Luk 14

Jézu ziigyɛzan béli

(Lk 6:6–11; 13:10–17)

1Flinyi do nya, Jézu wɔra Farizimi segele do lé kɔn gi fɛblele ’bɛ va we ma, ’té Farizimunu a naginian. 2’Té mi do lé ziigyɛ ke a ma, ’bɛ a é dɔle a yara zia. 3Jézu lé bélidɔwedɔɔmunu valé Farizimunu lɛ léé: A se a mi lɛ léé, ’é mi béli flinyi nya laa, taa, a se ’ka a lɛ loo? 4Yé wo vo é tadɔle. Yé Jézu kun mi ’ko ma yé é a béli yé é a pa zia. 5A zuo é lé wo lɛ léé: Ka va mi kyɛn lé, dé é a a be nyaoo, dé é a alé diri nyaoo, dé é vɔ ’yiguru gi flinyi nya, é ’ka dan a si lɛ a gi loo? 6’Bɛ zi pa dére ’ka ye lɛ wo lee lo.

Dé wo i laa fɛti ma, bé kɛla fɛan zo

(Mt 23:5–12; Fil 2:3)

7Jézu a ye aan wo léé, munu lé wo wo laa fɛblele ma wo nyana zi ’lɛ, é gɔné do vɔ wo lɛ yé é léé: 8Dé wo i laa lesile lé fɛti kɛlɛle ma, té i nyana zi ’lɛ blin ta lo. Mi lé a blɛn mini i lɛ, dé wo ’bɛ laa mii? 9Dé fɛtizan da yé é lé i lɛ léé: ’I blin ’ko nɔ mi ’ko lɛ, ’té yara é dan i gyɛ lɛ nyanale zuozia we ma. 10Naa, dé wo i laa fɛti kɛlɛle ma, ’i go, ’i nyana zuozia blin ta yé dé fɛtizan da é dan a fe lɛ i lɛ léé: An béé, ’i nyana zi ’lɛ mun. Yé ’bɛ ɛ dan i kɛlɛ lɛ mi blɛn nya munu lé ka ke é nyanale fɛblele zi wo nya bɛ, wo yuɛ gi. 11Naa, dé mian ébo nwaan blɛn wo dan a tua lɛ, yé mi lé ébo tuaan wo dan a nwa lɛ blɛn.

12Jézu lé é ziin é laazan lɛ léé: Dé i yiéyi fɛ kɛlɛoo, dé i nyanadi fɛ kɛlɛoo, i béénu koo, i bwenu koo, i lelenu koo, i bɔlu fuablezannu koo, té i wo do kpen laa lo, dé wo da i laa é ziin yé wa lɛgi kɛlɛ i lɛ. 13Naa, dé i a fɛti kɛlɛna, nyanégyɛmunu koo, gane valé bɛgazannu koo, tunbozannu koo, yuɛwiizannu koo, ’i wo ɛ laa. 14Wo ’ka bɔa a lɛgi kɛlɛle lɛ i lɛ lo, naa, Bale é dan a lɛgi kɛlɛ lɛ i lɛ mi tegelenu nwayi nya gale va, amalé i gi é dan nana lɛ ’bɛ yi la.

Fɛti blɛn ma gɔnévɔle

(Mt 22:2–14)

15Munu lé wa fɛ zi, wo va mi do dére ’konu ’ma aan wo, é lé Jézu lɛ léé: Mi lé é dan fɛble lɛ Kazambale lé fuatɛrɛ la, ’bɛzan zé a é zima. 16Jézu lé a lɛ léé: Mi do fɛti blɛn kɛlɛ yé é munu kiɛre laa. 17Fɛblebléyi bɔ aan wo, yé é ’é leezan nwunvɔ, a fele we gi munu lé é wo laa, wo lɛ léé: ’Ka da, fɛ kɛlɛle nyaa. 18Naa, wo faa tere kun gba vɔle ma. A vininzan lé a lɛ léé: Ilé zanté, ’i an vo. An féi do lɔ yé é a lé an go a nagini. 19A do léé: Ilé zanté, ’i an vo; maa dirigɔné vu lɔ yé maa a gona wo gi dan lɛ. 20Yé a do léé: Maa le si lao, amalé an ’ka bɔa gole lɛ lo. 21Mi leezan da yé é we ’konu zuo fe ’ézan lɛ. Yé kɔnzan bli fli yé é lé é leezan lɛ léé: ’I go é nya do flɛgi valé flaworo dii yé ’i da nyanégyɛmunu koo, bɛ valé ganegazannu koo, yuɛwiizannu koo, tunbozannu koo, wo nya. 22Mi leezan lé ézan lɛ léé: Anzan, we lé bé fe maa a kɛlɛ yé nyanana ke vo é ziin. 23Yé kɔnzan lé é leezan lɛ léé: ’I go zinu ta valé gɔrɔnu ma yé munu lé i wo ye, i wo ma kyɛ dɔ léé, ’wo da, yé wo anlé kɔn fan. 24Naa, maa lé ka lɛ léé, mi vininzannu lé maa wo laa fɛblele ma, wo va mi do kpen ’ka dan anlé fɛ lɛdan lɛ lo.

Gole Jézu zuo a fɛan zo

(Mt 10:37–39; 16:24–26)

25Mi gu blɛn a gona zia Jézu va yé é yara nɔla wo ta yé é lé wo lɛ léé:

26Dé mian da an va yé a ti koo, a bu koo, a na koo, alé nénu koo, a bwenu valé a burunu koo, abozen lé tɛrɛla koo é ziin, dé wo za ’ka a gi lo, é ’ka bɔa kɛlɛle lɛ an zuozan nya lo. 27Yé mian é ’ka ébo lé yiliblan sian yé é da an zuo lo, é ’ka bɔa kɛlɛle lɛ an zuozan nya lo.

28Ka va mi kyɛn lé, dé é a a va léé, é kɔn torole zima dɔ, é ’ka nyanaan é vinin yé é a dɔgɔɔli ’léé nɔnɔ loo? yé dé a nyaagɔɔli a a lee? 29dé é da a gane vɔ faa yé a bɛ é nyaa a ma, yé munu faa lé wa ye yé wo kun a ma we nanale ma, ’té wa fé léé: 30Mi ’ko a dɔle sia yé a bɛ nyaa a ma.

31Taa, minwiinzan kyɛn lé, dé é a gona guli dan lɛ minwiinzan bɛ va, é ’ka nyanaan yé é ’wuo gi bɔrɔ é vinin loo? Yé é léé, ’ézé munu a mi baa soru, yé mi lé é dan guli dan lɛ ’é va bɛ, azé munu a mi baa vu, dé ’é sɔa a nyaa? 32Dé é ’ka bɔalɛ lo, dé minwiinzan bɛ ’ko a tan baa, é dan munu nwunvɔ lɛ ’bɛ va yɔfalo fu nya ’wo lee léé, ’wo vo drɔɔ.

33Bɛzamalé dé é a ka va miomian nya, dé é ’ka sɔn vɔa élé fɛnu faa ma lo, é ’ka bɔa kɛlɛle lɛ an zuozan nya lo.

Wɛ lé a néné si é ma

(Mt 5:13; Mk 9:50)

34Wɛ a fɛ zin nya; naa, dé wɛ néné si é ma, mɛ fɛ nya lé wa kɛla nénéé? 35É ’ka é zima tɛrɛ zé nya lo, yé é ’ka é zima wibo zé nya lo, amalé wa vulian é pla. Mi lé we ’ma tɔné ke a ’wuo ma, ’bɛzan a ’ma ma.

Atualmente Selecionado:

Luk 14: GOURU

Destaque

Copiar