé maa lé ka lɛ léé: ’Ka béé bɛ ble kalé tɛrɛlafua nya, yé dé a ’ko vuru ka ma yian nya, nyanana lé é ’ka sɛra monomono lo, ka dan a ye lɛ a mun va. 10Mian éé yara paan we kiiéné kɛlɛle ta, éé yara paan é ziin we blɛn kɛlɛle ta, yé mian é ’ka é yara paan we kiiéné kɛlɛle ta lo, é ’ka é yara paan we blɛn kɛlɛle ta lo é ziin. 11Dé i ’ka i yuɛ pa lɛ dabli kɛlɛ fua va tegele lo, de ɛ dan fuabozen bɛ pa lɛ i lee? 12Fɛ lé wa bɛ pa i lee, dé i ’ka i yuɛ pa lɛ a va lo, de ɛ dan fɛ nɔ lɛ i lɛ ibozen zé nyaa? 13Mi do kpen ’ka bɔa kɛlɛle lɛ mi fié wuozan nya lo. Naa, a do za é dan vo lɛ a gi yé a koɛzan é dan sɔ lɛ a lɛ; é dan nana lɛ a do va yé é dan a koɛzan ye lɛ boami nya. Kazambale koo, tɛrɛlafua koo, ka ’ka bɔa kɛlɛle lɛ wo fiénu wuozannu nya lo.

Jézu lé wepaale kenu

(Mt 23:23–28; 5:17–20)

14Gɔɔli sɔ Farizimunu lɛ é baba, amalé wo ’bɛ we ’ko faa ’ma aan wo, wo Jézu ma we nana. 15Jézu lé wo lɛ léé: Ka a a va léé, ’wolé we ’é kɛlɛ tegele munu yuɛ gi, naa, Kazambale ka bli dɔɔ; fɛ lé é ke fɛ blɛn nya munu yuɛ gi, é a bélé bo zo Kazambale yuɛ gi.

16Bélidɔwe valé balelayemunu lé we vo ana fɔɔ Jan zé bléyi va; é sia ’bɛ bléyi va wo Kazambale plale mi nwiin lé we fe, yé mi faa do do éé wɔraan a gi gla nya. 17Bélidɔwe gyɛwɔlɛ kiiéné sanle a va a plɛplɛ é mini tɛrɛ valé la giéle ta.

18Mian é na bɔra yé é le bɛ si, é le bɛ gini é na va, yé mian é le bɔrale si, mi bɛ na ginizan lé.

Fuablezan valé Lazaa

(Lk 12:15–21)

19Fuablezan do ana yé éé galunaa sɔ valé lɛnsɔ zima zén‐é é ta, ’té éé fɛ néné kiɛre blé yifaama. 20Nyanégyɛzan do ana wa laama Lazaa, ’bɛ a é yiale fuablezan lé kɔn ’léé, ’té ’bɛ kɔlɛ faa a é siale é ta manɔn nya. 21Fɛnu lé woo zanaan fuablezan lé tablé bɔn ma, é sɔ a lɛ léé, ’é wo ble yé ’é kan; ’té blénnu éé dan a manɔn gi flan lɛ. 22Yé yee nyanégyɛzan ga, yé lanjenu a sia yé wo goan yé wa vɔ Abraam bɛ gi. ’Bɛ zuo yé fuablezan ga yé wo ’bɛ pa. 23É a gamunu nyanana ’té éé nyané blé kaii, yé é yara dɔ loru yé é Abraam ye baa, ’té Lazaa a ’bɛ bɛ gi. 24Yé é siaa léé: An tra Abraam, maa a nyané blena kaii kyɛnéné va ’ko, amalé ’i nyanai zén an ta, yé ’i Lazaa pa zia léé, ’é da yé é bɛnwɔlɛ do wɔra ’yi va yé é an nɛnɛ la tua a nya. 25Abraam lé a lɛ léé: Anlé né, i ’ilé fɛ zinnu ye ilé tɛrɛla bléyi va, yé Lazaa nyané ye ézé bléyi va, ’bɛ saan i gii? Sin wa ’bɛ tɔrɔ paana ’ko, yé bii a nyané blena. 26Yé é ziin, guru blɛn lé a glɛ ’ka lo é a kaa méléna, léé, munu lé é sɔ wo lɛ léé, ’wo si ’ko yé wo go ka va wo ’ka bɔalɛ lo, yé munu lé é sɔ wo lɛ léé, ’wo si mi yé wo da ko va ’ko, wo ’ka bɔalɛ lo. 27Fuablezan léé: An tra Abraam, an bwenu a soru, amalé ilé zanté, ’i Lazaa nwunvɔ an ti lé kɔn ’léé, 28we ’konu zuo fele wo lɛ we gi léé, té wo da nyanéblena ’ko lo. 29Abraam lé a lɛ léé: Moizi valé balelayemunu dére a wo lee; ’wo wo dére ’ma ma. 30Yé é léé: Gba, an tra Abraam, naa, dé gamunu va mi do go wo va wo dan ’wo bli nɔla lɛ. 31Yé Abraam lé a lɛ léé: Dé wo ’ka ’wo tɔné dɔ lɛ Moizi valé balelayemunu dérenu lɛ lo, dé mi nwa gale vaoo, wo ’ka dan ’wo bli nɔla lɛ ’bɛzan dére ta lo.

Atualmente Selecionado:

Luk 16: GOURU

Destaque

Copiar