Sélimɛ 15

Yawe n joogaanna kpéʔele ní Abirami ní

1Kérigèle bee kàdoʔo ma, a Yawe joo ní Abirami ní yanyaʔa ni, wi n jo: «Abirami, ki ga yɛlɛ mɔ í da fɛ̀ɛgí í. Mii wi nyɛ mɔ tunmɔzige-yárigi. Mii a tɔ̀nɔ́ tɔ̀nɔkpɔɔɔ kaan mɔ ma.» 2A Abirami jo: «Kàfɔw Yawe, nyàʔá si mɔ a zǐn kaan mii ma? Mii wi syée wee pyà fun ni. Wee wi a mii kpáagi kɔ́rigɔ lìi lè, woro wi nyɛ Eliyezɛɛri wi lè Damasi ye wów.» 3A Abirami níì jo: «Ncan mɔ ga pyà kaan mii ma í, á gi nyaa mii kpáagi púlowaa wi a ba pye mii kɔriliiw.» 4A Yawe si gi joo wi ma níì jo: «Nǎnw bee ban wi a mɔ kɔ́rigi lìi í. Fwɔɔ pìíwee mɔ tiimaa a see lè, woro wi a pye mɔ kɔriliiw.» 5#Wɔr 4:18; Heb 11:12 A wi Abirami kɔ́ri n yiri kàfugi na, ní baa wi pye: «Ki n yɛlɛ mi nyɛ̀ʔɛni sámaga mi wéle mí ŋɔripiigèle córo kapye mɔ fánʔa i nyɛ ge na bi gbǎn ge córo. A wi níì wi pye: Kánmi bee na si mɔ piibèle a ba nɛʔɛ.»

6 # Wɔr 4:3; Gal 3:6; Zya 2:23 A Abirami tága Yawe na, koro na Yawe wi córo syɛɛnsiɔn. 7A wi níì wi pye: «Mii wi nyɛ Yawe, mii wee wi mɔ yirige lè Uri kěgi ni ki lè Kalide ye wógi, bi ba tári naa kaan mɔ ma di pye mɔ wóro.» 8A Abirami si jo: «Kàfɔw Yawe, nyàʔá ki a gi tɛ̀ɛn mii na mii í gi cán bi cán mii a ba tári naa taa di pye mii wóro?» 9A Yawe wi yari: «Ki n yɛlɛ mi yɛ̀ʔɛlɛ taanri náapyaʔa, ní yɛ̀ʔɛlɛ taanri síkaa, ní yɛ̀ʔɛlɛ taanri bapɔlɔ cò n fàra kàtolo nibin, ní lòbwɔɔpile nibin na mi pan mii ma.» 10A Abirami yaweegèle bee myɛ cò n pan, ní baa ge paʔala jaaya siin-ziin, níì jaa-jaayi bee yɛ́ɛyɛ sɔʔɔlɔ yiyɛɛ ni, kàjáa wi da féjɛɛngèle paʔala í. 11A kaàjɔɔ-féjɛɛnri i tíri ni maa yakuuri bee ma. A Abirami i di nɛnɛ.

12 # Zyɔb 4:13-14 A ki ga pye cânjeeri na, a ŋúnɔmi tɔ̀nɔ n Abirami cò gbanʔama. A yébiliwɔɔlɔ fyáakpɔɔrɔ wɔ́ɔ̀ jée wi ni. 13#Yir 1:1-14; Kap 7:6 A Yawe si gi joo Abirami ma níì wi pye: «Ki n yɛlɛ mi gi cán mɔ yodaʔayi a kɔ́ sa pye nibɔɔnnɔ táraa ni, dee di lè ti o nyɛ pe worò í si pye yaà beè pulobèlē. Bele bee a ra be wɔʔɔ yɛ̀ʔɛlɛ saala siin fúngo ni. 14#Yir 12:40-41; Kap 7:7 Kàjáa syɛɛnfelegee má pe a pye lè pulobèlē, mii a ba kútii kúun syɛɛnfelegi bee na, si be yirige syɛɛnfelegi bee tára ni, pe si a yiri ní lɔrɔ saʔa ní. 15Mɔ si na, mɔ a tɔ̀nɔ́ kári mɔ tóolɛɛbèle kurugo yɛɛ̀nyinge na. Mɔ a tɔ̀nɔ́ mɔ lɛɛri làla myɛ kwɔ́ɔ fundaanra na, pé náa ba mɔ tɔ́n. 16Mɔ yodaʔayi a kòro yaà bi taa ba nan pe yìrigēle sicɛrɛ wóli na si náa lúru pan nɛɛ naa. Níì cán Amɔri syɛ́ɛnbèle sìnzinmɛ ga kɔ́ɔ̀ foro n nan mii í be nɛnɛ í.»

17A cángi ga too á yébiligi tɔ̀nɔ n sámaga n wɔ́ɔ, a wi fúru naàniganra ní naanyìnge nyaa, gee ni wírige da pye lè, a toro jée káari nínge ni, dee wi da yabala lè. 18#Kap 7:5 Cángi bee na a Yawe joogaanna kpéʔele ní Abirami ní níì jo: «Mii n tári naa kaan mɔ yodaʔayi ma, nlaa yaà Ezyipiti cábigi na n kári fwɔɔ n sáà nan cábikpɔɔgi na, gi lè Ufurati. 19Tári bee di lè Kenii ye, ní Kenazi ye, ní Kadimɔnii ye tári, 20n fàra Hɛti ye tári, ní Perezi ye wóri, ní Erefa ye wóri, 21ní Amɔri ye wóri, ní Kanaan ye, ní Giirigasi ye, ní Yebusi ye wóri na.»

Atualmente Selecionado:

Sélimɛ 15: CB10

Destaque

Copiar