Luka 7

Guhawulugiswa ga githumi gya muthangeli

(Matewu 8:5-13)

1Jesu na vbedzide gu ganela iso a nga embela gidzemo, a di hongola Kafarinawume. 2Muthangeli moyo nya gikwata nya lizana masotshwa a diri ni githumi gyaye nya gu gi gole ngudzu gi nga bani gi gu dwala nya guhadza gufa. 3Na pwide ndruma ya Jesu, a di rumela madhota nya gukari nya Vajudha gasi guya mu lomba gu ata vbanyisa githumi gyaye. 4Na va vbohide ga Jesu, va diya mu lomba pharamawundru, khavo: “Uye a ngu fanela gu giredwa wuhindzi wowo, 5kholu a ngu gola va na gyathu; gambe khuye a nga hi vbahela nyumba nya nombelo.” 6Jesu a di hongola navo. Na va vbweta gu vboha ndrangani, muthangeli nya masotshwa a di rumela mwango khu dzipari dzaye, khuye: “U nga dzi garadzi, Pfhumu, kholu nyi mwalo fanelo nya gu uwe u bele ndrangani gwangu. 7Nyi di dzipwa na nyiri mwalo fanelo nya gu gu khinge; aholu rumela lito limwedo lago basi, githumi gyangu gi na hawuluga. 8Kholu, eni neni, ambari nyi gu ni vakhongolo vangu, nyi na ni masotshwa nyi ma rumago neni. Mumbe gu mu ruma, kheni: ‘Indra’, a gu hongola; mumbe, kheni: ‘Delu’, ata; githumi gyangu, kheni: ‘Gira egi’, gi gira.” 9Na pwide magana yaya, Jesu a di liwuga ngudzu, a gu embela avo va nga bani va mu landra, khuye: “Nyi ngu mi embelani, kheni: Nyi si gu mani gukhodwa nya gukhongolo nya nga ogu, ambari ga va na Israyeli.” 10Sirumwa sile, na si bwelede gaya, si diya mana githumi na gi hawulugide nya dzadi.

Guwuswa ga gyanana gya noni ya Nayimi

11Khavbo avbo, khu hwane nya esi, Jesu a di hongola dhoropani ga Nayimi, gumogo ni vapizane ni gidzemo nya gingi. 12Na va gu vboha dhoropani, va di kotsana ni muthu a nga bani a guya dzingwa, a diri gyanana gya gimwegyo gya mayime moyo nya noni. Va diromo vathu nya vangi va dhoropani mule va nga bani va gu hongola navo, na va gu bangaladza malile wule. 13Pfhumu na mu wone, a di mu pwela gisiro, a gu mu embela, khuye: “U nga lili.” 14A di hidzimela, aya kuha lithatho. Avo va nga bani va li pharide, va di ema. Khavbo avbo, a di khuye: “Lidzaha, eni nyi ngu gu ruma, wuga.” 15Mufi a di wuga a khala khu giwunu gyaye, a gu phela gu ganela. Khavbo avbo, Jesu a di mu ningela ga mayi waye.

16Vatshavbo va di tala khu githawo, va gu dhumisa Nungungulu, khavo: “Tumbulugide vbakari gwathu muprofeti nya khongolo; Nungungulu endrede ngamo yaye.” 17Ndruma nya giliwugiso gegi yi di phalalega ni Judheya gwatshavbo ni mayigo yatshavbo ya vbafuvbyana mule.

Sirumwa sa Johane ga Jesu

(Matewu 11:2-19)

18Vapizane va Johane va diya mu tivisa satshavbo iso si nga dugelela. 19Khavbo avbo, Johane a di rana vapizane vavili, a va rumela ga Pfhumu, gasi guya mu wudzisa, khavo: “Khuwe wule a vbwetago guta, mwendro hi nga gu lindrela mumbe?”

20Na va vbohide ga Jesu, va di khavo: “Johane Mubhapatisi a hi rumide guta gu wudzisa: Khuwe wule a vbwetago guta, mwendro hi nga gu lindrela mumbe?” 21Gikhati gyogyo furi Jesu a di hawulugisa vathu nya vangi madwali ni gu vbanyisa ava va nga bani va gu saniswa khu maphuvbo nya guvivbe, gumogo ni gu tula maho sikhumu. 22#Wona gambe: Isa 35:5-6. Jesu a di va hakha, khuye: “Indrani muya tivisa Johane iso mu si pwago ni gu si wona: Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana. 23Kategide saye wule a gumba khuvekhiswa khu magana yangu.”

Jesu a ngu fakazela Johane

24Na va hongode vapizane vale, Jesu a di tshala a wudzisa gidzemo khu mahungu ya Johane, khuye: “Ginani mu ngaya gi wona giwulani? Tshava nya gu hanahaniswe khu phuvbo, gani? 25Gasi ginani mu ngaya gi wona? Muthu nya gu ambale sombo nya gumbure, gani? Avo va si hamugigo gilo ni gu ambala gwadi va gu dugela dzindrangani nya vafumeli. 26Ginani mu ngaya gi wona, na? Muprofeti? Ina. Khidzo nyi mi embelago. Gambe guvbindra ni muprofeti. 27Khuye oyu a thudwago khu Milowo, pwani: ‘Nyi na thangisa mbeli gwago girumwa gyangu, gasi guya gu dongisela ndzila.’ 28Khidzo nyi mi embelago, kheni: Vbakari nya vathu vatshavbo va velegidwego khu vanyamayi, mwalo muprofeti nya khongolo guvbindra Johane; aholu muthu nya mahegisela Mufumoni wa Ndzadzini khongolo guvbindra uye.”

29Vatshavbo vale va nga mu yingisago na gu ganela isoso, ambari ni vahengisi nya mikhupo, va di rungudza, khavo: “Khu lisine Nungungulu lulamide.” Khavo avo va nga bani va hakhide gubhapatisa ga Johane. 30Aholu, vafarisi ni vahevbudzi nya Nayo va nga bombago gubhapatisa ga Johane va bombide khu kharato makategwa va nga bani va dongisedwe khu Nungungulu.

31Jesu a di khuye, “Nyi na va fananisa ni mani vathu nya mela yoyu? Va ngu fanana ni mani? 32Va ngu fanana ni sanana sile nya gu, na siromo tendrelani si ganedzisana, khiso:

‘Hi wombide sitoliyo, kha mwa hana!

Hi embide dzindzimo nya wusiwana, kha mwa lila!’

33Kholu dzude Johane Mubhapatisi, a si hodzigo gilo ni gumba sela wadwa, mwari, khenu: ‘A na ni liphuvbo nya guvivbe.’ 34Dzude Mwamana wa Muthu, a hodzago ni gu sela, mwari, khenu: ‘Likhondrobwa, bewudzi, bwelo khavbo, pari nya vakhuphisi ni sighohi.’ 35Aholu guti ga Nungungulu gu lulamide mahoni ga vale va gu hakhago.”

Gighohi nya gu dzi sodzise

36Mufarisi moyo a di rana Jesu, gasi guya hodza naye. Na vbohide ndrangani momo, a di khala vbamezatunu. 37#Wona gambe: Mat 26:7; Mark 14:3; Joh 12:3.Nyamayi moyo, a nga bani a tidwa kha nga gighohi dhoropani mule, na dzitide nya gukhuye Jesu womo a hodza ndrangani ga mufarisi, a dita ni gigasi gyaye nya mafura nya gunungele ngudzu, 38ata khala khu hwane gwaye na gu lila. A di naganisa migondro ya Jesu khu marongo, a gu yi bavbulela khu ndzudzu waye, a gu yi bhejari ni gu yi todza mafura nya gunungele. 39Mufarisi wule a nga mu ranago, na wonide esi, a di ganela enga mapimoni gwaye, khuye: “Nari gupwani oyu mwama muprofeti kamwe, na gu muti khu mani, ni gu muthu muni nyamayi a mu khuhago, kholu gighohi!”

40Khavbo avbo, Jesu a di mu embela, khuye: “Simoni, gyomo nyi vbwetago gu gu embela.” A di hakha, khuye: “Ganela, Muhevbudzi.” 41Jesu, khuye: “A diromo muthu a nga bani a fiyariside dzitsapawu vathu vavili: Moyo wakone a diri ni mangava nya livbandre mazana (500) dzipondro; mumbe, lizana dzikinyeta. 42Kha nga ulo va nga bani vari mwalo dzitsapawu nya gulivbe khidzo, a di va tsetselela va vavili. Khu wevbini nya ava va vavili a nga mu golago ngudzu?” 43Simoni a di hakha, khuye: “Khu lisine, nya gu wona gukheni khu wule a nga mu tsetselela mangava nya mangi.” Jesu a di mu embela, khuye: “U hakhide gwadi.”

44A di thendregedza a gu khedza nyamayi wule, a embela Simoni, khuye: “U ngu mu wona nyamayi yoyu? Eni nyi bede ndrangani gwago, khwa nyi ninga mati nya guhandze migondro yangu; gasi uye a nyi handzide migondro khu marongo yaye, bwelo khavbo a yi bavbulela khu ndzudzu waye. 45Uwe khwa nyi bhejari; gasi uye, gukhugela nyi bela, kha garali khu gu bhejari migondro yangu. 46Uwe khwa nyi phorodza mafura hungoni; gasi uye a nyi todzide migondro khu mafura nya gunungele. 47Khu kharato, nyi ngu gu embela, kheni: A ngu tsetseledwa sighoho saye nya singi, kholu yeyedzide lihaladzo nya likhongolo. Aholu wule a tsetseledwago silo nya sidugwana, a ngu gola vbadugwana.”

48Khavbo avbo, a di embela nyamayi wule, khuye: “Siwono sago si tsetseledwe.” 49Avo va nga bani varomo vbamezatunu va di phela gu wudzisana, khavo: “Gasi khu mani oyu a dzi kodzago gu tsetselela sighoho?” 50Jesu a di embela nyamayi wule, khuye: “Gukhodwa gwago gu gu vbanyiside. Indra khu gurula.”

Atualmente Selecionado:

Luka 7: BGE2014

Destaque

Copiar